Акафист святому преподобному Антонию Римлянину, Новоградскому чудотворцу

Конда́к 1

Избра́нный чудотво́рче и изря́дный уго́дниче Христо́в, ско́рый помо́щниче и моли́твенниче о душа́х на́ших, преподо́бне о́тче Анто́ние, пе́сньми восхваля́ем тя́, засту́пника на́шего. Ты́ же, я́ко име́яй дерзнове́ние ко Го́споду, от вся́ких на́с бе́д свободи́, любо́вию тебе́ зову́щих:

Ра́дуйся, Анто́ние, вели́кий и пресла́вный чудотво́рче.

И́кос 1

Ангельски на земли́ пожи́в, богому́дре Анто́ние, по́двигом до́брым подвиза́лся еси́: кре́ст бо на ра́мена взе́м, Влады́це Христу́ после́довал еси́. Ны́не же предстоя́ престо́лу сла́вы, моли́ся о на́с, почита́ющих тя́ и зову́щих тебе́ си́це:

Ра́дуйся, я́ко чистото́ю и святы́нею а́нгелом уподо́бился еси́; ра́дуйся, я́ко посто́м и бде́нием безстра́стия дости́гл еси́.

Ра́дуйся, свети́льниче Боже́ственнаго све́та; ра́дуйся, моли́тв благово́нное кади́ло.

Ра́дуйся, ве́рных нело́жное утвержде́ние; ра́дуйся, неве́рных богому́дренное обличе́ние.

Ра́дуйся, христиа́н благооти́шное приста́нище; ра́дуйся, благоче́стия стено́ необори́мая.

Ра́дуйся, кре́пкое корми́ло Це́ркве Христо́вы; ра́дуйся, непоколеби́мый сто́лпе Правосла́вия.

Ра́дуйся, апо́стольских преда́ний ве́рный блюсти́телю; ра́дуйся, пра́вил седми́ Вселе́нских собо́ров храни́телю.

Ра́дуйся, Анто́ние, вели́кий и пресла́вный чудотво́рче.

Конда́к 2

Ви́дя Госпо́дь Бо́г тве́рдое жела́ние души́ твоея́ сохрани́тися от врежде́ния ве́ры, о́тче на́ш Анто́ние, я́ко но́ваго Авраа́ма, пресе́льника тя́ сотвори́ в земли́ тебе́ еще́ чужде́й, оба́че по ве́ре уже́ ро́дственней. Те́мже мы́, ра́дости испо́лнени, благодари́м Бо́га, ди́вно прославля́ющаго святы́я Своя́, вопию́ще Ему́: Аллилу́ия.

И́кос 2

Ра́зум просвеще́н свы́ше име́яй, все́м се́рдцем возлюби́л еси́ правосла́вную ве́ру. Не терпя́ ви́дети в це́ркви Ри́мстей смуще́ния, и раздо́ры, и мяте́жи ве́лии, восхоте́в оста́вил еси́ оте́чество и ро́д тво́й. Мы́ же, похваля́юще ре́вность твою́ по ве́ре, о́тче Анто́ние, ра́достно взыва́ем ти́:

Ра́дуйся, преподо́бных вели́ких отце́в после́дователю; ра́дуйся, отступле́ний Ри́мских обличи́телю.

Ра́дуйся, безмо́лвия люби́телю; ра́дуйся, пусты́нный на мо́ри и на су́ши жи́телю.

Ра́дуйся, де́нь и но́щь на ка́мени моли́выйся; ра́дуйся, не име́вый ку́щи, ниже́ покро́ва.

Ра́дуйся, пусты́нным зла́ком пита́выйся; ра́дуйся, по́стников похвало́.

Ра́дуйся, наста́вниче богому́дрия; ра́дуйся, мона́шествующих сла́во.

Ра́дуйся, ско́рый к освобожде́нию от мирски́х сете́й споспе́шниче; ра́дуйся, наде́жный хода́таю на́м Ца́рствия небе́снаго.

Ра́дуйся, Анто́ние, вели́кий и пресла́вный чудотво́рче.

