Акафист преподобному Антипе Валаамскому

Текст акафиста одобрен для употребления за богослужением и в домашней молитве на заседании Священного Синода 27 декабря 2024 года (журнал № 150).

Кондак 1

Возбра́нный Воево́да лико́в и́ноческих, Христо́с Бо́г наш, венча́ тя венце́м побе́дным на Небеси́, нам же, су́щим на земли́, мо́щи твоя́ нетле́нныя оста́ви во утеше́ние, да при́сно вопие́м ти: ра́дуйся, преподо́бне Анти́по, оби́тели Валаа́мския све́тлое украше́ние.

Икос 1

А́нгельстии Си́лы на Небесе́х возра́довашася, зря твое́ рождество́, преподо́бне о́тче, я́ко ты предуста́влен бысть от Бо́га к равноа́нгельному житию́. Ра́дость бысть и на земли́, я́ко пре́жде непло́дная утро́ба ма́тере твоея́ тебе́ породи́. Мы же днесь, о тебе́ ра́дующеся и Бо́га благодаря́ще, согла́сно прино́сим похвалы́ сия́:

Ра́дуйся, я́ко на ра́дость мно́гим в мир прише́л еси́; ра́дуйся, я́ко ра́достию се́рдца твоего́ Христа́ име́л еси́.

Ра́дуйся, доброде́тельми па́че луч со́лнечных сия́яй; ра́дуйся, Ду́ха плода́ми сла́дкими нас пита́яй.

Ра́дуйся, я́ко в напа́стех су́щим ско́ро помога́еши; ра́дуйся, я́ко скорбя́щих сле́зы ми́лостивно отира́еши.

Ра́дуйся, и́ноком во бране́х кре́пкое заступле́ние; ра́дуйся, и всем лю́дем отра́до и похвале́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 2

Ви́дяще роди́телие твои́, о́тче Анти́по, чу́дная зна́мения, на тебе́ бы́вшая, вельми́ ужаса́хуся, ка́ко во отроча́ти ма́ле толи́кая си́ла Бо́жия явля́ется, и Творца́ о тебе́ сла́вляху, пою́ще: Аллилу́иа.

Икос 2

Разуме́ти кни́ги боже́ственныя хотя́, науче́нию гра́моте зело́ прилежа́л еси́, преподо́бне, и Го́спода усе́рдно моли́л еси́ нему́дрость твою́ умудри́ти. Ны́не же моли́твою твое́ю и наш смысл просвети́, да зове́м ти:

Ра́дуйся, роди́телей боголюби́вых ча́до благослове́нное; ра́дуйся, взыска́вый и́стинную му́дрость, я́ко сокро́вище нетле́нное.

Ра́дуйся, я́ко ца́рь Дави́д, пасы́й о́вцы отца́ твоего́; ра́дуйся, презре́вый че́сть и сла́ву ми́ра сего́.

Ра́дуйся, Отце́м Небе́сным пасти́ слове́сных ове́ц избра́нный; ра́дуйся, пе́сньми псало́мскими, я́ко дре́во при исхо́дищих вод, напита́нный.

Ра́дуйся, я́ко почерпа́л еси́ от свяще́нных кни́г назида́ние и вдохнове́ние; ра́дуйся, я́ко воздви́гл еси́ мно́гия ду́ши от уны́ния и забве́ния.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 3

Си́ла Вы́шняго осени́ тя, и ди́вный свет озари́ се́рдце твое́, егда́ в моли́тве сле́зней возопи́л еси́: скажи́ мне, Го́споди, путь, во́ньже пойду́. И позна́в, я́ко призыва́ет тя Бог во и́ночестем чи́не послужи́ти Ему́, воспе́л еси́: Аллилу́иа.

Икос 3

Име́я еди́но жела́ние, е́же со Христо́м бы́ти, восте́кл еси́, преподо́бне о́тче, во оби́тель ма́лую, и́же во Влахи́и, и во́лю свою́ отце́м духо́вным покори́л еси́. Мы же, такову́ю ре́вность твою́ по Бо́зе зря́ще, глаго́лем:

Ра́дуйся, те́сный путь спасе́ния избра́вый; ра́дуйся, Христо́вой нищете́ и смире́нию подража́вый.

