Акафист благоверному князю Андрею Боголюбскому

Текст акафиста одобрен для употребления за богослужением и в домашней молитве на заседании Священного Синода 26 декабря 2025 года (журнал № 133).

Кондак 1

Возбра́нный во́ине Царя́ Небе́снаго, вели́кий кня́же земли́ Ру́сския, избра́нный Го́сподем и возлю́бленный Богоро́дицею, испроси́, свя́те Андре́е, предстоя́ у Престо́ла всех Творца́, да проба́вит Всеблаги́й долготерпе́ние Свое́ на ны и низпо́слет нам ра́зум и благоче́стие воспе́ти дея́ния сла́внаго жития́ твоего́, да зове́м ти:

Ра́дуйся, святы́й благове́рный вели́кий кня́же Андре́е.

Икос 1

А́нгельстии чи́ни удиви́шася во пло́ти житию́ твоему́, свя́те кня́же Андре́е, зе́млю Ру́сскую чу́дно устро́ивый и Богома́тернею по́мощию уде́ла Ея́ блюсти́тель ве́рный был еси́, досто́йный прее́мниче свята́го Влади́мира равноапо́стольнаго, с ни́мже ны́не во сла́ве Небе́сней соца́рствуя, приими́ от нас похвалы́ сицевы́я:

Ра́дуйся, ца́рствия Правосла́внаго любому́дрый созида́телю;

ра́дуйся, земе́ль Ру́сских до́брый собира́телю.

Ра́дуйся, благоле́пия церко́внаго ди́вный устрои́телю;

ра́дуйся, о лю́дех свои́х ре́вностный рачи́телю.

Ра́дуйся, му́драго Влади́мира Монома́ха вну́че прему́дрый;

ра́дуйся, сла́внаго основа́теля гра́да Москвы́ сы́не пресла́вный.

Ра́дуйся, вели́ких равноапо́стольнаго кня́зя Влади́мира дел прее́мниче;

ра́дуйся, му́дрости равноапо́стольныя княги́ни О́льги после́довательниче.

Ра́дуйся, измла́да суему́дрия мирска́го отврати́выйся;

ра́дуйся, Свята́го Писа́ния поуче́ний сла́дце послу́шавый.

Ра́дуйся, гра́ды и ве́си ру́сския хра́мы правосла́вными чу́дно украси́вый;

ра́дуйся, основа́ние Руси́ Святы́я благоче́стными де́лы свои́ми тве́рдо укрепи́вый.

Ра́дуйся, святы́й благове́рный вели́кий кня́же Андре́е.

Кондак 2

Ви́дя Сердцеве́дец Госпо́дь благоче́стие твое́ и усе́рдие к слу́жбам церко́вным, и́бо посеще́нию хра́мов от ю́ности своея́ усе́рдно прилежа́ше и та́мо и́стово во смире́нии се́рдца моле́ния Вы́шнему возноша́ше, награди́ тя доброде́тельми мно́гими и му́дрость мона́ршую дарова́ ти, да возмо́жеши пра́во пра́вити лю́ди своя́ и приводи́ти я́ ко спасе́нию, во хвале́нии пою́щих Бо́гу: Аллилу́иа.

Икос 2

Разуме́в, прему́дре, суету́ и тщету́ жития́ любостяжа́тельнаго, ви́дя собла́зны на пути́ свое́м и памяту́я слова́ Писа́ния, я́ко неудо́бь иму́щим бога́тство во Ца́рствие Бо́жие вни́ти, потща́лся еси́ ми́лостыню ни́щим и убо́гим раздая́ти, милосе́рдием свои́м умилостивля́я Всеми́лостиваго Бо́га, И́же преумно́жаше ти ми́лости Своя́ Небе́сныя, по́мощь свы́ше Боже́ственную посыла́я, да и мы, дивя́щеся, вопие́м:

Ра́дуйся, избра́нниче Госпо́день боголюби́вый и боголюби́мый;

ра́дуйся, ра́бе Бо́жий ве́рный и пра́ведный.