Конда́к 3

Си́ла Вы́шняго восхи́ти тя́ от Ри́ма, богому́дре Анто́ние, на ка́мени, я́ко на ле́гцем корабли́, принесе́ тя́ в зе́млю Ру́сскую, иде́же обре́т ти́хое приста́нище, в пусты́ни всели́лся еси́, неле́ностно порабо́тал Христу́, и во мно́зем долготерпе́нии руководи́л еси́ в Ца́рствие Бо́жие духо́вная ча́да твоя́, научи́в и́х еди́неми усты́ и еди́нем се́рдцем пе́ти Бо́гу: Аллилу́ия.

И́кос 3

Име́яй в се́рдце свое́м о́гнь любве́ Боже́ственныя, богому́дре о́тче, кре́пко подвиза́лся еси́ проти́ву ко́зней диа́вольских, и победи́тельным ору́жием креста́ Госпо́дня разсека́л еси́ се́ти лука́ваго, я́ко паучи́ну. Те́мже мо́лим тя́, о́тче Анто́ние, помози́ и на́м спасе́ние улучи́ти, да с любо́вию зове́м ти́ такова́я:

Ра́дуйся, ра́бе Бо́жий, благíй и ве́рный; ра́дуйся, сосу́де по́лный небе́сныя благода́ти.

Ра́дуйся, я́ко упова́нием Но́ю уподо́бился еси́; ра́дуйся, я́ко подо́бно Илии́ и Елиссе́ю по бе́здне водно́й на ка́мени ше́ствовал еси́.

Ра́дуйся, учи́телю смире́ния и целому́дрия; ра́дуйся, о́бразе кро́тости и послуша́ния.

Ра́дуйся, пропове́дниче чуде́с Христо́выхъ; ра́дуйся, наста́вниче де́л до́брыхъ.

Ра́дуйся, бесо́вских си́л прогна́ние; ра́дуйся, сто́лпе ве́ры и утвержде́ние.

Ра́дуйся, восприя́вший от Христа́ си́лу и прему́дрость; ра́дуйся, вмести́лище Ду́ха Всесвята́го.

Ра́дуйся, Анто́ние, вели́кий и пресла́вный чудотво́рче.

Конда́к 4

Бу́ри морски́х во́лн не убоя́лся еси́, преподо́бне о́тче Анто́ние, бы́в несе́н на ка́мени с ве́твию в руце́ твое́й: не прии́де к тебе́ ни ско́рбь, ниже́ стра́х, ни и́ная печа́ль ка́я, ни а́лчба, ни жа́жда. Но ве́сь у́м в Бо́зе углуби́в, и Того́ во́ли себе́ вда́в, пребы́л еси́ моля́ся Христу́ Бо́гу и Пречи́стей Его́ Ма́тери, и веселя́ся душе́ю, пе́л еси́ с во́и небе́сными: Аллилу́ия.

И́кос 4

Слы́шавше ди́вное твое́ от ю́га к се́веру прехожде́ние, богоно́сне Анто́ние, я́коже бо Авваку́м в Вавило́н, пренесе́н бы́л еси́ си́лою Бо́жиею в Но́вград, я́ко а́нгела во пло́ти разуме́юще тя́, вопие́м ти́ си́це:

Ра́дуйся, дре́вле бы́вшаго Ри́мския Це́ркви правосла́вия осия́ние; ра́дуйся, Нову́граду благода́тное процвете́ние.

Ра́дуйся, свети́льниче многосве́тлый дарова́ний духо́вныхъ; ра́дуйся, но́щи неве́дения и заблужде́ний разгони́телю.

Ра́дуйся, мглу́ страсте́й хотя́щим отгна́ти посо́бниче; ра́дуйся, по вода́м чуде́сно пла́вание соверши́вый и ры́бныя ловцы́ обличи́вый.

Ра́дуйся, по мо́рю пла́вающих до́брый ко́рмчий; ра́дуйся, по реце́ Во́лхове обурева́емых ти́хое приста́нище.

Ра́дуйся, бе́дствующих помо́щниче; ра́дуйся, утопа́ющих избавле́ние.

Ра́дуйся, блужда́ющих ве́рный наста́вниче; ра́дуйся, и́щущих и́ноческаго жития́ прибе́жище и руководи́телю.

Ра́дуйся, Анто́ние, вели́кий и пресла́вный чудотво́рче.

