Акафист преподобному Варнаве Ветлужскому

Текст акафиста одобрен для употребления за богослужением и в домашней молитве на заседании Священного Синода 26 декабря 2025 года (журнал № 133).

Кондак 1

Избра́нному Бо́гом и преди́вному житие́м, преподо́бному о́тцy на́шему Варна́ве, чудесы́ мно́гими в земли́ Ветлу́жской просия́вшему, хвале́бныя пе́ния прино́сим. Ты́ же, о́тче, я́ко име́я дерзнове́ние ко Го́споду, от вся́ких нас бед свободи́, да зове́м ти: Ра́дуйся, преподо́бне Варна́во, Ветлу́жский чудотво́рче.

Икос 1

А́нгелов собесе́дник и пра́веднаго жития́ и́стинный наста́вник еси́, о́тче Варна́во, тесны́я бо врата́ и путь у́зкий спасе́ния ра́ди избра́, смире́нием же высо́кая и нището́ю бога́тая стяжа́. Мы же, преподо́бное житие́ твое́ зря́ще, во умиле́нии серде́ц вопие́м ти:

Ра́дуйся, гра́да У́стюга пресла́вное прозябе́ние;

ра́дуйся, роди́телей благочести́вых ве́лие утеше́ние.

Ра́дуйся, виногра́да Христо́ва розго́ многопло́дная;

ра́дуйся, Ду́ха Свята́го сосу́де преди́вный.

Ра́дуйся, в ра́зуме Бо́гом просвеще́нный;

ра́дуйся, за́поведей Госпо́дних блюсти́телю ве́рный.

Ра́дуйся, бде́ний и поще́ний де́лателю усе́рдный;

ра́дуйся, нището́ю духо́вною Ца́рствие Небе́сное стяжа́вый.

Ра́дуйся, преподо́бне Варна́во, Ветлу́жский чудотво́рче.

Кондак 2

Ви́дя Госпо́дь благо́е се́рдца твоего́ произво́ление, в хра́ме гра́да У́стюга поста́ви тя иере́ем служи́ти, егда́ же бли́жних свои́х ты безвре́менне лиши́ся, на и́ноческий путь призва́ тя и в зе́млю Ветлу́жскую стопы́ твоя́ напра́ви, преподо́бне. Та́мо в бде́нии, поще́нии и моле́нии де́нно и но́щно Бо́гу предстоя́, вопия́ше Ему́: Аллилу́иа.

Икос 2

Разуме́в суету́ и непостоя́нство ми́ра сего́, в не́мже благополу́чие внеза́пными бе́дами и лише́ниями наве́туется, нетле́нных благ вожделева́ше, преподо́бне о́тче Варна́во, и сих усе́рдне взыска́ти потща́шеся, сего́ ра́ди вопие́м ти:

Ра́дуйся, Небе́снаго оте́чества пла́менне вожделе́вый;

ра́дуйся, проти́ву греха́ во́инствовати восхоте́вый.

Ра́дуйся, смиренному́дрия и́стинный блюсти́телю;

ра́дуйся, целому́дрия усе́рдный стяжа́телю.

Ра́дуйся, пра́вило ве́ры и благоче́стия и́стинное;

ра́дуйся, о́бразе кро́тости и смире́ния нело́жный.

Ра́дуйся, житие́ пусты́нное возлюби́вый;

ра́дуйся, и́ноков пресла́вная похвало́.

Ра́дуйся, преподо́бне Варна́во, Ветлу́жский чудотво́рче.

Кондак 3

Си́лою Ду́ха Свята́го укрепля́ем, вся плотска́я мудрова́ния попра́л еси́, преподо́бне о́тче Варна́во, ору́жием Креста́ Христо́ва вооружи́вся проти́ву духо́в зло́бы поднебе́сных, смире́нием сих препобежда́я и непреста́нно вопия́ Бо́гу: Аллилу́иа.

Икос 3

Имы́й пропита́ние ску́дное, то́ком слез покая́нных вы́ну ороша́емое, преподо́бне, питие́ свое́ с пла́чем растворя́ше от преизбы́тка любве́ к Бо́гу. Те́мже и мы, дивя́щеся ангелоподо́бному житию́ твоему́, взыва́ем ти си́це:

Ра́дуйся, непоколеби́мый сто́лпе смире́ния;

ра́дуйся, бре́мя подвиго́в Христа́ ра́ди на ра́мена возложи́вый.

Ра́дуйся, вме́сто хле́ба бы́лием травны́м пита́выйся;

ра́дуйся, жа́жду водо́ю в ме́ру утоля́вый и с пла́чем ю́ растворя́вый.

