Акафист святителю Дионисию, архиепископу Суздальскому

Текст акафиста утвержден для употребления за богослужением и в домашней молитве на заседании Священного Синода 24 августа 2023 года (журнал № 68).

Кондак 1

Возбра́нный чудотво́рче и преди́вный иера́рше, вели́кий уго́дниче Христо́в, святи́телю о́тче Диони́сие, гра́ду и стране́ на́шей источа́яй щедро́ты и ми́лости, восхваля́ем тя с любо́вию, ча́да твоя́, ты же, я́ко име́я дерзнове́ние ко Го́споду, от вся́ких нас бед свободи́, да зове́м ти: Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Икос 1

А́нгелов Творе́ц и всея́ тва́ри Созда́тель яви́ тя Це́ркви Свое́й святи́теля и учи́теля и засту́пника Руси́ Святы́я, иму́щаго к Нему́ дерзнове́ние моли́тися об избавле́нии нас от вся́ких зол, бед и скорбе́й. Мы же ве́рнии научи́шася пе́ти тебе́ си́це:

Ра́дуйся, сыно́внею любо́вию ко Го́споду се́рдце испо́лнивый;

ра́дуйся, соверше́нну любо́вь ко Христу́ показа́вый.

Ра́дуйся, тала́нт от Бо́га ти да́нный в земли́ не сокры́вый;

ра́дуйся, на спасе́ние душ людски́х его́ употреби́вый.

Ра́дуйся, духо́вныма очи́ма вы́ну Го́спода созерца́вый;

ра́дуйся, крест на ра́мена взя́вый и Христу́ после́довавый.

Ра́дуйся, мзду на небесе́х от Бо́га восприя́вый;

ра́дуйся, моли́твы и пе́ния к тебе́ взыва́ющих не презрева́яй.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 2

Ви́дяще, я́ко даро́вана тебе́ бысть от Го́спода, преподо́бне о́тче наш Диони́сие, благода́ть подава́ти ско́рое вспоможе́ние и утеше́ние всем, с ве́рою к тебе́ приходя́щим, и иму́ще тя такова́го ми́лостиваго и ско́раго помо́щника, прославля́ем всеси́льнаго Бо́га, пою́ще Ему́: Аллилу́иа.

Икос 2

Ра́зум богому́дрый стяжа́в и помышля́я о небе́снем, преподо́бне о́тче Диони́сие, усмотре́л еси́ суету́ ми́ра сего́ и жития́ по́стнического взыска́в, потща́лся еси́ те́сным и приско́рбным путе́м тече́ние жи́зни сея́ соверши́ти. Мы же любо́вию побежда́еми, вопие́м тебе́ си́це:

Ра́дуйся, виногра́да Христо́ва неувяда́емая розго́;

ра́дуйся, цвето́в смире́ния прекра́сное село́.

Ра́дуйся, мона́шествующих преди́вная похвало́;

ра́дуйся, по́стников путеводи́тельная звездо́.

Ра́дуйся, и́ноков пресве́тлая красото́;

ра́дуйся, святи́телей пресла́вная высото́.

Ра́дуйся, еле́я прему́дрости неугаси́мая лампа́до;

ра́дуйся, ве́ры благочести́выя пра́вило.

ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 3

Смире́нием, и посто́м, и непреста́нною моли́твою на стра́сти плотски́я кре́пко ополчи́вся, святи́телю Диони́сие, плоть твою́ ду́хови поработи́л еси́, сего́ ра́ди ны́не предстои́ши с ли́ки А́нгел Престо́лу Пресвяты́я Тро́ицы, вы́ну поя́: Аллилу́иа.

Икос 3

В пусты́ни, в ню́же всели́лся еси́, преподо́бне о́тче Диони́сие, оби́тель устро́ися Бо́жиим произволе́нием, в не́йже в преподо́бии и пра́вде де́нно и но́щно Бо́гу рабо́тал еси́. Мы же, прославля́юще Го́спода Бо́га, вопие́м ти:

Ра́дуйся, на брега́х Во́лги оби́тель чу́дную основа́вый;

ра́дуйся, мно́жество и́ноков в ней собра́вый.

Ра́дуйся, преподо́бных Евфи́мия и Мака́рия ду́ховно возрасти́вый;

ра́дуйся, о́браз мона́шескаго жития́ им показа́вый.

Ра́дуйся, двана́десять и́ноков на про́поведь Ева́нгелия посла́вый;

ра́дуйся, во страны́ и гра́ды ве́рхния их напра́вивый.