Ра́дуйся, христиа́нине ре́вностный и благочести́вый;

ра́дуйся, кня́же богогове́йный и богому́дрый.

Ра́дуйся, прави́телю ще́дрый и ми́лостивый;

ра́дуйся, воево́до добропобе́дный и доброхва́льный.

Ра́дуйся, Пресвяты́я Влады́чицы на́шея почита́телю всеусе́рдный;

ра́дуйся, о всех нас к Ней моли́твенниче те́плый.

Ра́дуйся, сирота́м и вдови́цам заступле́ние;

ра́дуйся, стра́ждущим и ско́рбным утеше́ние.

Ра́дуйся, доброде́телей вся́ческих сохрани́телю;

ра́дуйся, за́поведей ева́нгельских исполни́телю.

Ра́дуйся, святы́й благове́рный вели́кий кня́же Андре́е.

Кондак 3

Слы́шав о ве́лиих нестрое́ниих земли́ Ки́евския, о междоусо́бицах, бра́нех и клятвопреступле́ниих, я́коже и́де брат на бра́та и сро́дник на сро́дника, возмути́ся благове́рный князь ду́хом и взмоли́ся, да изба́вит Госпо́дь Русь от крамолы́ сия́, и да вси от се́рдца чи́ста вы́ну Бо́гови вопию́т: Аллилу́иа.

Икос 3

Иму́щу ти моли́тву непреста́нную, храня́ше тя Спаси́тель я́ко зе́ницу о́ка от стрел вра́жиих и ко́пий неприя́тельских в би́твах и сраже́ниих, соблюда́я тя на дела́ ве́лия и сла́вная, да просла́виши И́мя Христо́во по всей земли́ Ру́сской, сего́ ра́ди в наде́жде предста́тельства твоего́ пое́м ти:

Ра́дуйся, Десни́цею Вы́шняго вы́ну сохраня́емый;

ра́дуйся, кри́лы А́нгельскими незри́мо огражда́емый.

Ра́дуйся, враги́ христиа́нства во бране́х попира́вый;

ра́дуйся, горды́ню нечести́вых до́блественне смиря́вый.

Ра́дуйся, благоче́стия христиа́нскаго утвержде́ние;

ра́дуйся, неве́рия и злоче́стия искорене́ние.

Ра́дуйся, благоче́стием и моли́твою в би́твах побежда́вый;

ра́дуйся, И́мя Христо́во житие́м свои́м прославля́вый.

Ра́дуйся, пе́рвых чудотво́рцев Се́верныя Руси́ почита́телю;

ра́дуйся, уго́дников Бо́жиих и́стинный люби́телю.

Ра́дуйся, страны́ на́шея усе́рдный храмозда́телю;

ра́дуйся, благоле́пия церко́внаго ре́вностный рачи́телю.

Ра́дуйся, святы́й благове́рный вели́кий кня́же Андре́е.

Кондак 4

Бу́рю внутрь помышле́ний имя́ше, свя́те Андре́е, егда́ не хотя́ше до́лее остава́тися во сто́льнем Ки́еве, иде́же бе по повеле́нию отца́ своего́, но ду́хом возгоре́ся отыти́ в зе́млю родну́ю Су́ждальскую, оте́ц же не дозволя́ше ти; ты же, скорбя́ и се́туя, ноча́ми моля́шеся в Вышегра́дском собо́ре пред ико́ною Богома́тере, да ука́жет ти, ка́ко подоба́ет пра́во ступа́ти, взыва́я: Аллилу́иа.