Ра́дуйся, убо́гую хи́жину па́че ца́рских пала́т возлюби́вый;

ра́дуйся, же́стоко ло́же во бла́го вели́ко себе́ вмени́вый.

Ра́дуйся, житие́м свои́м А́нгелов удиви́вый;

ра́дуйся, весь живо́т свой Го́сподеви преда́вый.

Ра́дуйся, преподо́бне Варна́во, Ветлу́жский чудотво́рче.

Кондак 4

Бу́ря искуше́ний диа́вольских не возмо́же поколеба́ти хра́ма души́ твоея́, о́тче Варна́во, зане́ основа́н бысть на ка́мени и́стинныя ве́ры. Сего́ ра́ди восхожда́ше, преподо́бне, по стези́ добродете́лей от си́лы в си́лу, непреста́нно вопия́ Бо́гови: Аллилу́иа.

Икос 4

Слы́шаще благоуха́ние жития́ твоего́, преподо́бне о́тче Варна́во, не то́кмо зве́ри ди́вии укроща́хуся, но и лю́дие, седя́щия во тме и се́ни смертней, привлека́хуся и просвеща́хуся. Те́мже и мы, дивя́щеся сему́, ра́достно зове́м ти такова́я:

Ра́дуйся, дре́во многопло́дное, при исхо́дищах вод насажде́нное;

ра́дуйся, вертогра́да церко́внаго кри́не благово́нный.

Ра́дуйся, в пусты́нном житии́ душеполе́зная сокро́вища стяжа́вый;

ра́дуйся, в и́ноческих труде́х дре́вним отце́м уподо́бивыйся.

Ра́дуйся, светоно́сный сто́лпе, просвеща́яй су́щия во тьме;

ра́дуйся, равноа́нгельнаго жития́ достигнути сподо́бивыйся.

Ра́дуйся, благода́ти Христо́вы сосу́де неиссяка́емый;

ра́дуйся, взира́ющия на до́брая дела́ твоя́ к прославле́нию Бо́га побужда́вый.

Ра́дуйся, преподо́бне Варна́во, Ветлу́жский чудотво́рче.

Кондак 5

Богосве́тлая звезда́ земли́ Ветлу́жской яви́лся еси́, преподо́бне о́тче Варна́во, быв о́браз кро́тости и смире́ния, ве́ры и любве́, чистоты́ и воздержа́ния, вопия́ Бо́гу: Аллилу́иа.

Икос 5

Зря́ще А́нгельстии чи́нове житие́ твое́, преподо́бне Варна́во, удиви́шася и просла́виша Творца́ вся́ческих, укрепля́ющаго немощно́е естество́ челове́ческое. Те́мже и мы, сему́ дивя́щеся, зове́м ти си́це:

Ра́дуйся, заре́ све́тлая, от пусты́ни восходя́щая и вся озаря́ющая;

ра́дуйся, сто́лпе о́гненный, путь спасе́ния указу́яй.

Ра́дуйся, ду́ши, от мра́за грехо́внаго погиба́ющия, согрева́яй;

ра́дуйся, ко спаси́тельному приста́нищу во тьме управля́яй.

Ра́дуйся, доброзра́чнаго све́та Ева́нгельскаго пресве́тлое сия́ние;

ра́дуйся, сладча́йшаго зако́на Госпо́дня усе́рдное сохране́ние.

Ра́дуйся, а́лчущих жи́зни ве́чныя пита́телю;

ра́дуйся, жа́дущих спасе́ния духо́вный напои́телю.

Ра́дуйся, преподо́бне Варна́во, Ветлу́жский чудотво́рче.

Кондак 6

Пропове́дание немо́лчное ве́ры несокруши́мыя, наде́жды неумира́ющия и любве́ и́стинныя яви́ся богоуго́дное житие́ твое́, преподо́бне о́тче Варна́во; мы же вси, слы́шащии сие́, вопие́м Бо́гу: Аллилу́иа.

Икос 6

Возсия́вшим в души́ твое́й за́поведем Госпо́дним, преподо́бне о́тче Варна́во, посреди́ звере́й ди́виих два́десять и осмь лет че́стно подвизашеся, те́мже обре́л еси́ безце́нную дра́хму — Христа́, науча́я и нас Его́ Еди́наго взыска́ти, да зове́м ти:

Ра́дуйся, луќавых духо́в кре́пкий победи́телю;

ра́дуйся, душепа́губных волко́в прогони́телю.

Ра́дуйся, во́ине Христо́в непобеди́мый;

ра́дуйся, ра́бе Бо́жий, благи́й и ве́рный.