Ра́дуйся, княги́ню Васили́ссу во а́нгельский о́браз облеки́й;

ра́дуйся, уста́ву и́ноческаго общежи́тия ю наста́вивый.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 4

Боготе́чная звезда́ всей стране́ яви́лся еси́, преподо́бне о́тче Диони́сие, всем быв о́браз сло́вом, житие́м и любо́вию, ду́хом, ве́рою и чистото́ю, те́мже и мы, ви́дяще доброде́тели твоя́, воспева́ем Бо́гу: Аллилу́иа.

Икос 4

Возсия́в в тебе́ оби́льно благода́ть Бо́жия, святи́телю о́тче Диони́сие, яви́ тя свети́льника земли́ Ру́сской: пребыва́я игу́меном оби́тели Пече́рския, о слове́сных овца́х, тебе́ Бо́гом вруче́нных, де́нно и но́щно име́л еси́ попече́ние. Мы же взира́юще на преподо́бническия труды́ твоя́, вопие́м ти:

Ра́дуйся, дре́вних отце́в неле́ностный подража́телю;

ра́дуйся, печа́льми обурева́емых смире́нный уте́шителю.

Ра́дуйся, скорбя́щих ско́рый услы́шателю;

ра́дуйся, ран серде́чных ми́лостивый цели́телю.

Ра́дуйся, благочи́ния монасты́рскаго прему́дрый устрои́телю;

ра́дуйся, бра́тии сострада́тельный и терпели́вый учи́телю.

Ра́дуйся, стропо́тных и неради́вых стро́гий обличи́телю;

ра́дуйся, о ка́ющихся пред Бо́гом до́брый предста́телю.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 5

Ви́дя тя вои́стинну, о́тче Диони́сие, подви́жника кре́пкаго и моли́твенника неусы́пнаго, святи́тель Алекси́й возведе́ тя в сан епи́скопский, гра́ду Су́ждалю и Нову́граду Ни́жнему архипа́стыря поста́ви, мы же мы́сленно взира́юще на досточу́дныя твоя́ по́двиги и труды́, избра́вшему тя Бо́гу вопие́м: Аллилу́иа.

Икос 5

Ви́дя Человеколю́бец Госпо́дь твое́ доброде́тельное житие́, изведе́ тя из оби́тели пусты́нныя на ка́федру святи́тельскую, я́ко на све́щник, да не сокры́т бу́дет свети́льник под спу́дом и да просла́вят Отца́ Небе́снаго вси челове́цы. Мы же, чтя труды́ твоя́, умиле́нно вопие́м ти:

Ра́дуйся, и́стины Христо́вы ре́вностный испове́дниче;

ра́дуйся, от е́реси́ стриго́льников му́жественный защи́тниче.

Ра́дуйся, и́ноческаго общежи́тия наста́вниче;

ра́дуйся, пасо́мых ове́ц му́дрый нача́льниче.

Ра́дуйся, сло́ва Бо́жия усе́рдный пропове́дниче;

ра́дуйся, пра́вил церко́вных непреодоли́мый побо́рниче.

Ра́дуйся, преподо́бному Се́ргию спо́стниче и собесе́дниче;

ра́дуйся, взыва́ющих пред Бо́гом наде́жный засту́пниче.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 6

Илиино́ю ре́вностию распала́яся, непра́во ходя́щим противоста́л еси́, ника́коже соизволя́я недосто́йнаго на престо́л митрополи́чий поста́вити и нече́стно да́ти во́лка в па́стыря овца́м, благоче́стно Христа́ сла́вящим, пою́щим Ему́: Аллилу́иа.

Икос 6

Во град первопресто́льный на собо́р при́зван был еси́ и та́мо еди́н среди́ епи́скопов кня́жескому повеле́нию противоста́л еси́, честь митропо́лии Ки́евския оберега́я, проти́ву ста́вленика кня́зя возстава́я и на ка́федру первосвяти́тельскую взы́ти ему́ возбраня́я. Мы же ви́дяще ре́вность твою́, взыва́ем ти:

Ра́дуйся, я́ко дре́вним кано́ном ре́вностный исполни́тель был еси́;

ра́дуйся, я́ко самостоя́ние митропо́лии ре́вностно оберега́л еси́.

Ра́дуйся, я́ко му́дростию слове́с твои́х кня́зя обличи́л еси́;

ра́дуйся, я́ко мудрова́ние челове́ческое в Це́рковь не допусти́л еси́.