Конда́к 5

Боготе́чную звезду́ мня́ся зре́ти вы́спрь во о́блацех Пречи́стую Влады́чицу на́шу Богоро́дицу, Преве́чнаго Младе́нца на рука́х держа́щую: бы́в ве́сь в ра́дости духо́вней, преподо́бне Анто́ние, небре́гл еси́ о стра́шном посреде́ во́лн морски́х пла́вании, но а́ки вне́ те́ла сы́й, забы́ себе́ услажда́емый виде́нием Цари́цы Небе́сныя, и от Тоя́ луче́ю не́коею Боже́ственною озаря́емь пе́л еси́ Бо́гу: Аллилу́ия.

И́кос 5

Ви́девше тя́, о́тче Анто́ние, Вели́каго Нова́града лю́дие возра́довавшеся ра́достию неизглаго́ланною, нача́ша благогове́йно приходи́ти к тебе́, прося́ще у тебе́ моли́тв и благослове́ния. Ты́ же уве́дев пренесе́нна себе́ во гра́д, цвету́щь правосла́вною ве́рою, подиви́вся всемо́щной си́ле Бо́жией, ка́ко в два́ дни́ и в две́ но́щи толи́кую долготу́ пути́ прейти́ тебе́ устро́и Госпо́дь, возра́довался и возблагодари́л еси́ Его́. Мы́ же, ча́да твоя́, о́крест ра́ки твоея́ предстоя́ще, благодаря́ще Бо́га, любо́вию вопие́м ти́:

Ра́дуйся, я́ко да́ра вели́каго от Бо́га сподо́блен еси́; ра́дуйся, я́ко дре́вним чудесе́м подо́бное на тебе́ соде́яся.

Ра́дуйся, но́вый Илие́, я́ко на ка́мени, а́ки на колесни́це о́гненней, по вода́м ше́ствовал еси́; ра́дуйся, на́ш апо́столе, я́ко на ка́мени, а́ки на о́блацех, несе́н бы́л еси́.

Ра́дуйся, я́ко тобо́ю посети́ и благослови́ Бо́г новопросвеще́нныя лю́ди Нова́града; ра́дуйся, я́ко тобо́ю укрепи́ и́х в правосла́вней ве́ре.

Ра́дуйся, истолкова́телю Ева́нгельскаго уче́ния; ра́дуйся, наста́вниче и на́с, во гресе́х живу́щихъ.

Ра́дуйся, неусы́пный на́ш храни́телю; ра́дуйся, о все́х ве́рный хода́таю.

Ра́дуйся, я́ко твои́м моле́нием от а́да свобожда́емся; ра́дуйся, я́ко твои́м предста́тельством ра́йския жи́зни сподобля́емся.

Ра́дуйся, Анто́ние, вели́кий и пресла́вный чудотво́рче.

Конда́к 6

Слове́с Ева́нгельских, е́же не иска́ти сла́вы от челове́к, ве́рный храни́тель показа́лся еси́, богоблаже́нне Анто́ние, егда́ бо святи́тель Бо́жий Ники́та, уве́дев о тебе́, призва́ к себе́, вопроша́я: «кто́ еси́, отку́ду и ка́ко прише́лъ?» Ты́ ничто́же и́но отвещава́ше, то́чию кла́няяся, глаго́лаше: «прости́ мя́, влады́ко святы́й, гре́шна су́ща челове́ка и стра́нна». Мы́ же, чудя́ся толи́кому смире́нию твоему́, взыва́ем Бо́гу: Аллилу́ия.

И́кос 6

Возсия́в от Ри́мския страны́, о́тче на́ш Анто́ние, просвети́л еси́ чу́дным твои́м житие́м зе́млю Новгоро́дскую, в не́йже оби́тель сотвори́л еси́, и хра́м пречу́ден Бо́жией Ма́тери созда́л еси́. Сего́ ра́ди благодаря́ще Отца́ Небе́снаго, да́вшаго тебе́ толикую благода́ть си́лы Своея́, к тебе́, я́ко к те́плому о на́с моли́твеннику, ра́достная воспева́ем та́ко:

Ра́дуйся, а́нгельское житие́ на́м явля́яй; ра́дуйся, стра́сти грехо́вныя укроща́яй.