Ра́дуйся, си́лою кре́стнаго зна́мения стре́лы лука́ваго отрази́вый;

ра́дуйся, крило́ма богомы́слия се́ти вра́жия раздра́вый.

Ра́дуйся, упова́нием на по́мощь свы́ше себе́ вооружи́вый;

ра́дуйся, наде́жду на спасе́ние до конца́ сохрани́вый.

Ра́дуйся, преподо́бне Варна́во, Ветлу́жский чудотво́рче.

Кондак 7

Хотя́ стоя́ти кре́пце на каме́ни ве́ры, отража́ше, преподо́бне Варна́во, нахожде́ния бесо́вския, я́ко злы́я во́лны, тща́щияся разори́ти приста́нище твое́ на горе́ Кра́сней, непреста́нно вопия́ Бо́гу: Аллилу́иа.

Икос 7

Но́вый свети́льник, Ду́хом Святы́м возжже́нный, яви́лся еси́, преподо́бне о́тче Варнаво, те́мже попали́ вся де́монская ополче́ния и А́нгельским лико́м сопричте́н бысть. Мы же, взира́юще на светоле́пныя труды́ твоя́ спасе́ния ра́ди, вопие́м ти:

Ра́дуйся, Боже́ственныя глаго́лы в и́стинное сокро́вище себе́ вмени́вый;

ра́дуйся, тем ду́шу свою́ во оби́тель Святы́я Тро́ицы созида́вый.

Ра́дуйся, Христа́ па́че жи́зни своея́ возлюби́вый;

ра́дуйся, любо́вь ве́лию к Нему́ стяжа́вый.

Ра́дуйся, Христа́ ра́ди труды и боле́зни мно́гия понесы́й;

ра́дуйся, сего́ ра́ди Им возлю́бленный.

Ра́дуйся, ничи́мже от Него́ разлуче́нный;

ра́дуйся, к Ца́рствию Небе́сному ду́шу свою́ предугото́вивый.

Ра́дуйся, преподо́бне Варна́во, Ветлу́жский чудотво́рче.

Кондак 8

Стра́нно промышля́я о ме́сте подвиго́в твои́х, преподо́бне о́тче Варна́во, вложи́ Госпо́дь в се́рдцы твое́, я́ко бу́дет на ме́сте сем оби́тель и́ноком во спасе́ние и селе́ние о́крест ея́ мно́гим лю́дем во обита́лище. Ты же извеще́ние сие́ до вре́мене в се́рдцы свое́ положи́, вопи́я Бо́гу: Аллилу́иа.

Икос 8

Весь путь жития́ своего́ преше́д и вре́мене преставле́ния своего́ дости́г, преподо́бне о́тче Варна́во, нача́т побужде́нием Госпо́дним глаго́лати приходя́щим к тебе́ такова́я: «По кончи́не мое́й умно́жит Бог челове́ки от Ветлу́ги до Во́лги, на ме́сте же жития́ моего́ соберу́тся мона́си». Мы́ же, ста́вшая по глаго́лу твоему́ зря́ще, взыва́ем ти такова́я:

Ра́дуйся, прибе́жище пребыва́ющим в ско́рбех и напа́стех;

ра́дуйся, ско́рый помо́щниче в беда́х су́щим.

Ра́дуйся, цели́телю боле́зней душе́вных и теле́сных;

ра́дуйся, покрови́телю си́рых и кро́ва не иму́щих.

Ра́дуйся, устрое́ние оби́тели мона́шеския предреки́й;

ра́дуйся, в хра́ме обите́ли сея́ мощми́ свои́ми возлеги́й.

Ра́дуйся, мно́гими чудесы́ от них исходя́щими просла́вивыйся;

радуйся, горы́ Кра́сныя и всея́ Руси́ сла́во и похвало́.

Ра́дуйся, преподо́бне Варна́во, Ветлу́жский чудотво́рче.

Кондак 9

Вси святи́и с ли́ки А́нгельскими срето́ша ду́шу твою́ во Ца́рствии Небе́снем, преподо́бне о́тче Варна́во, с ни́миже ты вы́ну вопие́ши Бо́гови: Аллилу́иа.

Икос 9

Вети́и многовеща́ннии не возмо́гут по достоя́нию воспе́ти сла́ву, угото́ванную святы́м во Ца́рствии Небе́снем, иде́же всели́ тя Госпо́дь, преподо́бне о́тче Варна́во, та́може Небе́сных даро́в вкуша́еши доброде́тельнаго ра́ди жития́ твоего́. Те́мже и мы из глубины́ серде́ц вопие́м ти:

Ра́дуйся, до конца́ Бо́гу послужи́вый;

ра́дуйся, со́нму святы́х сопричте́нный.

