Акафист Пресвятой Богородице пред иконой «Целительница»

Текст акафиста утвержден для употребления за богослужением и в домашней молитве на заседании Священного Синода 12 марта 2024 года (журнал № 23).

Кондак 1

Избра́нней от всех родо́в Пресвяте́й Де́ве Богоро́дице, яви́вшейся не́когда кли́рику боля́щу, во е́же исцели́ти его́ от боле́зни лю́тыя, похва́льное прино́сим пе́ние; Ты же, всеми́лостивая Влады́чице, я́ко иму́щая держа́ву непобеди́мую, от вся́ких бед и скорбе́й и болезне́й свободи́ ны, зову́щия Ти: Ра́дуйся, Благода́тная, Цели́тельнице душ и теле́с на́ших.

Икос 1

Арха́нгел Гаврии́л, возвеща́я Пресвяте́й Де́ве Мари́и безсе́менное зача́тие от Нея́ Сы́на Бо́жия, рече́: «Ра́дуйся, Благода́тная, Госпо́дь с Тобо́ю, благослове́нна Ты в жена́х»; мы́ же, гре́шнии, гла́су Арха́нгела подража́ти дерза́юще, с ве́рою, любо́вию и благогове́нием вопие́м пе́ния сицева́я:

Ра́дуйся, от нача́ла веко́в во главу́ на́шего спасе́ния предызбра́нная; ра́дуйся, многообра́зне от проро́ков предвозвеще́нная.

Ра́дуйся, Неве́сто Неневе́стная, заче́ншая Сы́на наше́ствием Ду́ха Свята́го; ра́дуйся, Ма́ти, в рождестве́ и по рождестве́ пребы́вшая Де́ва.

Ра́дуйся, Оде́ющагося све́том, я́ко ри́зою, пелена́ми пови́вшая; ра́дуйся, го́рняя и до́льняя благода́тию Свое́ю Пита́ющаго млеко́м пита́вшая.

Ра́дуйся, на руку́ Твое́ю Вседержи́теля носи́вшая; ра́дуйся, о Промысли́теле всея́ тва́ри попече́ние име́вшая.

Ра́дуйся, па́че всех Сы́на Твоего́ возлюби́вшая; ра́дуйся, па́че всех от Него́ превознесе́нная.

Ра́дуйся, честне́йшая и сла́внейшая без сравне́ния всех Небе́сных Сил; ра́дуйся, превы́шшая вся́каго созда́ния.

Ра́дуйся, Благода́тная, Цели́тельнице душ и теле́с на́ших.

Кондак 2

Ви́дящи, преблага́я Влады́чице, усе́рдие и благогове́ние кли́рика Вике́нтия, на всяк день преклоня́ющаго коле́на пред честны́м Твои́м образом и арха́нгельское приве́тствие Тебе́ принося́щаго, прия́ла еси́ таково́е его́ благоугожде́ние и дарова́ла еси́ ему́ во дни боле́зни внеза́пное и ди́вное со одра́ воста́ние. Те́мже и мы преклоня́ем коле́на душ и теле́с на́ших пред цельбоно́сным Твои́м о́бразом, Госпоже́ на́ша Богоро́дице, и помина́юще чу́дное явле́ние Твое́ кли́рику боля́щему, вопие́м Сы́ну Твоему́ и Бо́гу на́шему: Аллилу́иа.

Икос 2

Разуме́в чуде́сное исцеле́ние от тя́жкаго неду́га, кли́рик Вике́нтий воста́ с убо́гаго ло́жа своего́, и́де в це́рковь и та́мо пе́сньми хвале́бными просла́ви Тя, Цели́тельницу всех боля́щих. Приими́ у́бо и от нас, Ма́ти Бо́жия, сия́ благохвале́ния:

Ра́дуйся, от врат сме́ртных неисце́льно боля́щих к жи́зни возвраща́ющая; ра́дуйся, сострада́ния к стра́ждущим преиспо́лненная.

Ра́дуйся, пораже́нных разли́чными неду́ги чуде́сно исцеля́ющая; ра́дуйся, во вся́ких ско́рбех и печа́лех небе́сную отра́ду в сердца́ на́ша излива́ющая.

Ра́дуйся, в христиа́нских доброде́телех преуспе́ти нам помога́ющая; ра́дуйся, любо́вию к Бо́гу и бли́жним нас воодушевля́ющая.

Ра́дуйся, от растлева́ющих ду́шу и те́ло собла́знов ми́ра сего́ сохраня́ющая; ра́дуйся, ско́рая услы́шательнице усе́рдно Тебе́ моля́щихся.

Ра́дуйся, источа́ющая вели́кия ми́лости и щедро́ты лю́бящим Тя; ра́дуйся, вся потре́бная в животе́ сем да́рующая упова́ющим на Тя.

Ра́дуйся, ублажа́ющих Тя в гро́зный час сме́рти не оставля́ющая; ра́дуйся, почита́ющих Тя жи́зни ве́чныя сподобля́ющая.

Ра́дуйся, Благода́тная, Цели́тельнице душ и теле́с на́ших.