Ра́дуйся, о́бразе и́стиннаго смире́ния; ра́дуйся, зерца́ло соверше́ннаго терпе́ния.

Ра́дуйся, наста́вниче вели́кий спасе́нию; ра́дуйся, приводя́й гре́шных ко исправле́нию.

Ра́дуйся, изве́стный исполни́телю за́поведей Христо́выхъ; ра́дуйся, ду́ш немощны́х исцеле́ние.

Ра́дуйся, ми́лостыню твори́ти науча́яй; ра́дуйся, ри́зы и бра́шна неиму́щим подава́ти повелева́яй.

Ра́дуйся, пусты́нниче, мирску́ю че́сть и бога́тство возненави́девый; ра́дуйся, по́стниче, от ю́ности Бо́гу послужи́вый.

Ра́дуйся, Анто́ние, вели́кий и пресла́вный чудотво́рче.

Конда́к 7

Хотя́й избра́н до́м Ду́ху Свято́му себе́ сотвори́ти, потща́лся еси́ те́сным и ско́рбным путе́м, веду́щим в жи́знь ве́чную, взе́м на ра́мо свое́ кре́ст Христо́в, ше́ствовати, е́же благода́тию Бо́жиею от ю́ности твоея́ непоро́чно соверши́в, дости́гл еси́ угото́ваннаго тебе́ небе́снаго воздая́ния, и та́мо благода́рственно пое́ши Бо́гу: Аллилу́ия.

И́кос 7

Но́вый вои́стинну подви́жник яви́лся еси́ в земле́ Россíйстей, о́тче на́ш Анто́ние. Кто́ изочте́т твоя́ по́стническия по́двиги? Кто́ не подиви́тся вели́кому смире́нию твоему́? Кто́ от челове́к возмо́жет святы́ни твоея́ вели́чие пропове́дати? Вои́стинну с небеси́ пе́снь тебе́ мо́жет бы́ти воспева́ема, а не земли́. Мы́ же, любо́вию возбужда́еми, дерза́ем пе́ти тебе́ си́це:

Ра́дуйся, земны́й а́нгеле и небе́сный челове́че; ра́дуйся, во пло́ти пожи́вый духо́вне, на земли́ небе́сне.

Ра́дуйся, вся́кую доброде́тель де́лы свои́ми изобрази́вый; ра́дуйся, душе́вныма очи́ма вы́ну Го́спода созерца́вый.

Ра́дуйся, пред лице́м Бо́жиим, я́ко сы́н пред Отце́м ходи́вый; ра́дуйся, яко во́ин пред воево́дою, гото́вый вся́ повеле́нная твори́ти.

Ра́дуйся, и́го Христо́во возлюби́вый; ра́дуйся, до́бре ста́до и́ночествующих упра́вивый.

Ра́дуйся, ше́ствовавый от си́лы в си́лу; ра́дуйся, Бо́га в Сио́не узре́вый.

Ра́дуйся, еди́наго Го́спода возлюби́вый; ра́дуйся, очеса́ своя́ вы́ну к Нему́ име́вый.

Ра́дуйся, Анто́ние, вели́кий и пресла́вный чудотво́рче.

Конда́к 8

Стра́нное и пресла́вное чу́до явля́ется, богому́дре о́тче Анто́ние: свяще́ннии сосу́ди и сокро́вище, вда́нное тобо́ю морски́м вода́м в Ри́ме, чуде́сно зде́ вручи́ тебе́ Бо́г, на созида́ние хра́ма Пречи́стыя Богоро́дицы и оби́тели, в не́йже мо́лимся и о твое́м хода́тайстве у Христа́ Бо́га на́шего, ве́рно вопию́ще: Аллилу́ия.

И́кос 8

Ве́сь явля́ешися все́м вои́стинну помо́щник, богоно́сне Анто́ние. Ты́ бо при́сно ца́рствуя со Христо́м, и о на́с, гре́шных, моли́твы к Нему́ возсыла́я, не то́чию припа́дающих к цельбоно́сным моще́м твои́м, но и дале́че отстоя́щих, призыва́ющих же всечестно́е и́мя твое́, предста́тельством твои́м соблюда́еши от вся́каго зла́. Те́мже во умиле́нии зове́м ти́:

Ра́дуйся, прибе́жище на́ше во все́х напа́стехъ; ра́дуйся, ско́рый помо́щниче все́х в беда́х су́щихъ.

