Акафист преподобной Арсении, игумении Усть-Медведицкой

Кондак 1

Избра́нней неве́сте Жениха́ Небе́снаго, роди́телей благочести́вых о́трасли благослове́нней, земли́ Донски́я пресла́вному прозябе́нию и оби́тели Усть-Медве́дицкия богому́дрей игу́мении, Арсе́нии достоблаже́нней, прииди́те, ве́рнии, глас хвале́бный вознесе́м, по́двиги ея́ по достоя́нию ублажи́м, песнь сицеву́ю любо́вию пою́ще: Ра́дуйся, преподо́бная ма́ти Арсе́ние, моли́твеннице о душа́х на́ших.

Икос 1

А́нгела безпло́тнаго и свещу́ горя́щу и светя́щу всем ве́мы тя, ма́ти на́ша Арсе́ние, плоть бо свою́ от ю́ности ду́хови покори́ла еси́, и всем во мра́це жития́ су́щим путь ве́рный е́же ко спасе́нию додне́сь указу́еши, сло́вом живы́м наставле́ний свои́х ду́ши на́ша насыща́еши, те́мже приими́ от нас похвалы́ сия́:

Ра́дуйся, земли́ Донски́я пресла́вное прозябе́ние;

ра́дуйся, Це́ркве Ру́сския пречу́дное украше́ние.

Ра́дуйся, чистоту́ и де́вство возлюби́вшая;

ра́дуйся, собла́зны ю́ности препобеди́вшая.

Ра́дуйся, в ми́ре надми́рно пожи́вшая;

ра́дуйся, ко́зни бесо́вския сокруши́вшая.

Ра́дуйся, заблужда́ющих вразумля́ющая;

ра́дуйся, ду́ши стра́нных окормля́ющая.

Ра́дуйся, свеще́ горя́щая и светя́щая;

ра́дуйся, цевни́це хвалы́ Бо́жия неумолка́ющая.

Ра́дуйся, ли́ка святы́х дев исполне́ние;

ра́дуйся, неради́во живу́щим вразумле́ние.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 2

Ви́дяща неотми́рность твою́ и вопроша́ния духо́вная слы́шаща, роди́теля твоя́, ма́ти Арсе́ние, диви́стася, словеса́ твоя́ в се́рдце слага́юща, Бо́гови неуста́нно славосло́вия возсыла́ста, во дни и в нощи́ вопию́ща к Нему́: Аллилу́иа.

Икос 2

Ра́зум богопросвеще́н иму́щи, ма́ти Арсе́ние, триле́тна еще́ су́щи, востекла́ еси́ ко святи́телю Анто́нию и на но́зе его́ поклони́ся, честь Самому́ Христу́ воздаю́щи, на архиере́и благода́ть Свою́ излива́ющему. Отвеща́в, святи́тель рече́, я́ко сия́ бу́дет вели́кая жена́, мы же, таково́му зна́мению о тебе́ удивля́еми, вопие́м ти, ма́ти, та́ко:

Ра́дуйся, от младе́нства Бо́гом просвеще́нная;

ра́дуйся, от ю́ности себе́ Христу́ уневе́стившая.

Ра́дуйся, во смире́нии воспита́нная;

ра́дуйся, послуша́нию науче́нная.

Ра́дуйся, жития́ мона́шескаго измла́да иска́вшая;

ра́дуйся, ми́ра и собла́знов его́ бе́гавшая.

Ра́дуйся, в Сло́ве Бо́жием отра́ду находи́вшая;

ра́дуйся, благочести́выя жела́ния отца́ своего́ испо́лнившая.

Ра́дуйся, благоче́стия ра́ди укори́зны претерпе́вшая;

ра́дуйся, незло́бие стяжа́вшая и сохрани́вшая.

