Акафист священномученику Киприану и святой мученице Иустине

Текст акафиста утвержден для употребления за богослужением и в домашней молитве на заседании Священного Синода 24 июля 2025 года (журнал № 70).

Акафист написан архимандритом Феоклитом (Дзафой; 1948 – 2009), напечатан в 2000 году; перевод с греч. Олега Алексеевича Родионова

Кондак 1

И́же от пре́лести я́ко звезду́ возсия́вша, Киприа́на богоявле́ннаго почти́м, с ним и Иусти́ну блаже́нную. Той у́бо яви́ся святи́тель боже́ственнейший, сия́ же неве́ста Спа́сова бысть. К сим возглаго́лем: ра́дуйтеся, Киприа́не со Иусти́ною, Христо́вы страстоте́рпцы.

Икос 1

А́нгел в житии́, присту́пль ко Го́споду, му́дре Киприа́не, яви́лся еси́, и хра́брствовав страда́льчески, Небе́сных по́честей сподо́бился еси́; те́мже, твое́й све́тлости дивя́щеся, возопии́м:

Ра́дуйся, и́мже Христо́с возсиява́ет; ра́дуйся, его́же ра́ди враг воздыха́ет.

Ра́дуйся, пре́лестию па́дших возставле́ние; ра́дуйся, уче́ний те́мных отверже́ние.

Ра́дуйся, высото́ ве́дения истоща́ния Христо́ва; ра́дуйся, глубино́ вся́кия благода́ти жития́ ева́нгельскаго.

Ра́дуйся, я́ко позна́л еси́ вра́жее прельще́ние; ра́дуйся, я́ко уве́дел еси́ любо́вь Бо́жию.

Ра́дуйся, звездо́ боже́ственныя бла́гости; ра́дуйся, свети́льниче вы́шния све́тлости.

Ра́дуйся, и́мже Христо́с просла́вися; ра́дуйся, и́мже враг уязви́ся.

Ра́дуйся, блаже́нне Киприа́не, Христо́в страстоте́рпче.

Кондак 2

О́ко души́ твоея́ отве́рзл еси́, я́ко остроу́мен, и узре́л и уразуме́л еси́, богому́дре Киприа́не, ди́вный я́ко вои́стину свет И́же к ве́дению тя и́стинному призва́вшаго Христа́ Вседержи́теля, Ему́же вопия́л еси́: Аллилу́иа.

Икос 2

Ра́зумом и́стины озари́вшися, богому́драя, су́етных и ло́жных отрекла́ся, и де́ва яви́лася еси́ избра́нная, Иусти́но, Христа́ возлюби́вши; те́мже тя ублажа́юще, возопии́м ти сицева́я:

Ра́дуйся, цве́те де́вства; ра́дуйся, кри́не благоче́стия.

Ра́дуйся, мирополо́жнице нра́вов чистоты́; ра́дуйся, сочета́ние вся́кия че́стности.

Ра́дуйся, сосу́де многоче́стный благоуха́ния та́инственнаго; ра́дуйся, арома́те Небе́сный ве́яния Боже́ственнаго.

Ра́дуйся, я́ко от ми́ра всеобра́зне отступи́ла еси́; ра́дуйся, я́ко Сло́ву мы́сленно уневе́стилася еси́.

Ра́дуйся, Христо́вы любве́ сокро́вище; ра́дуйся, све́та невеще́ственнаго водворе́ние.

Ра́дуйся, тле́нных всех презри́тельнице; ра́дуйся, до́брых нетле́нных приобще́ние.

Ра́дуйся, сла́вная Иусти́но, Христо́ва страстоте́рпице.

Кондак 3

Си́лу с Небесе́ прие́мши, богому́драя, отве́ргла еси́ вра́жие неи́стовство, и е́же на тебе́ стремле́ние того́, я́ко де́тския разруши́ла еси́ безде́лицы, Иусти́но всехва́льная, к Укре́пльшему тебе́ вопию́щи: Аллилу́иа.

Икос 3

Соже́гл еси́ дерзнове́нием, я́ко вещество́ поги́бельное, скрижа́ли волшебства́ зле́йшаго, Киприа́не, и прия́л еси́ внутрь души́ Уте́шителево осия́ние, и́мже я́ко свет просия́л еси́, освеща́я вопию́щия:

Ра́дуйся, пре́лести разруши́телю; ра́дуйся, льсти потреби́телю.

Ра́дуйся, позна́вый не́мощь вра́жию; ра́дуйся, обогати́выйся Христо́вым благоволе́нием.