Кондак 3

Си́лою, да́нною от Тебе́, Госпоже́ Цари́це и Влады́чице, свята́я ико́на Твоя́ источа́ет неоску́дно исцеле́ния стра́ждущим от неду́г многоразли́чных, с несумне́нною ве́рою к ней притека́ющим, Бо́гу же вопию́щим: Аллилу́иа.

Икос 3

Иму́щи премно́гую любо́вь к ро́ду христиа́нскому и ма́тернее о нем попече́ние, всем прося́щим у Тебе́ по́мощи и заступле́ния вся́кое благо́е проше́ние ско́ро исполня́еши; сего́ ра́ди Тебе́, всемо́щней Засту́пнице и ско́рой Помо́щнице на́шей, прино́сим похвалы́ сия́:

Ра́дуйся, скорбя́щих утеше́ние; ра́дуйся, безнаде́жных наде́ждо.

Ра́дуйся, тружда́ющихся по́моще и укрепле́ние; ра́дуйся, ни́щих оде́яние.

Ра́дуйся, а́лчущих пита́тельнице; ра́дуйся, оби́димых и гони́мых засту́пнице.

Ра́дуйся, оби́дящих устраши́тельнице; ра́дуйся, в христиа́нстей ве́ре наста́внице.

Ра́дуйся, взыска́ние поги́бших; ра́дуйся, спору́чнице спасе́ния гре́шных.

Ра́дуйся, земли́ Ру́сския прославле́ние; ра́дуйся, гра́да Москвы́ благода́тный Покро́ве.

Ра́дуйся, Благода́тная, Цели́тельнице душ и теле́с на́ших.

Кондак 4

Бу́ри страсте́й и похоте́й, и искуше́ний бесо́вских изба́ви нас, премилосе́рдная Богоро́дице, укрепи́ и сохрани́ в нас до конца́ жи́зни на́шея ве́ру правосла́вную и пре́данность Святе́й Це́ркви, да возмо́жем невозбра́нно пе́ти Го́споду Бо́гу: Аллилу́иа.

Икос 4

Слы́ша Госпо́дь на Небеси́ Твоя́ о нас моле́ния, Преблага́я Влады́чице, исполня́ет ско́ро вся́кое проше́ние Твое́. Ве́дуще таково́е ма́тернее дерзнове́ние к Сы́ну Твоему́, Го́споду на́шему Иису́су Христу́, вси к Тебе́ прибега́ем и усе́рдно мо́лим Тя: предста́тельствуй о нас, многогре́шных рабе́х Твои́х, пред всемогу́щим Созда́телем на́шим, да не погуби́т нас со беззако́ньми на́шими, но да пода́ст нам оставле́ние прегреше́ний, вопию́щим Тебе́ из глубины́ души́:

Ра́дуйся, Предста́тельнице на́ша пред Бо́гом, мир от бед спаса́ющая; ра́дуйся, Сы́на Твоего́ на ми́лость к нам недосто́йным преклоня́ющая.

Ра́дуйся, от запале́ния о́гненнаго росо́ю моли́тв Твои́х избавля́ющая; ра́дуйся, уда́ры мо́лнии и гро́ма от нас отводя́щая.

Ра́дуйся, юро́дивую му́дрость ве́ка сего́ посрамля́ющая; ра́дуйся, путь спасе́ния заблу́дшим показу́ющая.

Ра́дуйся, гре́шным к Бо́гу дерзнове́ние да́рующая; ра́дуйся, изнемога́ющим в напа́стех, ско́рбех и искуше́ниих ско́ро помога́ющая.

Ра́дуйся, в посте́, моли́тве и богомы́слии пребыва́ющим при́сно спребыва́ющая; ра́дуйся, бла́га земна́я, су́етная и скоропреходя́щая, презира́ти нас науча́ющая.

Ра́дуйся, к небе́сным и ве́чным сокро́вищем умы́ и сердца́ на́ша возводя́щая; ра́дуйся, еди́ное на потре́бу избира́ти науча́ющая.

Ра́дуйся, Благода́тная, Цели́тельнице душ и теле́с на́ших.

Кондак 5

Свет Небе́сный озари́ хра́мину боля́щаго кли́рика, егда́ предста́ла еси́, Преблага́я Влады́чице, дарова́ти ему́ исцеле́ние от лю́таго неду́га. О Пресвята́я Госпоже́ Богоро́дице, просвети́ помраче́нныя мно́гими грехми́ ду́ши на́ша и пода́ждь исцеле́ние боле́знующим телесе́м на́шим, да прославля́юще Твоя́ ми́лости, вопие́м ра́достно Бо́гу: Аллилу́иа.