Ра́дуйся, вы́ю под и́го благо́е послуша́ния подклони́вый; ра́дуйся, от скорбе́й и лише́ний лица́ не отврати́вый.

Ра́дуйся, и́менем Иису́совым враго́в невиди́мых низлага́вый; ра́дуйся, лю́дем, вражду́ющим на тя, ско́ро проще́ние подава́вый.

Ра́дуйся, сокруше́нным се́рдцем моли́вый Бо́га прости́ти твоя́ согреше́ния; ра́дуйся, от руки́ ста́рца Дими́трия сподо́бивыйся мона́шескаго постриже́ния.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 4

Бу́ря искуше́ний и скорбе́й не поколеба́ души́ твоея́, преподо́бне, утвержде́ние бо и наде́жду несумне́нную Христа́ стяжа́л еси́, при́сно взыва́я Ему́: Аллилу́иа.

Икос 4

Слы́ша, я́ко в горе́ Афо́нской и́ноцы до́бре жи́тельствуют, сию́ дости́гнути потща́лся еси́ и, во оби́тели Есфигме́нской всели́вся, неле́ностно о́бщаго жития́ труды́ подъя́л еси́. Те́мже и мы, на усе́рдие твое́ взира́юще, к подвиго́м укрепля́емся и си́це вопие́м:

Ра́дуйся, веле́ний оте́ческих непрекосло́вный исполни́телю; ра́дуйся, о́бразе кро́тости и братолю́бия ревни́телю.

Ра́дуйся, на служе́ние бра́тии, я́ко раб, себе́ преда́вый; ра́дуйся, с рабы́ Христо́выми Небе́сную ра́дость сниска́вый.

Ра́дуйся, я́ко непоро́чно путе́м жи́зни духо́вныя шел еси́; ра́дуйся, я́ко нощь богооставле́ния му́жески претерпе́л еси́.

Ра́дуйся, позна́вый си́лу Богома́терняго заступле́ния; ра́дуйся, благослове́нием ста́рцев удали́выйся на пусты́нное уедине́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 5

Я́ко боготе́чная звезда́ бысть тебе́, о́тче, ико́на Пресвяты́я Богоро́дицы, на Не́бо восхо́д озаря́ющи, ю́же обре́т в пусты́нней ке́ллии твое́й, благода́рно воспе́л еси́: Аллилу́иа.

Икос 5

Ви́дя, преподо́бне Анти́по, ико́ну Богоро́дицы зело́ ве́тху и те́мну, моли́ иконопи́сца иску́снаго омы́ти ю́. Той же рече́, я́ко не мо́щно есть омове́нием сию́ обнови́ти, егда́ же сотвори́ по сло́ву твоему́, а́бие просвети́ся лик Пречи́стыя. О сем во умиле́нии пое́м:

Ра́дуйся, обра́дованныя Де́вы возлю́бленный учениче́; ра́дуйся, Игу́мении горы́ Афо́нския избра́нниче.

Ра́дуйся, ико́ну Богома́тере, я́ко безце́нное сокро́вище, восприе́мый; ра́дуйся, мно́гая зна́мения и чудеса́ от нея́ узре́вый.

Ра́дуйся, святы́ни сея́ никогда́же отлуча́выйся; ра́дуйся, Цари́цу Небе́сную непреста́нно велича́вый.

Ра́дуйся, на вся́кий день приноси́вый Ей ака́фистное пе́ние; ра́дуйся, я́ко хода́тайством твои́м от о́браза Пречи́стыя и ны́не то́чатся исцеле́ния.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 6

Пропове́дует свяще́нная гора́ Афо́нская труды́ и боле́зни твоя́, преподо́бне о́тче Анти́по, ка́ко во бде́ниих и моли́твах со слеза́ми но́щи проводи́л еси́, и со́лнце восходя́щее ви́де тя, взыва́юща Бо́гу: Аллилу́иа.