Икос 4

Слы́ша благове́рный князь Андре́й от вышегра́дских жи́телей, я́ко ико́на чудотво́рная Богоро́дицы во хра́ме с ме́ста своего́ схожда́ше и на возду́се посреде́ це́ркве стоя́ше, возгоре́ся душе́ю, зна́мение сие́ прие́м я́ко благоволе́ние Бо́жие. Возра́довася князь и изы́де отту́ду в путь свой о́тай, неся́ с собо́ю сокро́вище многоце́нное – многочу́дную ико́ну Пресвяты́я Богоро́дицы; ны́не же, дерзнове́нное исше́ствие твое́ прославля́юще, пое́м ти:

Ра́дуйся, Бо́гом на дела́ ве́лия избра́нный;

ра́дуйся, ико́ною Богома́тере на по́двиги благословле́нный.

Ра́дуйся, на путь и́стинный свы́ше наста́вленный;

ра́дуйся, богодви́жно из земли́ Ки́евския исше́дый.

Ра́дуйся, про́мыслом Бо́жиим во град Влади́мир приведе́нный;

ра́дуйся, зача́ло Руси́ Моско́вския обустро́ивый.

Ра́дуйся, я́ко тобо́ю Влади́мирская ико́на всему́ Оте́честву на́шему даде́ся в заступле́ние;

ра́дуйся, я́ко тобо́ю честна́я ико́на сия́ всем ве́рным яви́ся во спасе́ние.

Ра́дуйся, Цари́цы Небе́сныя повеле́ния исполни́телю;

ра́дуйся, ико́ны Пресвяты́я Богоро́дицы благоукраси́телю.

Ра́дуйся, судие́ наро́ду милосе́рдный и пра́ведный;

ра́дуйся, прави́телю благоде́тельный и му́дрый.

Ра́дуйся, святы́й благове́рный вели́кий кня́же Андре́е.

Кондак 5

Боготе́чная звезда́ бысть ико́на Богома́тери на пути́ ше́ствия твоего́, свя́те Андре́е, и́бо чу́до путево́дное от нея́ яви́ся: отше́дшу ти не на мно́зе от гра́да Влади́мира, ко́ни, и́же ико́ну везя́ху, ста́ху внеза́пу, и ника́я же си́ла возмо́же подви́гнути я́; ты же повеле́л еси́ тогда́ моле́бствие Бо́гу служи́ти и, припа́д к о́бразу Пречи́стыя, вопия́ше: Аллилу́иа.

Икос 5

Ви́дя свет в полу́нощи и в нем Богоро́дицу, паде́ ниц благове́рный князь в стра́се и тре́пете; Ма́терь же Бо́жия повеле́ о́браз Свой во гра́де Влади́мире поста́вити и в Росто́в не уноси́ти, на ме́сте же сем храм воздви́гнути во и́мя Рождества́ Своего́ и оби́тель и́ноком устро́ити. Посе́м же ви́де князь Пречи́стую, моля́щуся я́вльшемуся во о́блацех Го́споду за ме́сто сие́ и Русь Святу́ю, показу́я промышле́ние ве́лие о наро́де Свое́м. Виде́ния сего́ сподо́бльшемуся благове́рному кня́зю Андре́ю пое́м:

Ра́дуйся, свет невече́рний в нощи́ ви́дети удосто́енный;

ра́дуйся, повеле́нием Влады́чицы во смире́нии обра́дованный.

Ра́дуйся, не свою́ во́лю, но Цари́цы Небе́сныя испо́лнивый;

ра́дуйся, первопи́санный о́браз Ея́ во гра́де Влади́мире поста́вивый.

Ра́дуйся, оби́тель Боголю́бскую на ме́сте явле́ния Богома́тери основа́вый;

ра́дуйся, храм Рождества́ Ея́ зде заложи́вый.

Ра́дуйся, я́ко весь но́вая на ме́сте се́м насели́ся;

ра́дуйся, я́ко Боголю́бово о́ная нарече́ся.

Ра́дуйся, ико́ну Пресвяты́я Богоро́дицы написа́ти повеле́вый;

ра́дуйся, Боголюби́вою ико́ну сию́ наименова́вый.

Ра́дуйся, мно́гия хра́мы во и́мя Богома́тери воздви́гнувый;

ра́дуйся, То́ю за благоче́стие возлю́бленный.