Ра́дуйся, нетле́нным венце́м увенча́нный;

ра́дуйся, на бра́це Небе́снаго Жениха́ бы́ти сподо́бивыйся.

Ра́дуйся, уго́дниче Бо́жий, утеше́нию тезоимени́тый;

ра́дуйся, в ра́дость Го́спода Бо́га твоего́ вше́дый.

Ра́дуйся, чи́стым се́рдцем Бо́га узре́вый;

ра́дуйся, моли́твенниче о нас неусы́пный.

Ра́дуйся, преподо́бне Варна́во, Ветлу́жский чудотво́рче.

Кондак 10

Спасти́ся хотя́й всем челове́ком и в ра́зум и́стины приити́, мно́гими дарова́нии наделя́ет избра́нных Свои́х Госпо́дь, и́хже моли́твами и равноа́нгельным житие́м возбужда́еми, от жи́зни грехо́вныя отгреба́емся, к жи́зни святе́й прилежа́ще, воспева́юще Ему́: Аллилу́иа.

Икос 10

Стена́ и помо́щник, преподо́бне о́тче Варна́во, всем прибега́ющим к тебе́ яви́лся еси́; те́мже и нам, притека́ющим к тебе́ с ве́рою, бу́ди засту́пник, да зове́м ти:

Ра́дуйся, благочести́вых отра́до и утеше́ние;

ра́дуйся, и́стиннаго покая́ния наста́вниче.

Ра́дуйся, притека́ющих к тебе́ предста́телю;

ра́дуйся, коле́блющихся в ве́ре укрепле́ние.

Ра́дуйся, отча́явшимся в спасе́нии поможе́ние;

ра́дуйся, нужда́ющимся ско́рую по́мощь подаю́щий.

Ра́дуйся, смертоно́сныя я́звы избавля́яй;

ра́дуйся, наше́ствие сопроти́вных отгоня́яй.

Ра́дуйся, преподо́бне Варна́во, Ветлу́жский чудотво́рче.

Кондак 11

Пе́ние благода́рное Пресвяте́й Тро́ице прино́сим, преподо́бне о́тче Варна́во, я́ко дарова́ нам тя те́плаго моли́твенника, ско́раго помо́щника и ди́внаго чудотво́рца, воспева́ющим Бо́гу: Аллилуиа.

Икос 11

Светосия́тельныя по́двиги твоя́ воспева́юще, преподо́бне о́тче Варна́во, ублажа́ем тя я́ко наста́вника мона́хов и собесе́дника А́нгелов, ты же, ны́не Престо́лу Бо́жию предстоя́, моли́ся о нас, с любо́вию зову́щих ти:

Ра́дуйся, равноа́нгельнаго жития́ свети́льниче;

ра́дуйся, пла́мени серде́чнаго неусы́пный храни́телю.

Ра́дуйся, непоколеби́мый сто́лпе ве́ры и́стинныя;

ра́дуйся, тве́рдый помо́щниче во искуше́нии су́щим.

Ра́дуйся, в ско́рбех и боле́знех ско́рый помо́щниче;

ра́дуйся, Го́рняя му́дрствовати призыва́яй.

Ра́дуйся, ми́лости исто́чниче неистощи́мый;

ра́дуйся, по́мощь всем с ве́рою к о́бразу твоему́ притека́ющим подая́й.

Ра́дуйся, преподо́бне Варна́во, Ветлу́жский чудотво́рче.

Кондак 12

Благода́ть дая́й изоби́льно, вонми́ воздыха́нием на́шим и слез на́ших не пре́зри, преподо́бне о́тче Варна́во, егда́ пред честны́м твои́м о́бразом предстоя́ще, те́плыя моле́ния на́ша прино́сим, вопию́ще Бо́гу: Аллилу́иа.

Икос 12

Воспева́юще хвале́бными гла́сы преди́внаго жития́ твоего́ о́браз, преподо́бне о́тче Варна́во, жития́ на́шего исправле́ния пода́ти нам про́сим моли́тв твои́х ра́ди, да зове́м ти:

Ра́дуйся, до́бре жи́тельствующих помо́щниче;

ра́дуйся, к Богоро́дице неусы́пный моли́твенниче.

Ра́дуйся, па́дающим ру́ку по́мощи простира́яй;

ра́дуйся, немощны́х укрепля́яй.

Ра́дуйся, грехо́вное тле́ние моли́твами твои́ми в нас устраня́яй;

ра́дуйся, ка́ющимся сле́зы уте́шительныя от Го́спода низпосыла́яй.