Ра́дуйся, по́двиг преслову́щий измене́ния честна́го; ра́дуйся, бога́тство многоразли́чное ве́дения Боже́ственнаго.

Ра́дуйся, я́ко испо́лнился еси́ просве́щения Небе́снаго; ра́дуйся, я́ко возне́слся еси́ над прича́стием земно́му.

Ра́дуйся, страсте́й умертви́вый стремле́ние; ра́дуйся, души́ оживи́вый мудрова́ние.

Ра́дуйся, Христо́ву нищету́ возлюби́вый; ра́дуйся, тщесла́вия удали́выйся.

Ра́дуйся, блаже́нне Киприа́не, Христо́в страстоте́рпче.

Кондак 4

Ре́вность к ху́ждшему преложи́в, о́тче, в жела́ние и стремле́ние к Боже́ственным, ревни́тель яви́лся еси́ апо́столом, я́ко в прему́дрости вели́к и сла́вен; прему́дро бо подчини́лся еси́, Киприа́не, Ему́же и вопия́л еси́: Аллилу́иа.

Икос 4

Вознесла́ся еси́ к Боже́ственней высоте́, во Христе́ свя́зана бы́вши с Киприа́ном всеблаже́ннейшим; и жи́тельство превожда́ла еси́ честно́е, Це́ркви служа́щи, всечестна́я. Те́мже, Иусти́но, тя чту́ще возопии́м си́це:

Ра́дуйся, де́во блаже́нная; ра́дуйся, благода́ти де́лание.

Ра́дуйся, Христа́ от се́рдца возжеле́вшая; ра́дуйся, врага́ прельще́ние возненави́девшая.

Ра́дуйся, жития́ чи́стаго нескве́рный о́бразе; ра́дуйся, о́бразе одушевле́нный дев честны́х.

Ра́дуйся, я́ко разруша́еши стремле́ние льсти́ваго; ра́дуйся, я́ко явля́еши кре́пость Госпо́дню.

Ра́дуйся, а́гнице Христо́ва доброде́вственная; ра́дуйся, до́брая во всех и безукори́зненная.

Ра́дуйся, е́юже зло́ба отвраща́ется; ра́дуйся, е́юже велиа́р умерщвля́ется.

Ра́дуйся, сла́вная Иусти́но, Христо́ва страстоте́рпице.

Кондак 5

Богоприя́тным се́рдцем и любо́вию соверше́нною Христу́ после́довавши, свята́я, с Киприа́ном свяще́нным, страда́льческое соверши́сте по́прище; и ны́не с го́рними чи́нми Христу́ вопие́те: Аллилу́иа.

Икос 5

Святи́тель богому́дрый, и ве́рный домострои́тель Боже́ственных та́инств, всеблаже́нне, яви́лся еси́, манове́нием богонача́льным, Киприа́не, и к Бо́гу наста́вил еси́ словесы́ вку́пе и дея́ньми вопию́щия сицева́я:

Ра́дуйся, па́стырю ове́ц Христо́вых; ра́дуйся, исто́чниче вод невеще́ственных.

Ра́дуйся, научи́вый ве́рныя бла́гости Христо́вой; ра́дуйся, просия́вый жития́ чистото́ю.

Ра́дуйся, преподо́бный и в уче́ниих прему́дрый святи́телю; ра́дуйся, боговеща́нный, боже́ственный и и́стинный па́стырю.

Ра́дуйся, я́ко свяще́нно пасе́ши твое́ ста́до; ра́дуйся, я́ко отвраща́еши прельще́ния вред.

Ра́дуйся, се́ятелю догма́тов ве́ры; ра́дуйся, потреби́телю се́мен ху́ждшаго.

Ра́дуйся, душ добро́ты вводи́телю; ра́дуйся, до́брых преуспе́яния возвести́телю.

Ра́дуйся, блаже́нне Киприа́не, Христо́в страстоте́рпче.

Кондак 6

Пропове́дник и́стины, и свети́ло Це́ркве, и труба́ благоутро́бия Боже́ственнаго, ви́ды вся́кия доброде́тели украша́яся, Киприа́не, яви́лся еси́: му́дрость бо вне́шнюю подчини́л еси́ Бо́гу, зовы́й: Аллилу́иа.

Икос 6

Светя́щи жи́тельством и му́жеством душе́вным страда́льчествовавши, Иусти́но свята́я, принесла́ еси́ я́ко ве́но Го́сподеви твои́х крове́й излия́ние, всехва́льная; те́мже, твое́ страда́ние сла́вяще, возопии́м:

Ра́дуйся, свети́льниче Боже́ственныя любве́; ра́дуйся, стрело́, уязвля́ющая прельще́ние.