Ра́дуйся, святы́й благове́рный вели́кий кня́же Андре́е.

Кондак 6

Пропове́дует доны́не оби́тель Боголю́бская дея́ния тво́я, благове́рне Андре́е, я́ко храм воздви́гл еси́ на ме́сте явле́ния Пречи́стыя Де́вы и ико́ну написа́ти повеле́л еси́ в па́мять виде́ния сего́; пред не́юже моля́щиися и доны́не получа́ют проси́мое, вопию́ще во благодаре́нии Бо́гови: Аллилу́иа.

Икос 6

Возсия́ во сто́льнем гра́де Влади́мире святы́ня, чудотво́рная ико́на Пресвяты́я Богоро́дицы, твои́ма, кня́же Андре́е, рука́ма в богохрани́мый сей град принесе́нная, во е́же ве́рным ей покланя́тися, воспева́ющим ти благода́рственне:

Ра́дуйся, град Влади́мир благоле́пно укра́сивый;

ра́дуйся, та́мо многочу́дную ико́ну Влады́чицы поста́вивый.

Ра́дуйся, ико́ною Влади́мирскою Русь благослови́вый;

ра́дуйся, ико́ну сию́ нам в покро́в и огражде́ние дарова́вый.

Ра́дуйся, ре́вностный Богоро́дицы почита́телю;

ра́дуйся, во́ли Ея́ усе́рдный исполни́телю.

Ра́дуйся, собо́рнаго хра́ма во гра́де Влади́мире созда́телю;

ра́дуйся, благоле́пия церко́внаго неуста́нный раде́телю.

Ра́дуйся, в защи́ту ве́ры Христо́вы вои́телю;

ра́дуйся, земли́ Ру́сския до́блий засту́пниче.

Ра́дуйся, благослове́ннаго ми́ра огради́телю;

ра́дуйся, во́ине, му́жеству тезоимени́тый.

Ра́дуйся, святы́й благове́рный вели́кий кня́же Андре́е.

Кондак 7

Хотя́й рознь князе́й прекрати́ти и зе́мли Ру́сския под свое́ю держа́вою соедини́ти, укрепля́ше гра́ды и ве́си, хра́мы Бо́жии мно́ги сози́жде, да прославля́ют лю́дие И́мя Бо́жие, пою́ще Ему́: Аллилу́иа.

Икос 7

Но́вый Влади́мир крести́тель Руси́ Се́верныя обре́лся еси́, кня́же богому́дре, язы́ки ко Христу́ приводя́ и церко́вное благоле́пие преумножа́я, и́бо Ца́рствия Бо́жия и пра́вды Его́ иска́ше, те́мже труды́ твоя́ благослови́ Госпо́дь. Сего́ ра́ди восхваля́ем тя си́це:

Ра́дуйся, ве́ру Правосла́вную до сме́рти своея́ сохрани́вый;

ра́дуйся, моли́твою ко Го́споду чудеса́ сотвори́вый.

Ра́дуйся, благоле́пие церко́вное па́че всего́ возлюби́вый;

ра́дуйся, устрое́нием хра́мов бога́тство ве́чное себе́ стяжа́вый.

Ра́дуйся, зо́дчий и храмозда́телю велему́дренный;

ра́дуйся, си́лою Творца́ и Зижди́теля поспе́шествуемый.

Ра́дуйся, ле́том еди́ным храм достоди́вен соверши́вый;

ра́дуйся, оби́тель мона́хом при хра́ме о́ном соде́лавый.

Ра́дуйся, я́ко и себе́ храм Бо́гу соверше́н устро́ил еси́;

ра́дуйся, я́ко и себе́ обита́лище доброде́телей духо́вных яви́л еси́.

Ра́дуйся, преблаги́я Цари́цы Небе́сныя сла́вный избра́нниче;

ра́дуйся, но́ваго Ея́ земна́го уде́ла ве́рный приста́вниче.

Ра́дуйся, святы́й благове́рный вели́кий кня́же Андре́е.