Икос 6

Возсия́вый ми́рови Свет И́стинный облиста́ се́рдце твое́ и отгна́ вся́кую тьму, и облече́ тя во ору́жия Своя́, да ста́неши проти́ву духо́в зло́бы поднебе́сныя и попере́ши я́, нам пу́ть спасе́ния указу́я, тебе́ вопию́щим:

Ра́дуйся, во́ине Христо́в до́блественный и ве́рный; ра́дуйся, устраше́ние бесо́в, А́нгелом же сора́тниче усе́рдный.

Ра́дуйся, смире́нием вся ко́зни диа́вольския победи́вый; ра́дуйся, посто́м и бде́нием плоть твою́ ду́хови покори́вый.

Ра́дуйся, я́ко от трудо́в рук твои́х насу́щный хлеб ял еси́; ра́дуйся, я́ко о бра́ни духо́вней иску́снейших вопроша́л еси́.

Ра́дуйся, ничесо́же твори́вый без ста́рческаго благослове́ния; ра́дуйся, опа́сно храни́вый ума́ и се́рдца трезве́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 7

Безмо́лвнаго жития́ жела́я, святы́й о́тче, пребы́ти неисхо́дно в пусты́ни ча́ял еси́, Бог же тебе́ укры́тися, я́ко свети́льнику под спу́дом, не благоволи́, да, зря́ще до́брая дела́ твоя́, челове́цы вопию́т: Аллилу́иа.

Икос 7

Но́вую оби́тель и́ноческую устроя́юще, моля́ху тя, о́тче, бра́тия ку́пно с ни́ми подвиза́тися. Ты же проше́ние их испо́лни и ко трудо́м разли́чным устреми́ся, устна́ми и помышле́нием при́сно Бо́га хваля́. На сие́ спаси́тельное де́лание твое́ взира́юще, мы глаго́лем:

Ра́дуйся, трудо́м и моли́твою, я́ко двема́ крило́ма, на высоту́ доброде́тели возлете́вый; ра́дуйся, в де́лех ве́ры и благоче́стия нелицеме́рную ре́вность име́вый.

Ра́дуйся, общежи́тельных уста́вов изря́дный блюсти́телю; ра́дуйся, оте́ческих преда́ний неизме́нный храни́телю.

Ра́дуйся, ко хра́му Бо́жию ве́лие усе́рдие явля́вый; ра́дуйся, на труды́ своя́ упова́ние не возлага́вый.

Ра́дуйся, я́ко смире́нно прия́л еси́ во иере́я посвяще́ние; ра́дуйся, я́ко призва́н бысть Бо́гом на духовни́ческое служе́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 8

Стра́нное смотре́ние Бо́жие ви́дим о тебе́, о́тче, ка́ко от горы́ Афо́нския па́ки во многомяте́жный мир за ми́лостынею игу́меном посыла́ешися, да оби́тель твоя́ благоле́пно устро́ится, и мно́зи и́ноцы в ней пою́т Бо́гу: Аллилу́иа.

Икос 8

Весь бе в Вы́шних у́м тво́й посреде́ жите́йския молвы́. Послуша́ние бо со тща́нием исполня́я, подвиго́м и́ноческим вя́щше прилежа́л еси́, да се́тей грехо́вных избе́гнеши. Таково́му твоему́ благоразу́мию дивя́щеся, рцем:

Ра́дуйся, во́лю нача́льников, я́ко во́лю Бо́жию, всегда́ твори́вый; ра́дуйся, мир души́ среди́ ми́ра тле́ннаго невреди́мо храни́вый.

Ра́дуйся, на стра́сти плотски́я кре́пким посто́м вооружа́выйся; ра́дуйся, стоя́ти за пра́вду и облича́ти нече́стие не устраша́выйся.

Ра́дуйся, духо́вный мед горы́ Афо́нския трудолю́бно собра́вый; ра́дуйся, лю́ди земли́ Ру́сския в сла́дость им напита́вый.

Ра́дуйся, архипа́стырей и князе́й благочести́вых сподо́бивыйся благоволе́ния; ра́дуйся, па́че всего́ возлюби́вый смире́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 9

Всех Святы́х уедине́нный скит я́ко приста́нище ти́хое обре́л еси́, о́тче, егда́ по труде́х мно́зех во оби́тель Валаа́мскую удали́лся еси́, и тамо до конца́ дней твои́х непреста́нно пел еси́ Бо́гу: Аллилу́иа.