Ра́дуйся, благоче́стию всех науча́ющая;

ра́дуйся, та́йныя грехи́ облича́ющая.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 3

Си́ла Вы́шняго осени́ дре́вле в пусты́не заиорда́нской Мари́ю преподо́бную, ты же, ма́ти Арсе́ние, сказа́ние о житии́ и по́двизех ея́ еди́ножды услы́шавши, мно́гажды о тех размышля́ше. Мы же, Про́мыслу Бо́жию удивля́ющеся, Соде́телю всех вопие́м: Аллилу́иа.

Икос 3

Иму́щи по́мысл тве́рдый и жела́ние кре́пкое жития́ и́ноческаго, ма́ти Арсе́ние, от ю́ности себе́ к сему́ пути́ те́сному и тру́дному, оба́че же благода́тному и сла́дкому, уготовля́ше, от си́лы в си́лу восходя́щи, сего́ ра́ди вопи́ем ти:

Ра́дуйся, Тро́ицы Пресвяты́я усе́рдная служи́тельнице;

ра́дуйся, дре́вних дев и по́стниц равножи́тельнице.

Ра́дуйся, о души́ челове́честей па́че вся́ческих прилежа́вшая;

ра́дуйся, о ро́скоши и бога́тстве нераде́вшая.

Ра́дуйся, в чте́ниих жити́й уго́дников Бо́жиих поуча́вшаяся;

ра́дуйся, развлече́ний и суеты́ мирски́я отлуча́вшаяся.

Ра́дуйся, чрез ви́димую красоту́ мирозда́ния Неви́димаго позна́вшая;

ра́дуйся, Го́споду хвалу́ благода́рную вы́ну возсыла́вшая.

Ра́дуйся, Прему́дростию Бо́жиею удивля́емая;

ра́дуйся, Го́сподем ко спасе́нию направля́емая.

Ра́дуйся, неземны́я ра́дости преиспо́лненная;

ра́дуйся, Ду́хом Святы́м покрове́нная.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 4

Бу́ря помышле́ний сумни́тельных воздви́жеся в души́ твое́й, ма́ти Арсе́ние, егда́ еще́ ти ю́ней су́щей, роди́тель твой о бра́це твое́м помышля́ше, ты же пове́дати ему́ о свое́м жела́нии и́ноческаго жития́ убоя́лася еси́, да не огорчи́ши его́. Егда́ же уразуме́ роди́тель жела́ния и стремле́ния твоя́, Бо́гови рече́: Аллилу́иа.

Икос 4

Слы́шавши о по́двизех духо́вных и де́лех милосе́рдия се́стер оби́тели Усть-Медве́дицкия, та́мо стопы́ своя́ напра́вила еси́, ма́ти Арсе́ние; обре́тши же оби́тель сию́ име́ньми зело́ ску́дну, оба́че духо́вно бога́ту, зде вселилася еси, преподо́бная, Бо́гови хвалу́ воздаю́щи. Мы же таково́му о тебе́ промышле́нию Бо́жию ра́дующеся, вопие́м ти:

Ра́дуйся, мир и я́же в нем оста́вльшая;

ра́дуйся, во оби́тель Усть-Медве́дицкую во́лею прише́дшая.

Ра́дуйся, нището́ю монасты́рскаго жития́ не устраше́нная;

ра́дуйся, роди́телем свои́м на по́двиг сей благослове́нная.

Ра́дуйся, к просты́м и́нокиням любо́вь име́вшая;

ра́дуйся, благоро́дство свое́ в миру́ оста́вльшая.

Ра́дуйся, чрез ску́дость земну́ю бога́тство духо́вное прозре́вшая;

ра́дуйся, лю́бящая всех, на ли́ца николи́же зре́вшая.

Ра́дуйся, игу́мении Вирсави́и в послуша́ние себе́ вда́вшая;

ра́дуйся, ю́ности своея́ ра́ди Го́спода не пощаде́вшая.

Ра́дуйся, Преображе́нскую оби́тель по ле́тех мно́зех преобрази́вшая;

ра́дуйся, от си́лы в си́лу восходи́вшая.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 5

Боготе́чная звезда́ бысть житие́ твое́ пра́ведное, ма́ти Арсе́ние, я́же мно́гим издале́ча доброде́телию возсия́ла есть, всем путь ко спасе́нию указу́ющая. Мы же, просла́вльшему тя Бо́гу благода́рне о тебе́ вопие́м: Аллилу́иа.