Ра́дуйся, цели́телю боле́зней душе́вных вку́пе и теле́сныхъ; ра́дуйся, на неви́димыя враги́ на́ша си́льный побо́рниче.

Ра́дуйся, посети́телю в не́мощи лежа́щихъ; ра́дуйся, уте́шителю все́х скорбя́щихъ.

Ра́дуйся, я́ко тобо́ю престае́т рыда́ние; ра́дуйся, я́ко тобо́ю подае́тся ра́дость.

Ра́дуйся, я́ко Христу́ до́блественно после́довал еси́; ра́дуйся, я́ко сладча́йшему Іису́су до конца́ послужи́л еси́.

Ра́дуйся, я́ко наслажда́ешися лицезре́ния Бо́жия; ра́дуйся, я́ко сподо́бился еси́ зре́ти невече́рний де́нь Ца́рствия Его́.

Ра́дуйся, Анто́ние, вели́кий и пресла́вный чудотво́рче.

Конда́к 9

Вся́кия труды́ и ско́рби до́блественно претерпе́л еси́, о́тче Анто́ние, ше́ствуя по пути́ спасе́ния до масти́тыя ста́рости. На земли́ невеще́ственное житие́ показа́л еси́, и во пло́ти а́ки безпло́тен яви́лся еси́, сего́ ра́ди мно́гих чуде́с творе́ния от Го́спода прие́мь, чи́стою и боголюбе́зною душе́ю твое́ю к небе́сным причте́н еси́ си́лам, и ку́пно с ни́ми пое́ши ны́не Всеси́льному Бо́гу: Аллилу́ия.

И́кос 9

Ветíя многовеща́нныя недоуме́ют досто́йно изобрази́ти оби́лия любве́ твоея́, о́тче на́ш Анто́ние, е́юже по вся́ дни́ преиспо́лнен еси́ к ча́дом твои́м о Го́споде: восхоте́в бо и по отше́ствии твое́м, при́сно поуча́ти и́х я́ко живы́й, завеща́л еси́ и́м вся́ потре́бная ко спасе́нию. Сего́ ра́ди из глубины́ серде́ц вопие́м ти́:

Ра́дуйся, благоче́стно тече́ние сконча́вый; ра́дуйся, ве́ру соблюды́й всеце́лу.

Ра́дуйся, ору́жием благоволе́ния Бо́жия венча́нный на земли́; ра́дуйся, венце́м нетле́ния укра́шенный на небеси́.

Ра́дуйся, до́лу вели́чием чуде́с блиста́яй; ра́дуйся, горе́ луча́ми Трисо́лнечнаго Све́та осиява́емый.

Ра́дуйся, я́ко в пресве́тлых ра́йских оби́телех вселя́ешися; ра́дуйся, я́ко лице́м к Лицу́ Боже́ственнаго Све́та причаща́ешися.

Ра́дуйся, я́ко с небе́сных высо́т на мольбы́ на́ша призира́еши; ра́дуйся, я́ко в со́ниях и виде́ниих во бла́го на́м явля́ешися.

Ра́дуйся, я́ко моли́твами твои́ми от ве́чныя сме́рти свобожда́емся; ра́дуйся, я́ко предста́тельством твои́м безконе́чныя жи́зни сподобля́емся.

Ра́дуйся, Анто́ние, вели́кий и пресла́вный чудотво́рче.

Конда́к 10

Спасти́ся хотя́щаго все́м челове́ком и изба́витися от напа́стей, о́тче Анто́ние, ты́ умоли́л еси́ Го́спода и Спаси́теля на́шего, да мимои́дут врази́ от Вели́каго Нова́града и оби́тели твоея́, да не озло́бят поко́ища твоего́ по вся́ дни́, живу́щии же зде́ моли́твами твои́ми просла́вят Всеси́льнаго Бо́га, поюще Ему́: Аллилу́ия.