Ра́дуйся, му́ченическия труды́ поне́сшая; ра́дуйся, мучи́телей де́рзость обличи́вшая.

Ра́дуйся, не́мощию естества́ низложи́вшая врага́; ра́дуйся, благоче́стия по́двиги возвели́чившая Христа́.

Ра́дуйся, я́ко муче́ний боле́зни претерпе́ла еси́; ра́дуйся, я́ко во сла́ве к Го́рним преста́вилася еси́.

Ра́дуйся, Христо́во осия́ние зря́щая; ра́дуйся, душ омертве́ние оживля́ющая.

Ра́дуйся, жи́зни безсме́ртныя сосу́де; ра́дуйся, ра́дости присносу́щия прия́телище.

Ра́дуйся, сла́вная Иусти́но, Христо́ва страстоте́рпице.

Кондак 7

Му́ченический путь, Иусти́но богому́драя, соверши́вши душе́ю непрекло́нною со святы́м Киприа́ном, преми́рнаго благосла́вия улучи́ли есте́, бесо́вская нападе́ния отвраща́юще от вопию́щих: Аллилу́иа.

Икос 7

Умерщвле́н су́щим в ми́ре, святи́телю богому́дре, Христа́ Спа́са подража́я, Киприа́не, Того́ Стра́сти поревнова́л еси́, страда́льчествовав до́блественне, те́мже бесо́вская вся ухищре́ния отвраща́еши от вопию́щих:

Ра́дуйся, пропове́дниче благоче́стия; ра́дуйся, паде́ние беззако́ния.

Ра́дуйся, му́чениче Христо́в непобеди́мый; ра́дуйся, таи́нниче Го́рних пресла́вный.

Ра́дуйся, мечу́, посека́яй нечестие; ра́дуйся, бичу́ губи́тельный на тя́жкия ко́зни.

Ра́дуйся, я́ко облича́еши лесть и́дольскую; ра́дуйся, я́ко направля́еши к пути́ Небе́сному.

Ра́дуйся, Христо́во пропове́дуяй истоща́ние; ра́дуйся, вра́жию отверга́яй си́лу.

Ра́дуйся, струя́ми крове́й обагре́нный; ра́дуйся, зарю́ чуде́с возсиява́яй.

Ра́дуйся, блаже́нне Киприа́не, Христо́в страстоте́рпче.

Кондак 8

Странноле́пно житие́ твое́ показа́ся, о́тче, и твое́ при́сное к нам благоволе́ние; те́мже ра́достною душе́ю па́мять твою́ святу́ю почита́ем, Киприа́не блаже́нне, в не́йже вопие́м Пресвяте́й Тро́ице: Аллилу́иа.

Икос 8

Всем умо́м Го́сподеви, душ Жениху́, внима́ющи, честна́я Иусти́но, житие́ проходи́ла еси́ освяще́нное, и на му́ченическое ступи́ла еси́ по́прище. Те́мже, терпе́ние твое́ че́ствующе, ве́рно вопие́м:

Ра́дуйся, Го́сподеви уневе́стившаяся; ра́дуйся, ми́ра разлучи́вшаяся.

Ра́дуйся, девства Боже́ственное благоуха́ние; ра́дуйся, целому́дрия одушевле́нный алава́стре.

Ра́дуйся, боже́ственнаго осия́ния орга́не та́инственный; ра́дуйся, благода́ти Ду́ха селе́ние свяще́нное.

Ра́дуйся, я́ко вознесла́ся еси́ любо́вию Созда́теля; ра́дуйся, я́ко разреши́лася еси́ тече́ния плотска́го.

Ра́дуйся, честны́х дев удобре́ние; ра́дуйся, тве́рдых му́чеников украше́ние.

Ра́дуйся, ве́рных окриля́ющая жела́ние; ра́дуйся, Христо́во возде́лывающая сло́во.

Ра́дуйся, сла́вная Иусти́но, Христо́ва страстоте́рпице.

Кондак 9

Испо́лнь су́щи, свята́я, любве́ Боже́ственныя, удали́вши ум от земны́х, не ощуща́ла еси́ боле́зней притру́дных, приноси́мых боже́ственному твоему́ телеси́, но непреклоне́нна пребыва́ющи, Иусти́но, вопия́ла еси́: Аллилу́иа.

Икос 9

Струя́ми твои́х крове́й ри́зу твою́ обагри́в, му́дре священному́чениче Госпо́день, возше́л еси́ к Го́рней ски́нии, Киприа́не, зря я́же па́че ума́ и Христа́ умилостивля́я ве́рным, тебе́ при́сно вопию́щим:

Ра́дуйся, архиере́ев похвало́; ра́дуйся, страстоте́рпцев сла́во.