Икос 5

Ви́дим, ма́ти Арсе́ние, я́ко вы́ну бе моли́тва во усте́х твои́х. Молча́ние бо и И́мя Иису́сово возлюби́вши, многолаго́лания бе́гала еси́, то́кмо е́же на потре́бу глаго́лати себе́ дозволя́ющи; рукоде́лие же творя́щи, ум пра́зден не оставля́ше и во Псалти́ри поуча́шеся. Зря́ще же сицевы́я труды́ твоя́, вопие́м ти такова́я:

Ра́дуйся, послуша́ния приле́жно исполня́вшая;

ра́дуйся, пра́здности вы́ну убега́вшая.

Ра́дуйся, в писа́ниих оте́ческих поуча́вшаяся;

ра́дуйся, тех заве́ты испо́лнити потщи́вшаяся.

Ра́дуйся, льсти и лжи неприча́стная;

ра́дуйся, Христо́ва неве́сто прекра́сная.

Ра́дуйся, вси псалмы́ Дави́довы во уме́ обраща́вшая;

ра́дуйся, мета́ния мно́гая ежено́щно твори́вшая.

Ра́дуйся, не́мощь же́нскую препобеди́вшая;

ра́дуйся, му́жески треволне́ния и ско́рби претерпе́вшая.

Ра́дуйся, во Ева́нгелии отра́ду и успокое́ние обре́тшая;

ра́дуйся, ева́нгельских слове́с исполне́нием на Небеса́ возше́дшая.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 6

Пропове́дует мир весь чудеса́ и по́двиги отце́в Ки́ево-Пече́рских, и́хже честны́м моще́м и ты, ма́ти Арсе́ние, поклони́тися возжела́ла еси́. По мно́зех же труде́х и ско́рбех, пове́трия морова́го не устраши́вшися, гра́да Ки́ева дости́гнувши, се́рдцем и душе́ю усты́ Бо́гови песнь воспе́ла еси́: Аллилу́иа.

Икос 6

Возсия́ нам сла́ва чу́днаго жития́ твоего́, ма́ти Арсе́ние, ве́рою бо и любо́вию Го́сподеви неуста́нно рабо́тала еси́, ду́шу свою́ усоверша́ющи, и крест свой нося́щи, во всем себе́ во́ле Бо́жией покаря́ющи, и а́ки от руки́ Его́ вся ско́рби и испыта́ния претерпева́ющи. Тем же, ублажа́юще по́двиги твоя́, вопие́м ти си́це:

Ра́дуйся, путе́м суро́вым и ско́рбным ше́ствовавшая;

ра́дуйся, николи́же вспять озира́вшаяся.

Ра́дуйся, ста́рицу Ардалио́ну в на́ставницу себе́ избра́вшая;

ра́дуйся, тоя́ словеса́ вы́ну исполня́вшая.

Ра́дуйся, в послуша́ние ста́рице себе́ во́лею вда́вшая;

ра́дуйся, бога́тство свое́ духо́вное преумно́жившая.

Ра́дуйся, ско́рби от се́стер и игу́мении с кро́тостию претерпе́вшая;

ра́дуйся, за тех Бо́га моли́ти не престава́вшая.

Ра́дуйся, за́висти и не́нависти отгна́ние;

ра́дуйся, любве́ Бо́жия и благода́ти призва́ние.

Ра́дуйся, нестяжа́ния и кро́тости наста́внице;

ра́дуйся, за нас пред Бо́гом хода́таице.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 7

Хотя́щи непреста́нно поуча́тися словесе́м и наставле́нием Ардалио́ны богому́дрыя, в ке́ллию свою́ сию́ прия́ла еси́, ма́ти Арсе́ние, а по́слежде и ины́я схи́мницы, Ага́фия со Рипсими́ею всели́шася та́можде, любо́вию же ко Го́споду соедине́ннии, во дни и в нощи́ вопия́ху Ему́: Аллилу́иа.