Кондак 8

Стра́нно бысть имени́тым сро́дником твои́м чу́дное житие́ твое́, и́бо не о сла́ве свое́й, но пе́рвее о благоукраше́нии церко́внем со тща́нием прилежа́ше и о вели́чии оте́чества правосла́внаго ревнова́ше, сего́ ра́ди ополчи́ся на тя враг ро́да челове́ча со приспе́шники свои́ми, и́же поноша́ху и клевета́ху на тя; ты же по за́поведи Христо́вой за хули́телей моля́шеся Бо́гу, поя́: Аллилу́иа.

Икос 8

Весь живо́т положи́л еси́ во е́же послужи́ти оте́честву правосла́вному, е́же вручи́ ти Госпо́дь; те́мже с во́йском ходи́ воева́ти во́лжских булга́р, непреста́нно моля́ся о по́мощи Бо́жией; дарова́вшему же ти побе́ду Го́сподеви, в па́мять сию́ утверди́ пра́зднство Всеми́лостиваго Спа́са и Пресвяты́я Богоро́дицы. Лю́дие же ве́рнии и доны́не творя́ще се, во благодаре́нии пою́т ти:

Ра́дуйся, на по́ле бра́ни зна́мение от ико́ны Спа́совы узре́вый;

ра́дуйся, хвалу́ Спаси́телю в день побе́ды над неве́рными пра́здновати повеле́вый.

Ра́дуйся, нечести́вых си́лою Бо́жиею побе́дивый;

ра́дуйся, пра́здник Пресвяты́я Богоро́дицы устро́ивый.

Ра́дуйся, зе́млю Ру́сскую Покро́ву Богома́тери вве́ривый;

ра́дуйся, на служе́ние До́му Пресвяты́я Богоро́дицы житие́ свое́ положи́вый.

Ра́дуйся, собира́ния земе́ль воеди́но му́дрый рачи́телю;

ра́дуйся, держа́вы правосла́вныя до́брый устрои́телю.

Ра́дуйся, благо́е де́ло вели́ких князе́й моско́вских предобрази́вый;

ра́дуйся, единодержа́вию ру́сскому послужи́вый.

Ра́дуйся, я́ко науче́нием твои́м от ра́спрей свобожда́емся;

ра́дуйся, я́ко тобо́ю во еди́но бра́тство собира́емся.

Ра́дуйся, святы́й благове́рный вели́кий кня́же Андре́е.

Кондак 9

Вся́ким доброде́телем прича́стен сый, при исхо́де от пра́веднаго жития́ твоего́, по сло́ву ева́нгельскому хуле́ние и убие́ние претерпе́вый, ве́рный ра́бе Христо́в, помози́ нам жите́йская искуше́ния претерпе́ти и ве́ру непоколеби́му сохрани́ти да́же до кончи́ны своея́, да пое́м непреста́нно Подвигополо́жнику Христу́: Аллилу́иа.

Икос 9

Вети́и ми́ра сего́ недоумева́ху, е́же ка́ко засто́лием кня́жиим и пи́ром дружи́нным предпочита́ше уедине́ние и моли́тву, сы́ны же своя́ та́ко воспита́ во благоче́стии и стра́се Бо́жии, я́ко о́вии на по́ли бра́ни за ве́ру и Оте́чество ду́ши своя́ положи́ша, юне́йший же Глеб к ли́ку благове́рных святы́х сопричте́н бысть. Такова́го раде́теля благоче́стия тя почита́юще, воспева́ем сицева́я:

Ра́дуйся, сы́ны бо твои́ плоды́ досто́йны дре́ва до́браго суть;

ра́дуйся, мо́щи бо нетле́нныя благове́рнаго Гле́ба, сы́на твоего́, похвала́ тебе́ суть.

Ра́дуйся, я́ко ча́да твоя́ в Го́рний Иерусали́м тебе́ предыдо́ша;

ра́дуйся, я́ко о́ные во Ца́рствии Небе́снем ти сора́дуются.