Ра́дуйся, свяще́нников кра́сное удобре́ние; ра́дуйся, благоче́ствующих боже́ственный учи́телю.

Ра́дуйся, ревни́телю тепле́йший апо́столов Христо́вых; ра́дуйся, подви́жниче тверде́йший Творца́ вся́ческих.

Ра́дуйся, я́ко усече́ние главы́ твоея́ прия́л еси́ ра́достне; ра́дуйся, я́ко от Бо́га просла́вился еси́ досто́йне.

Ра́дуйся, Христо́ву испи́вый ча́шу; ра́дуйся, боже́ственное на́ше прибе́жище.

Ра́дуйся, лю́тых волхвова́ний разруши́телю; ра́дуйся, ве́рных честны́й предста́телю.

Ра́дуйся, блаже́нне Киприа́не, Христо́в страстоте́рпче.

Кондак 10

Телеса́ ва́ша, облагода́тствованная от Бо́га, святи́телю Киприа́не и честна́я Иусти́но, в ца́рствующих граде́х и в селе́ниих ма́лых почива́ющая, вселе́нную же всю освяща́ющая, да́же до днесь чудеса́ источа́ют приходя́щим и вопию́щим: Аллилу́иа.

Икос 10

Черто́га Боже́ственнаго внутрь ликовству́ющи, я́ко неве́ста Христо́ва, Иусти́но, в моли́твах тя́ со сла́вным Киприа́ном призыва́ющия сохраня́й от вся́каго обстоя́ния, да при́сно вопию́т тебе́, богому́драя:

Ра́дуйся, Христо́ву зря́щая добро́ту; ра́дуйся, вра́жию попира́ющая держа́ву.

Ра́дуйся, невеще́ственных А́нгелов собесе́днице; ра́дуйся, святы́х му́чеников совсе́льнице.

Ра́дуйся, ве́рных покро́ве и утвержде́ние; ра́дуйся, паде́ние и упраздне́ние бесо́вскаго стремле́ния.

Ра́дуйся, я́ко подае́ши уны́ния разреше́ние; ра́дуйся, я́ко явля́еши богода́нное стяжа́ние.

Ра́дуйся, страсте́й скве́рну омыва́ющая; ра́дуйся, ве́рных лик возвеселя́ющая.

Ра́дуйся, е́юже посты́жена бысть пре́лесть; ра́дуйся, е́юже сия́ет и́стина.

Ра́дуйся, сла́вная Иусти́но, Христо́ва страстоте́рпице.

Кондак 11

Возвы́си свои́ ру́це ко Христу́, Иусти́но, о слове́снем Его́ ста́де, со свяще́нным Киприа́ном, я́ко да вся́кия ну́жды и озлобле́ния при́сно избавля́емся, Тро́ице Святе́й вопию́ще: Аллилу́иа.

Икос 11

Свет невеще́ственный Святы́я Тро́ицы ви́дя со А́нгелы, му́дре Киприа́не, в кров твой прибега́ющия от страсте́й омраче́ния изба́ви: к тебе́ бо устремля́ются всегда́ и благогове́йне ти взыва́ют:

Ра́дуйся, чту́щих тя засту́пниче; ра́дуйся, пла́чущих уте́шителю.

Ра́дуйся, волшебства́ разруша́яй си́лу; ра́дуйся, бесо́вское разоря́яй собо́рище.

Ра́дуйся, я́ко уврачева́л еси́ жену́ от лю́тых; ра́дуйся, я́ко низве́ргл еси́ супроти́внаго врага.

Ра́дуйся, я́ко исцели́л еси́ ю́ношу от стра́сти; ра́дуйся, избавля́яй ве́рныя всегда́ от боле́зни.

Ра́дуйся, вра́жия пресека́яй явле́ния; ра́дуйся, ве́рным подая́й исцеле́ния.

Ра́дуйся, страсте́й разреша́яй мрак; ра́дуйся, душ исцеля́яй боле́знь.

Ра́дуйся, блаже́нне Киприа́не, Христо́в страстоте́рпче.

Кондак 12

Ра́дуются, священному́чениче, ве́рных собра́ния, тобо́ю, я́ко огра́дою и назира́телем, богатя́щеся, Киприа́не чудотво́рче; и усе́рдне пропове́дуют предста́тельства твоего́ чудеса́, тебе́ Просла́вльшему вопию́ще: Аллилу́иа.