Икос 7

Но́вая ми́лость Бо́жия, и крест но́вый от Него́ бысть избра́ние твое́, ма́ти Арсе́ние, на степе́нь игу́менский; благослове́нием же Госпо́дним чрез богому́друю Ардалио́ну укрепля́ема, на сие́ но́вое по́прище безстра́шно вступи́ла еси́. Мы же таково́му о тебе́ промышле́нию Бо́жию ра́дующеся, любо́вию вопие́м ти:

Ра́дуйся, во игу́менстве по́двиги своя́ усугу́бившая;

ра́дуйся, всем се́страм ма́терь до́брая бы́вшая.

Ра́дуйся, от страсте́й свобожде́ние;

ра́дуйся, в доброде́телех вспоможе́ние.

Ра́дуйся, но́вый храм во сла́ву Бо́жию воздви́гшая;

ра́дуйся, о хра́мех душ се́стер свои́х неусы́пно раде́вшая.

Ра́дуйся, оби́тели ра́ди не жале́вшая себе́;

ра́дуйся, я́ко и ка́мение безгла́снии додне́сь глаго́лют о тебе́.

Ра́дуйся, тру́женице и моли́твеннице смире́нная;

ра́дуйся, пред Бо́гом за се́стер свои́х хода́таице дерзнове́нная.

Ра́дуйся, оби́тели Усть-Медве́дицкия кре́пкое утвержде́ние;

ра́дуйся, в ней живу́щим в по́двизех ве́рное поможе́ние.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 8

Стра́нно и преди́вно есть, ка́ко ты, ма́ти Арсе́ние, не́мощь естества́ же́нскаго му́жески препобеди́вши, от земны́х к Небе́сным возшла́ еси́, мно́гим же и додне́сь путь благи́й и незаблу́дный указу́еши; в бе́дности же Христа́ ра́ди вы́ну живу́щи, оби́тель свою́ преди́вно укра́сити и во всем удо́брити возмогла́ еси́; тем же просла́вльшему тя Бо́гови вопие́м: Аллилу́иа.

Икос 8

Вся и всегда́ с Богом пребыва́ла еси́, ма́ти на́ша Арсе́ние, тве́рдо ве́рующи, я́ко и Госпо́дь вы́ну с тобо́ю есть, еще́ бо во ю́ности свое́й рекла́ еси́: «Не бою́ся гее́нны, с Го́сподем бо и ад не страши́т мя». Таковы́м словесе́м твои́м дивя́щеся, любо́вию вопие́м ти такова́я:

Ра́дуйся, то́кмо Го́спода возлюби́вшая;

ра́дуйся, всем вся бы́вшая.

Ра́дуйся, ду́хом обнища́вшая;

ра́дуйся, го́рдых облича́ющая.

Ра́дуйся, о гресе́х людски́х пла́чущая;

ра́дуйся, ка́ющихся утеша́ющая.

Ра́дуйся, а́гнице Христо́ва чи́стая и кро́ткая;

ра́дуйся, отри́нувшая ни́зкая, возлюби́вшая высо́кая.

Ра́дуйся, а́лчущих пра́вды насыще́ние;

ра́дуйся, жа́ждущих Сло́ва Жи́зни напое́ние.

Ра́дуйся, чудесы́ ве́рным точа́щая;

ра́дуйся, с моли́твою к тебе́ прибега́ющим ско́ро помога́ющая.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 9

Вся кра́сная и сла́вная ми́ра сего́ во уме́ты вмени́вши, ма́ти на́ша Арсе́ние, весь живо́т свой на служе́ние Бо́гу и бли́жним вда́ла еси́. Те́мже припа́даем ти усе́рдно, да ве́ра, е́юже пламене́ла еси́, преподо́бная, и в нас гре́шных пребу́дет, да вопие́м с тобо́ю Го́сподеви: Аллилу́иа.