И́кос 10

Стена́ еси́ ты́ и покро́в все́м челове́ком, к заступле́нию твоему́ прибега́ющим, о́тче Анто́ние. Те́мже и на́м, к тебе́ приходя́щим и прося́щим заступле́ния у Царя́ Небе́снаго, бу́ди стена́ кре́пкая и огражде́ние непреобори́мое, от вся́ких бе́д и напа́стей огражда́я на́с, пою́щих тебе́ си́це:

Ра́дуйся, я́ко мо́щи твоя́ до вре́мене сокры́л еси́ от лицезре́ния; ра́дуйся, я́ко о нетле́нии моще́й твои́х яви́л еси́ благоче́стне и́ноку Ни́фонту.

Ра́дуйся, я́ко моли́твою твое́ю бы́вшия враги́ отгна́л еси́; ра́дуйся, я́ко оби́тель твою́ запусте́нию не пре́дал еси́.

Ра́дуйся, хра́м тобо́ю созда́нный до ны́не сохрани́вый; ра́дуйся, соблюды́й принесе́нную в руце́ твое́й ве́твь и ка́мень, на не́мже приплы́л еси́ чуде́сне.

Ра́дуйся, име́яй пред собо́ю ико́ны, и́мже покланя́лся еси́ в животе́ твое́мъ; ра́дуйся, возвеща́яй ди́вное прише́ствие твое́ я́вленными чудеса́ми.

Ра́дуйся, воспита́вший в оби́тели твое́й мно́гия подража́тели; ра́дуйся, просвети́вый в не́й уче́нием Христо́вым и́щущих све́та.

Ра́дуйся, привлека́яй к себе́ лю́ди избра́нныя; ра́дуйся, обогаща́яй оби́тель твою́ от царе́й и святи́телей.

Ра́дуйся, Анто́ние, вели́кий и пресла́вный чудотво́рче.

Конда́к 11

Пе́ние благода́рственное Христу́ Бо́гу, тя́, о́тче Анто́ние, прославля́юще, правосла́внии прино́сят, я́ко мно́гих чуде́с творе́ц ты́ яви́лся еси́: слепы́я просвеща́я, немощны́я исцеля́я, больны́я врачу́я, бе́сныя от бесо́в свобожда́я, толи́ко си́льне, я́ко и не у́ приведе́нным к тебе́ бы́вшим бе́сным, еще́ на пути́ де́мони от ни́х отбега́ху, и ктому́ не возвраща́хуся, боя́щеся в тебе́ си́лы Бо́жия, ю́же вы́ну в небесе́х прославля́я, вопие́ши Бо́гу: Аллилу́ия.

И́кос 11

Светоза́рное свети́ло, благода́тию Христа́ Бо́га просвеща́ющее Новгоро́дския страны́, зри́м тя́, богому́дре о́тче Анто́ние: с а́нгелы бо предстоя́ престо́лу Бо́жию, ра́дости преве́лия испо́лнен еси́, и Боже́ственными луча́ми Трисо́лнечнаго Све́та осиява́емь, озаря́еши ве́рных, вопию́щих ти́ такова́я:

Ра́дуйся, возше́дый на го́ру превысо́ку доброде́телей Боже́ственныхъ; ра́дуйся, я́ко от тоя́ удо́бь возше́л еси́ на го́ру небе́сную.

Ра́дуйся, я́ко от оби́тели земны́я в оби́тель небе́сную водвори́лся еси́; ра́дуйся, я́ко та́мо предстоя́ Царю́ Небе́сному, о все́х на́с к Нему́ те́пле хода́тайствуеши.

Ра́дуйся, я́ко отше́д от на́с душе́ю, на́м мо́щи твоя́ оста́вил еси́; ра́дуйся, я́ко мо́щи твоя́ исцеля́ют вся́кия ско́рби и боле́зни.

Ра́дуйся, я́ко моще́й твои́х де́мони трепе́щутъ; ра́дуйся, я́ко мо́щи твоя́ кому́ждо в печа́лех быва́ют утеше́ние.

Ра́дуйся, я́ко Го́спода Іису́са о все́х чту́щих па́мять твою́ умилостивля́еши; ра́дуйся, я́ко и Преблагослове́нную Ма́терь Его́ хода́тайствовати о на́с, гре́шных, преклоня́еши.