Ра́дуйся, я́ко от гне́ва кня́зева не устраше́н пребы́л еси́;

ра́дуйся, я́ко еди́н тому́ бесстра́шно противоста́л еси́.

Ра́дуйся, я́ко ре́вность в послуша́нии Це́ркви показа́л еси́;

ра́дуйся, я́ко худа́го наме́рения диа́воля посрами́тель был еси́.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 7

Днесь восхва́лим вси вели́каго святи́теля Диони́сия, и почти́м засту́пника и утвержде́ние земли́ Ру́сския, кра́я Су́ждальскаго храни́теля, Пско́ва и Нова́града от лжеуче́ния огради́теля, е́реси стриго́льников ре́вностнаго искорени́теля, и та́ко возопии́м Бо́гу: Аллилу́иа.

Икос 7

Слы́ша премно́гую твою́ доброде́тель, ви́дя тя иску́сна толкова́теля Свяще́ннаго Писа́ния, и Преда́ния приле́жна храни́теля, посла́ тя Патриа́рх Нил бы́ти е́реси́ стриго́льников искорени́теля, мы же дивя́щеся явле́нней в тебе́ си́ле Бо́жией, благода́рне вопие́м:

Ра́дуйся, Пско́ва и Нова́града от лжеуче́ния защи́тителю;

ра́дуйся, е́реси́ стриго́льников неустраши́мый искорени́телю.

Ра́дуйся, о непреста́нных труде́х святи́тельских рачи́телю;

ра́дуйся, па́ствы Христо́вы до́брый от е́реси́ храни́телю.

Ра́дуйся, нелицеприе́мный и́стины ревни́телю;

ра́дуйся, в подвизе учительства неутомимый служителю.

Ра́дуйся, богоху́льных и нечести́вых уст загради́телю;

ра́дуйся, в лжеиме́нном мудрова́нии ка́ющихся учи́телю.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 8

Ви́дя Госпо́дь твое́ доброде́тельное житие́, любо́вь к Писа́нию и Свяще́нному Преда́нию, апо́стольскую ре́вность о Христе́, моли́твы мно́гия, пост нелицеме́рный и ми́лостыню всеще́друю, любо́вь к бли́жним всесоверше́нную, возвы́си тя я́ко кедр лива́нский. Мы же сла́ву твою́ зря́ще пое́м Бо́гу: Аллилу́иа.

Икос 8

Ви́дя тя Патриа́рх гра́да Константи́ня ко Свяще́нному Писа́нию приле́жна, трудо́в поста́, моли́твы и ми́лостыни исполни́теля, возложи́ креща́тыя ри́зы на тя и возведе́ в сан архиепи́скопский. Мы же, дивя́щеся житию́ твоему́, умиле́нно вопие́м ти:

Ра́дуйся, на скрижа́лех се́рдца своего́ Зако́н Бо́жий начерта́вый;

ра́дуйся, те́плыми слеза́ми житие́ свое́ украси́вый.

Ра́дуйся, ми́лостынями Бо́гу угоди́вый;

ра́дуйся, пост нелицеме́рный стяжа́вый.

Ра́дуйся, моли́твы непреста́нныя от Бо́га удосто́ивыйся;

ра́дуйся, в Писа́нии Свяще́ннем иску́сен позна́выйся.

Ра́дуйся, свои́м бде́нием А́нгелом уподо́бивыйся;

ра́дуйся, благ мно́гих от Бо́га сподо́бивыйся.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 9

Пропове́дник Христо́ва уче́ния не сло́вом то́чию, но и де́лом яви́лся еси́, святи́телю о́тче Диони́сие, я́ко па́стырь до́брый ду́шу твою́ полага́я за о́вцы Христо́вы и всех с любо́вию наставля́я ко спасе́нию, всем о́браз жития́ по Бо́зе подава́я и поуча́я взыва́ти при́сно Бо́гу: Аллилу́иа.

Икос 9

Егда́ па́стырски подвиза́лся еси́, святи́телю Диони́сие, о просвеще́нии ве́рою Христо́вою люде́й су́ждальских и нижегоро́дских, благода́ть Госпо́дня излия́ся во мно́гих де́лех твои́х, приводя́щи о́вцы заблу́дшия к позна́нию Христо́ву. Мы же, помина́юще труды́ и по́двиги твоя́, зове́м ти:

Ра́дуйся, по́вести временны́х лет списа́нию благоволи́вый;

ра́дуйся, на писа́ние ле́тописи и́нока Лавре́нтия благослови́вый.