Икос 9

Вети́и велере́чивыя недоуме́ют и умолка́ют, зря́ще по́двиги и мно́гия труды́ твоя́, ма́ти на́ша Арсе́ние, ка́ко ты от рождества́ своего́ да́же до сме́рти от си́лы в си́лу восходи́ла еси́ на по́прищи духо́внем. Нам же гре́шным житие́ твое́ незазо́рное укрепле́ние есть, сего́ ра́ди вопие́м ти си́це:

Ра́дуйся, чистото́ю и целому́дрием просия́вшая;

ра́дуйся, му́дростию свое́ю бли́жния и да́льния удивля́вшая.

Ра́дуйся, яко в писа́ниих твои́х поуча́емся;

ра́дуйся, я́ко моли́твами твои́ми от грехо́в свобожда́емся.

Ра́дуйся, игу́мение стро́гая и ми́лостивая;

ра́дуйся, ма́ти учи́тельная и чадолюби́вая.

Ра́дуйся, бе́здно глубо́кая смире́ния;

ра́дуйся, горо́ высо́кая милосе́рдия.

Ра́дуйся, высото́ неодоли́мая преподо́бия;

ра́дуйся, научи́тельнице кро́ткая незло́бия.

Ра́дуйся, Ду́хом Святы́м вдохновле́нная;

ра́дуйся, во Ца́рствии Небе́снем жи́ти удосто́енная.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 10

Спаси́тельным путе́м ше́ствующи, все вре́мя живота́ своего́ в Богомы́слии, труде́х и по́двизех мно́гих провожда́ла еси́, ма́ти Арсе́ние, вопию́щи: «Ты, Го́споди, Еди́н прему́др еси́ и просвеще́ние на́ше! Ты, Го́споди, — Си́ла моя́ еси́! Ты, Го́споди, Еди́н Свет еси́!» Те́мже и мы убо́гими усты́ зове́м Ему́: Аллилу́иа.

Икос 10

Стено́ю непреобори́мою моли́тв и благода́ти своея́, ю́же оби́льно от Го́спода стяжа́ла еси́, ма́ти Арсе́ние, огради́ оби́тель свою́ Усть- Медве́дицкую, ю́же кре́пко возлюби́ла еси́, ея́же ра́ди не щади́ла еси́ живота́ своего́, да собра́вшиися во спаси́тельней огра́де ея́ и честне́й ико́не твое́й припа́дающии тебе́ та́ко восхва́лят:

Ра́дуйся, жития́ отреше́ннаго от земны́х вожделе́вшая;

ра́дуйся, в ско́рбех дар Бо́жий прозре́вшая.

Ра́дуйся, безмо́лвия и́стинная наста́внице;

ра́дуйся, целому́дрия ве́рная храни́тельнице.

Ра́дуйся, суеты́ и собла́знов ве́ка сего́ избега́вшая;

ра́дуйся, путе́м Христо́вым незаблу́дно ше́ствовавшая.

Ра́дуйся, преподо́бная, Христу́ уподо́бившаяся;

ра́дуйся, свята́я, свя́тостию просия́вшая.

Ра́дуйся, плоть свою́ копа́нием пеще́р смиря́вшая;

ра́дуйся, из глубины́ о́ных Го́спода за весь мир умоля́вшая.

Ра́дуйся, любве́ ко Го́споду преиспо́лненная;

ра́дуйся, стра́хом Бо́жиим огражде́нная.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 11

Пе́ние сла́дкое и хвала́ Го́споду неусы́пная яви́ся чи́стое и непоро́чное житие́ твое́, ма́ти Арсе́ние, не сладкозву́чною бо свире́лию или́ кимва́лом доброгла́сным Бо́га прославля́ла еси́, но любо́вию де́ятельною к Нему́ и бли́жним свои́м, и всем, во оби́тель твою́ притека́ющим, во дни и в нощи́ вопию́щи Ему́: Аллилу́иа.