Ра́дуйся, кня́же, лю́дем страны́ своея́ оте́ц любвеоби́льный;

ра́дуйся, воево́до, ца́рствию своему́ защи́титель тве́рдый.

Ра́дуйся, послуша́ние сыно́внее Це́ркви Христо́вой сохрани́вый;

ра́дуйся, мно́зих неве́рных благоче́стием свои́м в ве́ру и́стинную обрати́вый.

Ра́дуйся, сердца́ на́ша о правосла́вней ве́ре укрепля́яй;

ра́дуйся, ду́ши на́ша сия́ньми чуде́с просвеща́яй.

Ра́дуйся, вся прегреше́ния своя́ покая́нием и́стинным потреби́вый;

ра́дуйтся, житие́м свои́м вси лю́дие к покая́нию призыва́вый.

Ра́дуйся, святы́й благове́рный вели́кий кня́же Андре́е.

Кондак 10

Спасе́ния хотя́щу ти себе́ и бли́жним свои́м и моли́твеннику су́щу, пре́дан бысть лжедру́ги и зави́стники, и та́ко им возопи́: «Что вам зло сотвори́х или́ за ко́е де́ло благо́е закала́ете мя, Горясе́ру, нае́мнику Святопо́лкову, подо́бящеся? Бог отмсти́т вам за кровь мою́ пролиту́ю!». О кня́же-страстоте́рпче, восхваля́юще Укре́пльшаго тя в час сме́ртный, пое́м Ему́: Аллилу́иа.

Икос 10

Сте́ну необори́мую гра́ду Влади́миру ве́дяще тя, пра́ведный кня́же, пла́кахуся по тебе́ вси жи́телие его́ и, взе́мше те́ло твое́ честно́е, с пе́сньми благохвале́бными положи́ша во хра́ме собо́рнем, его́же созда́л еси́. Мы же, гре́шнии, в со́нме тя зря́ще святы́х Це́ркве Ру́сския, вопие́м ти та́ко:

Ра́дуйся, жи́зни ве́чныя на Небесе́х сподо́бивыйся;

ра́дуйся, нетле́нное те́ло свое́ на земли́ нам оста́вивый.

Ра́дуйся, я́ко чино́м А́нгельским сликовству́еши в Вы́шних;

ра́дуйся, я́ко от челове́к похвалы́ досточе́стно прие́млеши в ни́жних.

Ра́дуйся, ве́рою тя почита́ющих ско́рое утеше́ние;

ра́дуйся, любо́вию тя восхваля́ющих благо́е весе́лие.

Ра́дуйся, от лжебра́тии пре́данный, му́чимый и убие́нный;

ра́дуйся, святы́м уго́дником Бо́жиим на Небесе́х соводворе́нный.

Ра́дуйся, жити́ем свои́м зе́млю Ру́с-скую просла́вивый;

ра́дуйся, в час сме́ртный моли́твы ко Го́споду возноси́вый.

Ра́дуйся, за оте́чество земно́е хода́таю на Небесе́х непреста́нный;

ра́дуйся, за лю́ди, в ни́жних су́щия, в Вы́шних предста́телю неусы́пный.

Ра́дуйся, святы́й благове́рный вели́кий кня́же Андре́е.

Кондак 11

Пе́ние моле́бное Бо́гови и Пресвяте́й Богоро́дице и доны́не прино́сим, благове́рный кня́же, во хра́мех, я́же воздви́гл еси́, исполня́я сло́во Ева́нгельское, е́же о стяжа́нии сокро́вищ на Небеси́, иде́же ни червь, ни тля тлит, ниже́ та́тие подко́пывают и кра́дут. Те́мже тобо́ю наставля́еми, и мы горе́ сердца́ и́мамы, моля́щеся ко Го́споду, просла́вльшему тя: Аллилу́иа.

