Молитвы о покровительстве пчеловодов, перед выставкой пчел

Боже Всемогий, Предвечный, содержай горстию всю тварь, обладаяй небом и землею, и всеми, яже на них, всякому же созданию, еже в пользу быти щедро подаяй: умиленно молим ти ся, Всеблаже, якоже древле израильтяном, землю медом и млеком текущую даровати, в пустыни Иоанна Крестителя Твоего дивиим медом воспитати благоизволил еси: такожде ныне призрения Твоего благоволением к живопитанию нашему, сей пчельник и его улья благослови, умножая премножи в нем пчелы, и благодатию Твоею я соблюдающи нас меда исполни: да никако сей пчельник созданий Твоих пчельных лишен, но всегда преисполнен соты меда будет: и по премногой благостыни и непобедимей крепости Твоей, да явится неподвижим многими лукавствы, и непоколебим зазорными обаянии, но Твоею всесильною огражден державою, и остенен ополчением от всякаго коварства волшебнаго сохранен, и всегда в Твоей, Христе, рукояти невредим пребудет. Твое бо есть, еже миловати и спасати ны, Христе Боже наш, и Тебе славу возсылаем, со Отцем и Святым Духом, во веки. Аминь.

Преподобным Зосиме и Савватию Соловецким

(Преподобный Савватий и святой Зосима считаются на Руси покровителями пчеловодов. На Савватия (10 октября) заканчивается уборка ульев в омшаники.)

Молитва первая

О преподобнии отцы, велиции заступницы и скории услышателие молитв, угодницы Божии и чудотворцы Зосимо и Савватие! Не забудите, якоже обещастеся, посещати чада ваша. Аще бо и отъидосте от нас телом, но духом присно с нами пребываете. Молим убо вас, о преподобнии, избавите ны от огня и меча, от нашествия иноплеменников и междоусобныя брани, от тлетворных ветров и от внезапныя смерти и от всех прилог бесовских, находящих на ны. Услышите нас, грешных (имена), и приимите молитву сию и моление наше, яко кадило благовонное, яко жертву благоугодную, и души наша, злыми делы и советы и помыслы умерщвленныя, оживите. И якоже умершую отроковицу возстависте, и неисцельныя раны многих исцелисте, и от духов нечистых зле мучимыя избависте; тако и нас, содержимых во узах вражиих, изьмите, и от сетей диавола избавите, из глубины прегрешений изведите, и милостивым вашим посещением и ходатайством от враг видимых и невидимых оградите ны, благодатию и силою Пресвятыя Троицы, всегда, ныне и присно и во веки веков. Аминь.

Молитва вторая

О преподобнии и богоноснии отцы наши Зосимо и Савватие, земнии Ангелы и небеснии человецы, ближнии друзи Христовы и угодницы Божии, слава и украшение вашея обители, необоримая стена и великое заступление северныя страны, и всего православнаго отечества нашего. Мы, недостойнии и многогрешнии, с благоговейною любовию припадаем к ракам честных мощей ваших и духом сокрушенным и смиренным прилежно молим вы: молите непрестанно благоутробнаго Владыку и Господа нашего Иисуса Христа, яко имущии к Нему дерзновение велие: да не отступит от нас Его вседействующая благодать, покров же и заступление Пресвятыя Владычице нашея Богородицы от места сего, и да не оскудеют никогдаже истиннии ревнители ангельскаго жития во святей обители сей, идеже вы богоноснии отцы и начальницы, безмерными трудами и пощениями, токами слезными и всенощными бдениями, непрестанными молитвами и молениями положисте начало иноческому житию. Ей, угодницы святии, молитвенницы к Богу, благоприятнейшии, теплыми вашими к Нему мольбами, оградите и сохраните ны и святое селение сие ваше от труса, потопа, огня и меча, нашествия иноплеменных и смертоносныя язвы, от вражды и всяких нестроений, от всякия беды и скорби и от всякаго зла: да выну на месте сем, в мире и безмолвии, благочестно славится пресвятое имя Господа и Бога, и обретают вечное спасение ищущии Его. О преблаженнии отцы наши Зосимо и Савватие! Услышите ны грешныя, во святей обители вашей и под кровом вашего защищения недостойно жительствующия, и благомощными вашими к Богу ходатайствы, испросите душам нашим грехов оставление, жития исправление и вечных благ восприятие в Небеснем Царствии: всем же верующим, иже на всяком месте и во всякой нужде призывают вас в помощь и заступление, и иже с благоговейною любовию притекают во обитель вашу, не престаните изливати всякую благодать и милость, сохраняюще их от всякия сопротивныя силы, от всякия напасти и от всякаго злаго обстояния, и подающе им вся потребная к душевней и телесней пользе. Наипаче же молите премилосердаго Бога, да дарует православному народу нашему здравие, радость и спасение, на враги победу и одоление, и во всем благопоспешение: Церковь же Свою святую да утвердит и укрепит, и все наше православное отечество в мире и тишине, в любви и единомыслии, во правоверии и благочестии да сохранит и соблюдет во веки. Аминь.

Тропарь, глас 4

Постническое и равноангельское житие ваше, преподобнии отцы Зосимо и Савватие, вселенней познаны сотвори вас: чудодеянии различными, богоноснии, просвещаете верою призывающия вы и чтущия честную память вашу.

Тропарь, глас 8

Яко светильницы явитеся всесветлии, во отоце окияна моря, преподобнии отцы Зосимо и Савватие: вы бо крест Христов на рамо вземше, усердно Тому последовасте, и чистотою Богови приближившеся, отонудуже силами чудес обогатистеся. Тем и мы любезно притекаем к ракам честных мощей ваших и умильно глаголем: о преподобнии, молите Христа Бога, спастися душам нашим.