Икос 11

Свет твой та́ко просвети́ся пред челове́ки, ма́ти Арсе́ние, я́ко вси, зря́щии до́брая дела́ твоя́, прославля́ху Отца́ на́шего, И́же есть на Небесе́х, те́мже и мы, хвалу́ воздаю́ще Бо́гови, дарова́вшему нам тя, моли́твенницу и хода́таицу на́шу, вопие́м:

Ра́дуйся, я́ко любо́вь твоя́ к Бо́гу преде́л не ве́дяше;

ра́дуйся, я́ко Дух Бо́жий на тебе́ почива́ше.

Ра́дуйся, на земли́ и под земле́ю Бо́гу моли́вшаяся;

ра́дуйся, от сла́вы и по́честей сокры́вшаяся.

Ра́дуйся, Кре́стный путь Спаси́теля изобрази́вшая;

ра́дуйся, Христа́ ра́спята пропове́давшая.

Ра́дуйся, па́мять сме́ртную вы́ну име́вшая;

ра́дуйся, к Суду́ Стра́шному уготовля́вшаяся.

Ра́дуйся, о воздая́нии по сме́рти помышля́вшая;

ра́дуйся, со стра́хом и тре́петом моли́вшаяся.

Ра́дуйся, себе́ всеконе́чне отре́кшаяся;

ра́дуйся, пра́ведное воздая́ние прия́вшая.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 12

Благода́ть ве́лию улучи́ти восхоте́вши, при конце́ жития́ своего́, мно́гими скорбьми́ и неду́ги удруче́нная, ма́ти Арсе́ние, востекла́ еси́ в пусты́ню Саро́вскую, да моще́м преподо́бнаго Серафи́ма поклони́шися, и Бо́гови, о́наго просла́вльшему, честь и хвалу́ возда́си, ея́же дости́гши, возопи́ла еси́: Аллилу́иа.

Икос 12

Пою́ще твое́, ма́ти Арсе́ние, равноа́нгельное житие́, диви́мся и кончи́не твое́й пра́ведней, ея́же Всеще́дрый Госпо́дь во оби́тели Саро́вской тя удосто́и, тем же и сам преподо́бный Серафи́м ду́шу твою́, от те́ла возлете́вшую, сре́те, сего́ ра́ди вопие́м ти:

Ра́дуйся, я́ко стра́нница уедине́нная преста́вльшаяся;

ра́дуйся, чужды́ми людьми́ к погребе́нию угото́ванная.

Ра́дуйся, свя́тостию в по́двизех просия́вшая;

ра́дуйся, Бо́га в чистоте́ се́рдца узре́вшая.

Ра́дуйся, Ца́рства Небе́снаго дости́гшая;

ра́дуйся, та́мо успокое́ние от мно́гих трудо́в обре́тшая.

Ра́дуйся, Богообще́ния наслажда́ющаяся;

ра́дуйся, дщи Бо́жия наре́кшаяся.

Ра́дуйся, награ́ду мно́гу на Небесе́х прия́вшая;

ра́дуйся, в ра́дость Го́спода своего́ вше́дшая.

Ра́дуйся, лик преподо́бных испо́лнившая;

ра́дуйся, свещи́ моли́твы своея́ николи́же угаси́вшая.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 13

О преподо́бная ма́ти, Бо́гом от рожде́ния избра́нная Арсе́ние! Приими́ сие́ на́ше ма́лое и убо́гое моле́ние, пред честно́ю твое́ю ико́ною любо́вию приноси́мое, и моли́ просла́вльшаго тя Го́спода, да соблюде́т от бед оте́чество на́ше и ду́ши чту́щих святу́ю па́мять твою́ засту́пит и поми́лует, да Ца́рствия Небе́снаго дости́гше, вопие́м Ему́: Аллилу́иа.

[Се́й конда́к глаго́лется три́жды.][Далее повторяем 1‑е икос и кондак:]

Икос 1

А́нгела безпло́тнаго и свещу́ горя́щу и светя́щу всем ве́мы тя, ма́ти на́ша Арсе́ние, плоть бо свою́ от ю́ности ду́хови покори́ла еси́, и всем во мра́це жития́ су́щим путь ве́рный е́же ко спасе́нию додне́сь указу́еши, сло́вом живы́м наставле́ний свои́х ду́ши на́ша насыща́еши, те́мже приими́ от нас похвалы́ сия́:

Ра́дуйся, земли́ Донски́я пресла́вное прозябе́ние;

ра́дуйся, Це́ркве Ру́сския пречу́дное украше́ние.