Икос 11

Светоза́рная луча́ све́та Боже́ственнаго осия́ житие́ твое́, благове́рный кня́же, потруди́ся бо кня́жества Ру́сская воеди́но соедини́ти; по́слежде ча́яния твоя́ сбы́шася, царь бо воцари́ся еди́н и самодержа́вием Русь утверди́ся, иму́щи огражде́ние ве́лие святу́ю ико́ну Влади́мирскую, пред не́ю же ца́рие и патриа́рси поставля́хуся, прославля́юще тя си́це:

Ра́дуйся, благопло́дна о́трасле держа́внаго и свята́го ќорене;

ра́дуйся, благове́рия любе́зный рачи́телю.

Ра́дуйся, любому́дрия приле́жный сниска́телю;

ра́дуйся, ми́лосердия оби́льный раздая́телю.

Ра́дуйся, злостра́ждущих ско́рый исцели́телю;

ра́дуйся, христолюби́ваго во́инства побо́рниче.

Ра́дуйся, кри́не богонасажде́нный;

ра́дуйся, благода́тию Бо́жиею напое́нный.

Ра́дуйся, пра́вды вседу́шный люби́миче;

ра́дуйся, му́жества всекре́пкий ору́жниче.

Ра́дуйся, о́трасле христолюбе́зная, ро́сами Свята́го Ду́ха взраще́нная;

ра́дуйся, ве́тве добропло́дная, точа́щая арома́ты благово́нныя.

Ра́дуйся, святы́й благове́рный вели́кий кня́же Андре́е.

Кондак 12

Благода́ть истека́ет от моще́й твои́х, всем же притека́ющим к ра́це твое́й подае́ши е́же ко спасе́нию проси́мое; никогда́же оста́ви предста́тельством свои́м оби́тель твою́ и оте́чество, да, в доброде́тели укрепля́еми, пою́т лю́дие Го́сподеви: Аллилу́иа.

Икос 12

Пое́м тя со умиле́нием, всеблаже́нне вели́кий кня́же Андре́е, предстои́ши бо Христу́ на Небесе́х, моля́ся о нас, на земли́ же святы́я и цельбоно́сныя мо́щи твоя́ от скорбе́й свобожда́ют и исцеле́ние источа́ют с ве́рою притека́ющим. Сего́ ра́ди зове́м ти та́ко:

Ра́дуйся, кня́же, ны́не с ли́ки му́ченик сликовству́яй;

ра́дуйся, с благове́рными прави́тели ны́не спребыва́яй.

Ра́дуйся, с пра́ведными от ве́ка про-славля́емый;

ра́дуйся, со все́ми святы́ми почита́-емый.

Ра́дуйся, Престо́лу Царя́ Сла́вы предстоя́й;

ра́дуйся, вы́ну Го́сподеви о нас моля́йся.

Ра́дуйся, гра́да Влади́мира и хра́ма Пресвяты́я Богоро́дицы ди́вное украше́ние;

ра́дуйся, святы́я оби́тели Боголю́бския присночестно́е ра́дование.

Ра́дуйся, сы́на твоего́ благове́рнаго Гле́ба в добронра́вии воспита́вый;

ра́дуйся, чудоно́снаго покрови́теля гра́ду Влади́миру возрасти́вый.

Ра́дуйся, богохрани́мыя страны́ Росси́йския сла́во вели́кая;

ра́дуйся, Правосла́вныя Це́ркве Ру́сския похвало́ высо́кая.

Ра́дуйся, святы́й благове́рный вели́кий кня́же Андре́е.

Кондак 13

О всехва́льне и достосла́вне кня́же боголю́бче Андре́е, Пресвяты́я Богоро́дицы избра́нниче и страны́ на́шея ве́рное охране́ние! Услы́ши ма́лое моле́ние сие́ и те́плым свои́м предста́тельством ко Го́споду и Пречи́стей Ма́тери Его́ оставле́ние грехо́в и спасе́ние ве́чное испроси́ нам, я́ко да вни́дем непреткнове́нно во Ца́рствие Небе́сное и воспое́м та́мо в Тро́ице сла́вимому Бо́гу: Аллилу́иа.