Ра́дуйся, ико́ны Бо́жия Ма́тери Одиги́трии списа́ти наказа́вый;

ра́дуйся, и́хже в Су́здаль и Ни́жний Новгра́д доста́вити повеле́вый.

Ра́дуйся, киво́т со Страстьми́ Христо́выми от Царягра́да принести́ изво́ливый;

ра́дуйся, и́мже зе́млю ни́жегоро́дскую духо́вно украси́вый.

Ра́дуйся, Малахи́ю Фило́софа для просвеще́ния на Русь напра́вивый;

ра́дуйся, тьму суему́дрия стриго́льническаго изобличи́вый.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 10

Правосла́вныя кано́ны утвержда́я, прибы́л еси́ в Царьгра́д со святы́м Фео́дором, и та́мо всех свои́ми доброде́тельми удиви́л еси́, те́мже патриа́рх Нил тя на митропо́лию Ру́сскую поста́ви. Мы же о тебе́ Бо́га прославля́я, пое́м: Аллилу́иа.

Икос 10

От Константи́ня гра́да изше́д, вели́каго Ки́ева вско́ре дости́гл еси́, и от кня́зя та́мо заточе́ние смире́нно прие́м, в темни́це святу́ю ду́шу свою́ че́стно Го́сподеви пре́дал еси́. Мы же на терпе́ние твое́ взира́юще и тем просвеща́еми, дерза́ем глаго́лати си́це:

Ра́дуйся, я́ко тя Патриа́рх Нил митрополи́том на Русь поста́ви;

ра́дуйся, я́ко са́на первосвяти́тельскаго удосто́ился еси́.

Ра́дуйся, я́ко от кня́зя заточе́ние претерпе́л еси́;

ра́дуйся, я́ко вся ско́рби благоду́шно прия́л еси́.

Ра́дуйся, я́ко ми́рно и ра́достно час сме́ртный сре́тил еси́;

ра́дуйся, я́ко ду́шу твою́ во смире́нии пре́дал еси́.

Ра́дуйся, я́ко в пече́рах ки́евских погребе́н был еси́;

ра́дуйся, я́ко и по сме́рти твое́й нас не оста́вил еси́.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 11

Благода́ть от Бо́га стяжа́вшаго, ди́внаго во святы́х Диони́сия почти́м се́рдцем и усты́, глаго́люще: кто исчи́слит твоя́ труды́, моли́твы и посты́, о святи́телю? Потщи́мся у́бо ему́ всеусе́рдно подража́ти и благоприя́тно Бо́гу вопия́ти: Аллилу́иа.

Икос 11

Светопода́тельными луча́ми блиста́ет житие́ твое́, святи́телю о́тче Диони́сие, ты бо, ева́нгельския за́поведи исполня́я, крест на ра́мех свои́х во след Христу́ безро́потно поне́сл еси́, те́мже глаго́лем ти:

Ра́дуйся, Пресвяты́я Тро́ицы ве́рный служи́телю;

ра́дуйся, Ма́тере Бо́жия усе́рдный почита́телю.

Ра́дуйся, А́нгелов Бо́жиих сослужи́телю;

ра́дуйся, проро́ков святы́х соревни́телю.

Ра́дуйся, апо́столов Госпо́дних подража́телю;

ра́дуйся, му́чеников Христо́вых сострада́телю.

Ра́дуйся, святи́телей ре́вностных равностоя́телю;

ра́дуйся, преподо́бных отце́в сопредста́телю.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 12

Благода́ть, да́нную ти от Бо́га, ве́дуще, притека́ем к твоему́ заступле́нию, святи́телю о́тче Диони́сие, усе́рдно моля́ще тя: не оста́ви нас, чад твои́х, в святы́х твои́х моли́твах, да и мы по сконча́нии на́шего земна́го жи́тельства с тобо́ю воспое́м Бо́гу: Аллилу́иа.

Икос 12

Светоприе́мный свети́льник и́стиннаго све́та су́щим на земли́ явля́ешися, святи́телю Диони́сие, просвеща́еши бо ве́рных сердца́ и к ра́зуму Боже́ственному вся наставля́еши, те́мже ра́достно взыва́ем тебе́:

Ра́дуйся, свеще́ светоза́рная, Це́рковь озаря́ющая;

ра́дуйся, звездо́, зе́млю Ру́сскую просвеща́ющая.