Ра́дуйся, чистоту́ и де́вство возлюби́вшая;

ра́дуйся, собла́зны ю́ности препобеди́вшая.

Ра́дуйся, в ми́ре надми́рно пожи́вшая;

ра́дуйся, ко́зни бесо́вския сокруши́вшая.

Ра́дуйся, заблужда́ющих вразумля́ющая;

ра́дуйся, ду́ши стра́нных окормля́ющая.

Ра́дуйся, свеще́ горя́щая и светя́щая;

ра́дуйся, цевни́це хвалы́ Бо́жия неумолка́ющая.

Ра́дуйся, ли́ка святы́х дев исполне́ние;

ра́дуйся, неради́во живу́щим вразумле́ние.

Ра́дуйся, преподо́бная ма́ти Арсе́ние, моли́твеннице о душа́х на́ших.

Кондак 1

Избра́нней неве́сте Жениха́ Небе́снаго, роди́телей благочести́вых о́трасли благослове́нней, земли́ Донски́я пресла́вному прозябе́нию и оби́тели Усть-Медве́дицкия богому́дрей игу́мении, Арсе́нии достоблаже́нней, прииди́те, ве́рнии, глас хвале́бный вознесе́м, по́двиги ея́ по достоя́нию ублажи́м, песнь сицеву́ю любо́вию пою́ще: Ра́дуйся, преподо́бная ма́ти Арсе́ние, моли́твеннице о душа́х на́ших.

Молитва

О свята́я и достохва́льная ма́ти на́ша Арсе́ние, зе́мли Донски́я пресла́вное прозябе́ние и роди́телей благочести́вых о́трасле благослове́нная! Вонми́ моле́нию нас, недосто́йных чад твои́х, и́же пред честно́ю ико́ною твое́ю прино́сим ти ны́не! Не возгнуша́йся гла́сом на́шим, во гресе́х бо мно́гих и лю́тых есмы́, оба́че на ми́лость твою́ упова́ем и к по́мощи и предста́тельству твоему́ прибега́ем. Умоли́, хода́таице на́ша, Преблага́го Бо́га, да сохрани́т Це́рковь Свою́ от ересе́й и раско́лов, зе́млю на́шу от шата́ний и нестрое́ний, войн и междоусо́бий, наро́д наш от неве́рия и ле́ности духо́вныя. Ве́мы, я́ко мно́го возлюби́ла еси́ в жи́зни вре́менней и мно́го ти от Бо́га даде́ся ны́не, тем же ны́не не оста́ви без твоего́ моли́твеннаго предста́тельства нас си́рых и в доброде́телех убо́гих, и не преста́й простира́ти ко Го́споду многотру́дныя ру́це своя́ за нас. Се сла́вим пра́ведное житие́ твое́, чтем по́двиги твоя́, и мольбы́ своя́ тебе́, я́ко саме́й живе́й су́щей с на́ми прино́сим. Се собра́хомся ны́не и мо́лим тя: да не оты́дет благода́ть Бо́жия от оби́тели твоея́, да не уга́снет в ней лампа́да моле́ний и́ноческих, да умно́жится ста́до Христо́во, и да обратя́тся ко Го́споду вси, не ве́дущии Его́. Умоли́ Всеблага́го Бо́га, да пощади́т ны и вре́мя для и́стиннаго покая́ния да́рует нам, да от грехо́в и беззако́ний на́ших очи́стившеся, дости́гнем Небе́сных и ве́чных оби́телей, иде́же вку́пе с тобо́ю и со все́ми святы́ми просла́вим и́мя Отца́ и Сы́на и Свята́го Ду́ха во ве́ки веко́в. Ами́нь.