Ра́дуйся, спасе́ния на́шего пред Бо́гом хода́таю;

радуйся, призыва́ющим тя грехо́в свобожде́ния глаша́таю.

Ра́дуйся, преподо́бне Варна́во, Ветлу́жский чудотво́рче.

Кондак 13

О вели́кий чудотво́рче и ди́вный уго́дниче Христо́в, преподо́бне о́тче Варна́во, ми́лостивно приими́ сие́ ма́лое моле́ние на́ше, да твои́ми моли́твами сохрани́т нас Госпо́дь в жи́зни сей и Ца́рствия Небе́снаго сподо́бит, иде́же вси, при́сно веселя́щеся, немо́лчно вопию́т Бо́гу: Аллилу́иа.

[Се́й конда́к глаго́лется три́жды.][Далее повторяем 1‑е икос и кондак:]

Икос 1

А́нгелов собесе́дник и пра́веднаго жития́ и́стинный наста́вник еси́, о́тче Варна́во, тесны́я бо врата́ и путь у́зкий спасе́ния ра́ди избра́, смире́нием же высо́кая и нището́ю бога́тая стяжа́. Мы же, преподо́бное житие́ твое́ зря́ще, во умиле́нии серде́ц вопие́м ти:

Ра́дуйся, гра́да У́стюга пресла́вное прозябе́ние;

ра́дуйся, роди́телей благочести́вых ве́лие утеше́ние.

Ра́дуйся, виногра́да Христо́ва розго́ многопло́дная;

ра́дуйся, Ду́ха Свята́го сосу́де преди́вный.

Ра́дуйся, в ра́зуме Бо́гом просвеще́нный;

ра́дуйся, за́поведей Госпо́дних блюсти́телю ве́рный.

Ра́дуйся, бде́ний и поще́ний де́лателю усе́рдный;

ра́дуйся, нището́ю духо́вною Ца́рствие Небе́сное стяжа́вый.

Ра́дуйся, преподо́бне Варна́во, Ветлу́жский чудотво́рче.

Кондак 1

Избра́нному Бо́гом и преди́вному житие́м, преподо́бному о́тцy на́шему Варна́ве, чудесы́ мно́гими в земли́ Ветлу́жской просия́вшему, хвале́бныя пе́ния прино́сим. Ты́ же, о́тче, я́ко име́я дерзнове́ние ко Го́споду, от вся́ких нас бед свободи́, да зове́м ти: Ра́дуйся, преподо́бне Варна́во, Ветлу́жский чудотво́рче.

Молитва

О всеблаже́нне о́тче, преподо́бне Варна́во, те́плый засту́пниче и помо́щниче с ве́рою призыва́ющим тя! Изба́ви нас моли́твами твои́ми ко Го́споду от вся́каго обстоя́ния бесо́вскаго. Изми́ нас, окая́нных рабо́в твои́х, от уст па́губнаго зми́я, зия́ющаго пожре́ти нас и свести́ во ад живы́х. Прости́ нас, о́тче, ели́ко согреши́хом ти, исто́ргни нас от греха́ и вся́кия напа́сти, приходя́щия грехо́в ра́ди на́ших. О чудотво́рче Варна́во! Пода́ждь душа́м на́шим утеше́ние, всади́ в сердца́ на́ша страх суда́ Бо́жия, изба́ви нас от враг на́ших ви́димых и неви́димых, тебе́ бо и́мамы те́пла моли́твенника и засту́пника, и́же в беда́х су́щии и в грехи́ впа́дшии. Ты бо яви́ся столп благоче́стия, воздержа́ния пра́вило, смиренному́дрия о́браз, целому́дрия наста́вник, убо́гим и сирота́м засту́пник и прибега́ющим к тебе́ храни́тель. Кто у́бо по достоя́нию мо́жет похвали́ти равноа́нгельное твое́ житие́ и кто мо́жет исчести́ твои́х подвиго́в ме́ру? Вои́стину я́ко со́лнца светле́йша возсия́ша твоя́ исправле́ния, ревни́тель бо бысть всем святы́м, преподо́бия и пра́ведности учи́тель духо́вный и всем, призыва́ющим тя, моли́твенник ко Пресвяте́й Тро́ице. Ты, я́ко ми́р оста́вил еси́ и я́же в ми́ре, и нас приведи́ ко Го́споду моли́твами твои́ми, о́тче честне́йший, да и мы сподо́бимся ве́чных благи́х, и́хже наслажда́ешися и Небе́сныя сла́вы жела́емаго сладча́йшаго Влады́ки и Го́спода всех Иису́са Христа́, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не, и при́сно, и во ве́ки веко́в. Ами́нь.