Ра́дуйся, заре́, мрак страсте́й и грехо́в разгоня́ющая;

ра́дуйся, мо́лние, ерети́чествующих устраша́ющая.

Ра́дуйся, луче́, в и́ночестве подвиза́ющихся укрепля́ющая;

ра́дуйся, све́те, в по́двизех благоче́стия наставля́ющий.

Ра́дуйся, свети́льниче, Ни́жегоро́дский удел просветля́ющий;

ра́дуйся, свети́ло, Су́ждальский край освеща́ющее.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 13

О преди́вный и пресла́вный, святи́телю о́тче Диони́сие, приими́ от нас недосто́йных хвале́бное пе́ние сие́, проле́й о нас твоя́ те́плыя моли́твы и умоли́ Человеколю́бца Го́спода, да не погу́бит нас со беззако́ньми на́шими, но обрати́т к покая́нию и исправле́нию, да про́чее вре́мя жития́ на́шего земна́го не в рабо́те греху́ и страсте́м, но в де́лании за́поведей Его́ святы́х благоче́стно провожда́ем, вопию́ще Бо́гу: Аллилу́иа.

[Се́й конда́к глаго́лется три́жды.][Далее повторяем 1‑е икос и кондак:]

Икос 1

А́нгелов Творе́ц и всея́ тва́ри Созда́тель яви́ тя Це́ркви Свое́й святи́теля и учи́теля и засту́пника Руси́ Святы́я, иму́щаго к Нему́ дерзнове́ние моли́тися об избавле́нии нас от вся́ких зол, бед и скорбе́й. Мы же ве́рнии научи́шася пе́ти тебе́ си́це:

Ра́дуйся, сыно́внею любо́вию ко Го́споду се́рдце испо́лнивый;

ра́дуйся, соверше́нну любо́вь ко Христу́ показа́вый.

Ра́дуйся, тала́нт от Бо́га ти да́нный в земли́ не сокры́вый;

ра́дуйся, на спасе́ние душ людски́х его́ употреби́вый.

Ра́дуйся, духо́вныма очи́ма вы́ну Го́спода созерца́вый;

ра́дуйся, крест на ра́мена взя́вый и Христу́ после́довавый.

Ра́дуйся, мзду на небесе́х от Бо́га восприя́вый;

ра́дуйся, моли́твы и пе́ния к тебе́ взыва́ющих не презрева́яй.

Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Кондак 1

Возбра́нный чудотво́рче и преди́вный иера́рше, вели́кий уго́дниче Христо́в, святи́телю о́тче Диони́сие, гра́ду и стране́ на́шей источа́яй щедро́ты и ми́лости, восхваля́ем тя с любо́вию, ча́да твоя́, ты же, я́ко име́я дерзнове́ние ко Го́споду, от вся́ких нас бед свободи́, да зове́м ти: Ра́дуйся, святи́телю о́тче Диони́сие, земли́ Ру́сския пресве́тлое украше́ние.

Молитва

О святи́телю о́тче Диони́сие, ты ве́си не́мощь естества́ на́шего и скорбь време́н настоя́щих, не пре́зри и не посрами́ упова́ния на́шего, но бу́ди о нас предста́тель немо́лчный к Бо́гу, да сохрани́т нас от мирски́х искуше́ний, от диа́вольских сете́й и от плотски́х по́хотей, да да́рует нам в духо́вных бра́нех терпе́ние неосла́бное. В час же сме́ртный яви́ся нам, о́тче, засту́пник необори́мый, ускори́ тогда́ на моли́тву о нас, безпо́мощных, и помози́ нам ми́рную и благу́ю кончи́ну улучи́ти, гро́зная мыта́рства возду́шная без препя́тия мину́ти и в Небе́сный Го́рний Иерусали́м вни́ти. О всеблаже́нне о́тче наш Диони́сие, сподо́би ны после́довати, по си́ле на́шей, свято́му твоему́ житию́, я́ко да всеми́лостивым предста́тельством Преблагослове́нныя Влады́чицы на́шея Богоро́дицы и Присноде́вы Мари́и и твои́ми святы́ми моли́твами сподо́бит нас Преблаги́й Христо́с Бог наш насле́дники бы́ти Ца́рствия Своего́ Небе́снаго, сла́вящия и велича́ющия Его́ ку́пно со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.