Ра́дуйся, я́ко Импера́тору на́шему на сопроти́вных побе́ду да́рствуеши; ра́дуйся, я́ко все́м правове́рным вся́кое проше́ние на по́льзу исполня́еши.

Ра́дуйся, Анто́ние, вели́кий и пресла́вный чудотво́рче.

Конда́к 12

Благода́ть свы́ше ти́ да́нную позна́вше, благогове́йно обстоя́ще святу́ю ра́ку твою́, о́тче на́ш Анто́ние, тебе́ на́шего ми́лостиваго отца́ приле́жно про́сим: проле́й ны́не те́плую твою́ моли́тву о на́с, гре́шных, ко Го́споду, я́ко да спасе́т и поми́лует Импера́тора на́шего [и́мярекъ] и ве́сь Августе́йший До́м Его́, ца́рство Его́ да разшири́т и укрепи́т, Це́рковь Свою́ святу́ю от ра́спрей и раско́лов незы́блему сохрани́т, и вся́ правосла́вныя христиа́ны в ми́ре и благоде́нствии соблюде́тъ. Чесого́ твои́ми моли́твами ожида́юще от Царя́ Небе́снаго, вопие́м Ему́: Аллилу́ия.

И́кос 12

Пою́ще твое́ к Бо́гу отше́ствие, преподо́бне о́тче Анто́ние, почита́ем свяще́нную па́мять твою́, велича́ем ре́вность по ве́ре, хва́лим долготерпе́ние, сла́вим незло́бие и ублажа́ем кончи́ну твою́: на сме́ртном бо одре́ возлежа́, жела́нием возжела́л еси́ облещи́ся в вели́кий а́нгельский о́браз и с а́нгелами ны́не лику́еши. Те́мже моля́щеся усе́рдно, о е́же сподо́битися и на́м неосужде́нно предста́ти на стра́шное суди́ще Христо́во, взыва́ем ти́:

Ра́дуйся, у престо́ла Бо́жия те́плый о на́с предста́телю; ра́дуйся, просла́вивый Бо́га в телеси́ и в душе́ свое́й.

Ра́дуйся, добропобе́дный во́ине Царя́ Небе́снаго; ра́дуйся, вождю́ прему́дрый ра́тующих проти́ву си́л а́довыхъ.

Ра́дуйся, я́ко с горя́щим свети́льником возше́л еси́ в ра́дость Христа́; ра́дуйся, я́ко от Него́ благода́ть исцеле́ний прия́л еси́.

Ра́дуйся, я́ко благоволе́нием Пресвяты́я Богоро́дицы возвели́чен еси́; ра́дуйся, я́ко во све́тлостех святы́х пребыва́еши.

Ра́дуйся, я́ко с проро́ки и а́нгелы ликовству́еши; ра́дуйся, я́ко со святи́тели и му́ченики просла́влен еси́.

Ра́дуйся, я́ко с преподо́бными и пра́ведными весели́шися; ра́дуйся, я́ко со все́ми избра́нными Бо́жиими при́сно торжеству́еши.

Ра́дуйся, Анто́ние, вели́кий и пресла́вный чудотво́рче.

Конда́к 13

О, вели́кий и пречу́дный преподо́бне о́тче на́ш Анто́ние! Приими́ сие́ ма́лое моле́ние на́ше, и благоприя́тным твои́м хода́тайством умоли́ ми́лостиваго Бо́га, да сохрани́т Импера́тора и все́ во́инство, да умудри́т па́стырей Правосла́вныя Це́ркви, да изба́вит все́х на́с от враго́в ви́димых и неви́димых, от вся́кия напа́сти и ско́рби, от напра́сныя сме́рти и бу́дущия му́ки, да сподо́бит с тобо́ю и со все́ми святы́ми во ве́ки воспева́ти Бо́гу, Спаси́телю на́шему: Аллилу́ия.

[Се́й конда́к глаго́лется три́жды.][Далее повторяем 1‑е икос и кондак:]

И́кос 1

Ангельски на земли́ пожи́в, богому́дре Анто́ние, по́двигом до́брым подвиза́лся еси́: кре́ст бо на ра́мена взе́м, Влады́це Христу́ после́довал еси́. Ны́не же предстоя́ престо́лу сла́вы, моли́ся о на́с, почита́ющих тя́ и зову́щих тебе́ си́це:

Ра́дуйся, я́ко чистото́ю и святы́нею а́нгелом уподо́бился еси́; ра́дуйся, я́ко посто́м и бде́нием безстра́стия дости́гл еси́.