Икос 9

Вети́йствующий ра́зум челове́ческий никогда́же возмо́жет пости́гнути та́ин Небе́сных. Ты же, о́тче святы́й, благода́тию Бо́жиею просвети́вся и ничто́же земно́е помышля́я, еще́ в житии́ сем сподо́бился еси́ Го́рняя зре́ти. Сего́ ра́ди от нас, недосто́йных, слы́шиши:

Ра́дуйся, я́ко многострада́льным житие́м в поко́й безстра́стия дости́гл еси́;

Ра́дуйся, я́ко во дни и в нощи́ моли́твы Бо́гу возноси́л еси́.

Ра́дуйся, святу́ю го́ру Афо́нскую благогове́йно чти́вый; ра́дуйся, Се́верный Афо́н, оби́тель Валаа́мскую, вседу́шно возлюби́вый.

Ра́дуйся, я́ко благода́тию ста́рчества ди́вно в ней просия́л еси́; ра́дуйся, я́ко да́ры чудотворе́ния и прозре́ния от Христа́ восприя́л еси́.

Ра́дуйся, честны́й сосу́де му́дрости и духо́внаго рассужде́ния; ра́дуйся, тве́рдый у́ме, возше́дый на высоту́ богови́дения.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 10

Спасе́ния духо́вных ча́д жела́я, я́ко па́стырь до́брый ду́шу твою́ о них полага́л еси́, сло́вом и де́лом наставля́я, да во Ца́рствии Небе́снем Христу́ воспою́т: Аллилу́иа.

Икос 10

Стена́ су́щи де́вам и целому́дрию и́ноческому Храни́тельница, Богоро́дица Де́ва соде́ла тя, преподобне, отце́м мно́гих душ христиа́нских, му́жие бо и жены́, и́ноцы и и́нокини име́яху тя путевождя́ ко спасе́нию. Сопричти́ и нас духо́вному ста́ду твоему́, зову́щих:

Ра́дуйся, па́стырю наш до́брый, Началопа́стыря учениче́; ра́дуйся, о всех скорбя́щих и обремене́нных моли́твенниче.

Ра́дуйся, врачу́ душ ми́лостивый и долготерпели́вый; ра́дуйся, не́мощи немощны́х сострада́тельно носи́вый.

Ра́дуйся, чистоту́ и целому́дрие я́ко дар Небе́сный стяжа́вый; ра́дуйся, на вся́каго челове́ка я́ко на о́браз Христо́в взира́вый.

Ра́дуйся, возлюби́вый все Бо́жие творе́ние; ра́дуйся, позна́вый та́йну во Христе́ воскресе́ния.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 11

Пе́ние умиле́нное чрез все житие́ твое́, преподо́бне Анти́по, в ско́рби и ра́дости Творцу́ приноси́л еси́, на вся́ком ме́сте влады́чества Его́ поя́: Аллилу́иа.

Икос 11

Святи́тся И́мя Твое́, О́тче Небе́сный, в преподо́бных Твои́х, я́ко Ду́ха Свята́го упоко́иша в сердца́х свои́х. С ни́ми и Анти́па, ве́рный раб Твой, просвети́ся я́коже второ́е со́лнце, подвиза́я нас вопи́ти ему́:

Ра́дуйся, во све́те за́поведей Христо́вых жизнь свою́ соверши́вый; ра́дуйся, покая́нием и слеза́ми ри́зу души́ омы́вый.

Ра́дуйся, пред кончи́ною ди́внаго зна́мения от ико́ны Богома́тере сподо́бивыйся; ра́дуйся, под пе́ние ака́фистное со святы́ми на ве́ки упоко́ивыйся.

Ра́дуйся, до после́дняго издыха́ния любо́вь оте́ческую явля́вый; ра́дуйся, чад ра́ди духо́вных погребсти́ себе́ вне огра́ды ски́тския завеща́вый.