[Се́й конда́к глаго́лется три́жды.][Далее повторяем 1‑е икос и кондак:]

Икос 1

А́нгельстии чи́ни удиви́шася во пло́ти житию́ твоему́, свя́те кня́же Андре́е, зе́млю Ру́сскую чу́дно устро́ивый и Богома́тернею по́мощию уде́ла Ея́ блюсти́тель ве́рный был еси́, досто́йный прее́мниче свята́го Влади́мира равноапо́стольнаго, с ни́мже ны́не во сла́ве Небе́сней соца́рствуя, приими́ от нас похвалы́ сицевы́я:

Ра́дуйся, ца́рствия Правосла́внаго любому́дрый созида́телю;

ра́дуйся, земе́ль Ру́сских до́брый собира́телю.

Ра́дуйся, благоле́пия церко́внаго ди́вный устрои́телю;

ра́дуйся, о лю́дех свои́х ре́вностный рачи́телю.

Ра́дуйся, му́драго Влади́мира Монома́ха вну́че прему́дрый;

ра́дуйся, сла́внаго основа́теля гра́да Москвы́ сы́не пресла́вный.

Ра́дуйся, вели́ких равноапо́стольнаго кня́зя Влади́мира дел прее́мниче;

ра́дуйся, му́дрости равноапо́стольныя княги́ни О́льги после́довательниче.

Ра́дуйся, измла́да суему́дрия мирска́го отврати́выйся;

ра́дуйся, Свята́го Писа́ния поуче́ний сла́дце послу́шавый.

Ра́дуйся, гра́ды и ве́си ру́сския хра́мы правосла́вными чу́дно украси́вый;

ра́дуйся, основа́ние Руси́ Святы́я благоче́стными де́лы свои́ми тве́рдо укрепи́вый.

Ра́дуйся, святы́й благове́рный вели́кий кня́же Андре́е.

Кондак 1

Возбра́нный во́ине Царя́ Небе́снаго, вели́кий кня́же земли́ Ру́сския, избра́нный Го́сподем и возлю́бленный Богоро́дицею, испроси́, свя́те Андре́е, предстоя́ у Престо́ла всех Творца́, да проба́вит Всеблаги́й долготерпе́ние Свое́ на ны и низпо́слет нам ра́зум и благоче́стие воспе́ти дея́ния сла́внаго жития́ твоего́, да зове́м ти:

Ра́дуйся, святы́й благове́рный вели́кий кня́же Андре́е.

Моли́тва

О святы́й благове́рный вели́кий кня́же Андре́е Боголю́бский, Пресвяты́я Богоро́дицы избра́нный служи́телю и держа́вы правосла́вныя му́дрый зда́телю! К тебе́ припа́даем и мо́лим ти ся: принеси́ те́плое твое́ ко Спа́су всех и Го́споду хода́тайство, да сохрани́т безвре́дно оте́чество на́ше, град же и храм сей утверди́т, сердца́ на́ша в ве́ре пра́вой и любви́ укрепля́я, суему́дрие же ве́ка сего́ и вражду́ искореня́я. Кня́же ми́лостивый и ще́дрый! Огради́ моля́щихся тебе́ от враг ви́димых и неви́димых, от губи́тельства и гла́да, от вся́кия ско́рби, бед и боле́зней, и благомо́щным твои́м к Бо́гу предста́тельством испроси́ нам преспе́яния во вся́ком де́ле бла́зе, умоли́ Пречи́стую Влады́чицу на́шу, Ю́же в неизрече́ннем све́те сия́ющую узре́ти сподо́бился еси́, богоблаже́нне Андре́е, да не оста́вит нас, согреша́ющих пред Не́ю, но всегда́ пребу́дет с на́ми, я́ко да заступле́нием Ея́ спаса́еми, при́сно сла́вим преблагослове́нное и всепе́тое и́мя Отца́ и Сы́на и Свята́го Ду́ха во ве́ки веко́в. Ами́нь.