Икос 12

Пе́сненную похвалу́ тебе́ прино́сим вси, пою́ще твои́х страда́ний по́честь, о Иусти́но, му́ченице Христо́ва; ты же при́сно моли́ Жениха́ твоего́ благода́ть и ми́лость да́ти нам, любо́вию ти вопию́щим:

Ра́дуйся, Христо́ва непоро́чная неве́сто; ра́дуйся, ве́рных неколе́блемое забра́ло.

Ра́дуйся, благоче́стия держа́ву явля́ющая; ра́дуйся, злоче́стия пре́лесть постыжда́ющая.

Ра́дуйся, свет Трисия́нный прие́млющая изоби́льне; ра́дуйся, предста́тельство простира́ющая чту́щим тя ве́рне.

Ра́дуйся, де́вство соблю́дшая му́ченице ди́вная; ра́дуйся, Це́ркве та́инственное озаре́ние.

Ра́дуйся, е́юже от страсте́й исцеля́емся; ра́дуйся, е́юже све́та исполня́емся.

Ра́дуйся, хра́мов честны́х све́тлосте; ра́дуйся, на́ша во Христе́ светода́тельнице.

Ра́дуйся, сла́вная Иусти́но, Христо́ва страстоте́рпице.

Кондак 13

О дво́ице всебога́тая, Киприа́не всеблаже́нне вку́пе со Иусти́ною богому́дрою, Святе́й Тро́ице при́сно за ны не преста́ните моля́щеся, я́ко да жи́зни ве́чныя сподо́бимся, вопию́ще: Аллилу́иа.

[Се́й конда́к глаго́лется три́жды.][Далее повторяем 1‑е икос и кондак:]

Икос 1

А́нгел в житии́, присту́пль ко Го́споду, му́дре Киприа́не, яви́лся еси́, и хра́брствовав страда́льчески, Небе́сных по́честей сподо́бился еси́; те́мже, твое́й све́тлости дивя́щеся, возопии́м:

Ра́дуйся, и́мже Христо́с возсиява́ет; ра́дуйся, его́же ра́ди враг воздыха́ет.

Ра́дуйся, пре́лестию па́дших возставле́ние; ра́дуйся, уче́ний те́мных отверже́ние.

Ра́дуйся, высото́ ве́дения истоща́ния Христо́ва; ра́дуйся, глубино́ вся́кия благода́ти жития́ ева́нгельскаго.

Ра́дуйся, я́ко позна́л еси́ вра́жее прельще́ние; ра́дуйся, я́ко уве́дел еси́ любо́вь Бо́жию.

Ра́дуйся, звездо́ боже́ственныя бла́гости; ра́дуйся, свети́льниче вы́шния све́тлости.

Ра́дуйся, и́мже Христо́с просла́вися; ра́дуйся, и́мже враг уязви́ся.

Ра́дуйся, блаже́нне Киприа́не, Христо́в страстоте́рпче.

Кондак 1

И́же от пре́лести я́ко звезду́ возсия́вша, Киприа́на богоявле́ннаго почти́м, с ним и Иусти́ну блаже́нную. Той у́бо яви́ся святи́тель боже́ственнейший, сия́ же неве́ста Спа́сова бысть. К сим возглаго́лем: ра́дуйтеся, Киприа́не со Иусти́ною, Христо́вы страстоте́рпцы.

Молитва

О святи́и уго́дницы Бо́жии, священному́чениче Киприа́не и му́ченице Иусти́но, ско́рии помо́щницы и моли́твенницы о всех, к вам прибега́ющих! Приими́те от нас, недосто́йных, хвале́ние сие́; испроси́те у Го́спода Бо́га в не́мощех укрепле́ние, в печа́лех утеше́ние и всем вся поле́зная в жи́зни на́шей; вознеси́те ко Го́споду благомо́щную ва́шу моли́тву, да огради́т нас от паде́ний грехо́вных, да научи́т нас и́стинному покая́нию, да изба́вит нас от плене́ния диа́вольскаго и вся́каго де́йства духо́в нечи́стых и укроти́т оби́дящих нас. Бу́дите нам кре́пкия побо́рницы на вся враги́ ви́димыя и неви́димыя; подава́йте нам терпе́ние в искуше́ниих и в час кончи́ны на́шея яви́те нам заступле́ние от истяза́телей на возду́шных мыта́рствех; да води́мии ва́ми, дости́гнем Го́рняго Иерусали́ма и сподо́бимся в Небе́снем Ца́рствии со все́ми святы́ми сла́вити и воспева́ти пресвято́е и́мя Отца́ и Сы́на и Свята́го Ду́ха во ве́ки веко́в. Ами́нь.