Ра́дуйся, я́ко моще́й твои́х не прикосну́ся тле́ние; ра́дуйся, я́ко ве́рных мно́жество ны́не прино́сит тебе́ хвале́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 12

Благода́ть ве́лию от Христа́ прии́м, служи́л еси́, о́тче, в ми́ре сем наро́ду Бо́жию, по́мощь и утеше́ние тре́бующим подава́я. И ны́не, в Вы́шних живы́й, моле́ния прося́щих исполня́еши, да ра́достными гла́сы взыва́ют: Аллилу́иа.

Икос 12

Пою́ще Бо́га, ди́внаго во святы́х Свои́х, ублажа́ем тя, о́тче наш Анти́по, уго́дника Его́: преподо́бно бо Влады́це твоему́ на земли́ пожи́в, сыноположе́ния сподо́бился еси́. О толи́цей сла́ве твое́й А́нгели веселя́тся на Небеси́ и ку́пно с на́ми зову́т:

Ра́дуйся, Святы́я Тро́ицы селе́ние возлю́бленное и избра́нное; ра́дуйся, са́да Пречи́стыя Богоро́дицы цве́те благоуха́нный.

Ра́дуйся, всех святы́х и А́нгелов собесе́дниче; ра́дуйся, милосе́рдия Бо́жия пропове́дниче.

Ра́дуйся, я́ко, в Го́рних водворя́яся, нас не оставля́еши; ра́дуйся, я́ко птенцы́ духо́вныя под криле́ собира́еши.

Ра́дуйся, му́жественным и си́льным к подвиго́м укрепле́ние; ра́дуйся, челове́ком немощны́м покро́ве и заступле́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 13

О преди́вный о́тче наш Анти́по! Ны́не, во све́те лица́ Бо́жия лику́я, не забу́ди нас, чад твои́х, но с преподо́бными Се́ргием и Ге́рманом и все́ми отцы́ на́шими, [зде] до́бре подвиза́вшимися, сотвори́ моли́тву, да и мы, спасе́ние улучи́вше, ве́чно вопие́м Бо́гу: Аллилу́иа.

[Се́й конда́к глаго́лется три́жды.][Далее повторяем 1‑е икос и кондак:]

Икос 1

А́нгельстии Си́лы на Небесе́х возра́довашася, зря твое́ рождество́, преподо́бне о́тче, я́ко ты предуста́влен бысть от Бо́га к равноа́нгельному житию́. Ра́дость бысть и на земли́, я́ко пре́жде непло́дная утро́ба ма́тере твоея́ тебе́ породи́. Мы же днесь, о тебе́ ра́дующеся и Бо́га благодаря́ще, согла́сно прино́сим похвалы́ сия́:

Ра́дуйся, я́ко на ра́дость мно́гим в мир прише́л еси́; ра́дуйся, я́ко ра́достию се́рдца твоего́ Христа́ име́л еси́.

Ра́дуйся, доброде́тельми па́че луч со́лнечных сия́яй; ра́дуйся, Ду́ха плода́ми сла́дкими нас пита́яй.

Ра́дуйся, я́ко в напа́стех су́щим ско́ро помога́еши; ра́дуйся, я́ко скорбя́щих сле́зы ми́лостивно отира́еши.

Ра́дуйся, и́ноком во бране́х кре́пкое заступле́ние; ра́дуйся, и всем лю́дем отра́до и похвале́ние.

Ра́дуйся, преподо́бне Анти́по, оби́тели Валаа́мския све́тлое украше́ние.

Кондак 1

Возбра́нный Воево́да лико́в и́ноческих, Христо́с Бо́г наш, венча́ тя венце́м побе́дным на Небеси́, нам же, су́щим на земли́, мо́щи твоя́ нетле́нныя оста́ви во утеше́ние, да при́сно вопие́м ти: ра́дуйся, преподо́бне Анти́по, оби́тели Валаа́мския све́тлое украше́ние.