Ра́дуйся, свети́льниче Боже́ственнаго све́та; ра́дуйся, моли́тв благово́нное кади́ло.

Ра́дуйся, ве́рных нело́жное утвержде́ние; ра́дуйся, неве́рных богому́дренное обличе́ние.

Ра́дуйся, христиа́н благооти́шное приста́нище; ра́дуйся, благоче́стия стено́ необори́мая.

Ра́дуйся, кре́пкое корми́ло Це́ркве Христо́вы; ра́дуйся, непоколеби́мый сто́лпе Правосла́вия.

Ра́дуйся, апо́стольских преда́ний ве́рный блюсти́телю; ра́дуйся, пра́вил седми́ Вселе́нских собо́ров храни́телю.

Ра́дуйся, Анто́ние, вели́кий и пресла́вный чудотво́рче.

Конда́к 1

Избра́нный чудотво́рче и изря́дный уго́дниче Христо́в, ско́рый помо́щниче и моли́твенниче о душа́х на́ших, преподо́бне о́тче Анто́ние, пе́сньми восхваля́ем тя́, засту́пника на́шего. Ты́ же, я́ко име́яй дерзнове́ние ко Го́споду, от вся́ких на́с бе́д свободи́, любо́вию тебе́ зову́щих:

Ра́дуйся, Анто́ние, вели́кий и пресла́вный чудотво́рче.

Моли́тва преподо́бному Анто́нию Ри́млянину

Па́стырю предо́брый и наста́вниче на́ш, преподо́бне о́тче Анто́ние! Ты́ бо во пло́ти еще́ сы́й, Боже́ственным манове́нием управля́емь, ве́тхий Ри́м, оте́чество твое́, и ро́д тво́й оста́вил еси́, и отту́ду чуде́сным по вода́м на ка́мени, я́ко на ле́гцем корабли́, прише́ствием твои́м се́мо освяти́л еси́ гра́д се́й, и в не́м хра́м Бо́жией Ма́тери воздви́гл еси́, труды́ же и по́двиги твои́ми просвети́л еси́ оби́тель сию́, (ея́же и основа́ние тобо́ю бы́сть,) умно́жил еси́ в не́й ча́да твоя́, о́бразом до́брых де́л и уче́нием наставля́яй и́х: те́м и нетле́нием моще́й твои́х и чуде́с сия́нием просла́ви тя́ Бо́г, Ему́же безпло́тен со безпло́тными предстоя́ ра́дуешися, и, ра́дуяся, о притека́ющих к чудотво́рней ра́це твое́й, и мо́щи твоя́ усты́ и се́рдцем лобыза́ющих мо́лишися. Ты́ и ны́не, я́ко име́яй дерзнове́ние ко Влады́це Христу́, бу́ди моли́твенник и хода́тай о предстоя́щих си́х рабе́х твои́х, честны́м твои́м моще́м кла́няющихся, и прося́щих от тебе́ ми́лостиваго заступле́ния. Ей, мо́лим тя́, слуго́ Христо́в и уго́дниче, главы́ и сердца́ на́ша преклоня́юще тебе́, не пре́зри убо́гаго сего́ моле́ния на́шего, но при́зри на ны́ ми́лостивно, коего́ждо потре́бу исполня́я: боля́щим здра́вие, путеше́ствующим в пути́ благопоспе́шество, пла́вающим ско́рое и безбе́дное пла́вание да́руя; оби́тель же сию́ от вся́ких бе́д, внеза́пно находя́щих, сохрани́, и в не́й живу́щих и тружда́ющихся, ку́пно же и и́м благоде́ющих, от вся́ких напа́стей свободи́; да вси́ твои́ми моли́твами на земли́ богоуго́дно поживе́м, и небе́снаго Ца́рствия насле́дники бу́дем, досто́йны славосло́вити Всесвяту́ю Тро́ицу, Отца́ и Сы́на и Свята́го Ду́ха, в безконе́чныя ве́ки. Ами́нь.