Моли́тва 1-я

(молитва утверждена Священным Синодом в составе службы 29 декабря 2022 года (журнал №130)

О честна́я и свяще́нная главо́, преподо́бне о́тче наш Анти́по, Ду́ха Свята́го кра́сное жили́ще, Це́ркве Правосла́вныя многопе́сненная похвало́! К тебе́ ны́не притека́ем и тебе́ мо́лимся, я́ко ве́лие дерзнове́ние пред Бо́гом стяжа́вшу: умоли́ Его́ благосты́ню, да не погуби́т нас со беззако́ньми на́шими, но вре́мя на покая́ние да́рует и благода́ть, ко спасе́нию поспешеству́ющую. А́ще бо и ве́мы пра́выя пути́, оба́че не́мощни зело́ те́ми ходи́ти и мно́гаго милосе́рдия Бо́жия и по́мощи тре́буем. Ты же, о́тче святы́й, прелюбе́зен Творцу́ яви́лся еси́, от ю́ности неукло́нно к Нему́ ше́ствуя. Не послужи́л бо еси́ пре́лести ми́ра сего́, но всю си́лу души́ твоея́ к Ве́чному устреми́л еси́, ско́рби и тесноты́ вре́меннаго жития́ му́жественне претерпева́я, наипа́че же во́льныя по́двиги к тем прилага́я.

О, вели́кия твоея́ любве́, ю́же я́ко дар Христу́ прине́сл еси́, и тоя́ ра́ди соверше́нныя да́ры духо́вныя от Него́ прия́л еси́! О, вели́каго смире́ния твоего́, и́мже вся блага́я души́ твоея́ невреди́мо сохрани́л еси́ и смири́вшемуся нас ра́ди Го́споду уподо́бился еси́! Те́мже, не я́ко раб, но я́ко сын возлю́блен, вшел еси́ в ра́дость Небе́снаго Отца́. И ны́не ра́дуются о тебе́ А́нгели и вси святи́и, купножи́теля тя иму́ще; весели́тся страна́ Молда́вская, тя произрасти́вшая; хва́лится гора́ Афо́нская, в му́жа соверше́на тя воспита́вшая; Земля́ Ру́сская, я́ко ма́терь втора́я, любо́вию тя прославля́ет; изря́дно же торжеству́ет оби́тель Валаа́мская, верх доброде́тельнаго жития́ твоего́ узре́вшая и ны́не мо́щи твоя́ нетле́нныя благогове́йне храня́щая. Оба́че и вси лю́дие в па́мяти твое́й ликовству́ют, такова́го засту́пника пред Бо́гом стяжа́вше. Ты же, о́тче святы́й, не преста́й посеща́ти чад твои́х, но к Ца́рствию Небе́сному путево́дствуй, да, моли́твами твои́ми, ча́сти шу́ия изба́вльшеся, Невече́рний Свет Триипоста́снаго Божества́ сподо́бимся зре́ти и во ве́ки прославля́ти Отца́ и Сы́на и Свята́го Ду́ха. Ами́нь.

Моли́тва 2-я

О уго́дниче Бо́жий и ско́рый помо́щниче всем, к тебе́ притека́ющим, преблаже́нне ста́рче, преподо́бне о́тче наш Анти́по! При́зри на нас, недосто́йных чад твои́х, обурева́емых волна́ми жите́йскаго мо́ря! С высоты́ Небе́сныя окорми́ помышле́ния на́ша во благо́е. Укрепи́ ру́це и коле́на осла́бленныя и пра́во ше́ствовати путе́м за́поведей Бо́жиих утверди́. Согре́й сердца́ на́ша, во е́же па́че всех люби́ти Христа́, Преве́чнаго Жениха́ душ на́ших, и вся́каго челове́ка я́ко о́браз нетле́нныя святы́ни Его́. Сохрани́ оби́тель твою́ [сию́] от вся́каго зла, я́ко да пребыва́ют в ней неотлу́чно мир, ра́дость и единомы́слие. Обнови́ в нас си́лы духо́вныя и воздви́гни на брань с неви́димыми враги́ спасе́ния на́шего, да, я́коже ты, до́бре послу́жим Христу́, Бо́гу на́шему, и Ца́рствия Небе́снаго дости́гнем, иде́же со все́ми святы́ми сподо́бимся прославля́ти Безнача́льную Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.