Икос 5

Ви́дяще Тя, Влады́чицу Богоро́дицу, пред огнезра́чным Престо́лом Пресвяты́я Тро́ицы стоя́щу и за христиа́н моля́щуюся, Небе́сныя Си́лы и вси святи́и, от века Бо́гу угоди́вшии, немо́лчными славосло́виями ублажа́ют Тя. Мы́ же, гре́шнии, на земли́, любо́вию к Тебе́ подвиза́емии, дерза́ем воспева́ти Тебе́ си́це:

Ра́дуйся, Ма́тернею любо́вию весь мир христиа́нский объе́млющая; ра́дуйся, моли́твами Твои́ми к Сы́ну Твоему́ и Бо́гу нас спаса́ющая.

Ра́дуйся, о́бразом святы́м Цели́тельницы град Москв́у благослови́вшая; ра́дуйся, оби́тель Алекси́евскую чудесы́ мно́гими освяти́вшая.

Ра́дуйся, изря́дная Спобо́рнице веду́щим брань проти́ву искуше́ний мирски́х и душевре́дных; ра́дуйся, Наста́внице целому́дрия и воздержа́ния.

Ра́дуйся, всех прибега́ющих под кров Твой прие́млющая; ра́дуйся, от вся́кия зло́бы и вражды́ ми́ром и любо́вию огражда́ющая.

Ра́дуйся, подви́жников благоче́стия к Го́рнему Иерусали́му Путеводи́тельнице; ра́дуйся, душепа́губных ересе́й и раско́лов Искорени́тельнице.

Ра́дуйся, ско́рая в беда́х и печа́лех Уте́шительнице; ра́дуйся, всех ве́рных блага́я Засту́пнице.

Ра́дуйся, Благода́тная, Цели́тельнице душ и теле́с на́ших.

Кондак 6

Пропове́дует Свята́я Правосла́вная Це́рковь мно́жество чуде́с Твои́х и вели́кия Твоя́ ми́лости, Преблага́я Влады́чице, я́ко гра́ды и ве́си огражда́еши, оби́тели и́ноческия и жили́ща благочести́вых защища́еши, оби́димых заступа́еши и вся́ блага́я и душеполе́зная низпосыла́еши всем прославля́ющим Тя и пою́щим Сы́ну Твоему́: Аллилу́иа.

Икос 6

Све́тло красу́ется зде, Госпоже́ Богоро́дице, чудотво́рная Твоя́ ико́на, имену́емая «Цели́тельница», прогоня́ющи от всех ве́рных тьму́ искуше́ний и напа́стей и оби́льно исцеле́ния источа́ющи. Сего́ ра́ди во умиле́нии зове́м Ти:

Ра́дуйся, о́браз Твой нам ми́лостивно дарова́вшая; ра́дуйся, чрез ико́ны Твоя́ святы́я пресла́вно чудоде́йствующая.

Ра́дуйся, от неисце́льных боле́зней ско́рое исцеле́ние подаю́щая; ра́дуйся, от вся́ких бед и скорбе́й избавля́ющая.

Ра́дуйся, грехо́вныя стра́сти укроща́ющая; ра́дуйся, коле́блющихся в ве́ре правосла́вней укрепля́ющая.

Ра́дуйся, утеше́ние благода́тное в сердца́ боголюби́вая излива́ющая; ра́дуйся, наде́ждою небе́сных благ ве́рных ду́ши услажда́ющая.

Ра́дуйся, в до́брых де́лех преуспева́ти нам помога́ющая; ра́дуйся, от ви́димых и неви́димых враг нас защища́ющая.

Ра́дуйся, благода́тию Твое́ю па́дших возставля́ющая; ра́дуйся, страх Бо́жий в сердца́ на́ша вселя́ющая.

Ра́дуйся, Благода́тная, Цели́тельнице душ и теле́с на́ших.

Кондак 7

Хотя́щи яви́ти милосе́рдие Твое́ неизрече́нное, дарова́ла еси́ нам, Преблага́я Богоро́дице Де́во, чудотво́рную ико́ну Твою́, имену́емую «Цели́тельница», да вси притека́ющии к ней с ве́рою от боле́зней свобожда́ются и вся́каго утеше́ния сподобля́ются. Сего́ ра́ди вопие́м о Тебе́ Бо́гу: Аллилу́иа.

Икос 7

Ди́вна и пресла́вна дела́ Твоя́, Пренепоро́чная Влады́чице: всем бо, бога́тым и ни́щим, здра́вым и боля́щим, с приле́жною моли́твою к цельбоно́сней ико́не Твое́й притека́ющим, вся блага́я по коего́ждо потре́бе и в ме́ру ве́ры и любве́ подае́ши. Те́мже и мы не таи́м Твои́х благодея́ний, но, благода́рственно прославля́юще ми́лости Твоя́, глаго́лем Ти си́це:

Ра́дуйся, глухи́х слы́шание; ра́дуйся, слепы́х прозре́ние.

Ра́дуйся, немы́х глаго́лание; ра́дуйся, хромы́х хожде́ние.

Ра́дуйся, прокаже́нных очище́ние; ра́дуйся, разсла́бленных укрепле́ние.

Ра́дуйся, от злых и лука́вых духо́в свобожде́ние; ра́дуйся, по Бо́зе на́ше прибе́жище и заступле́ние.

Ра́дуйся, от нужд, печа́лей и бед непрело́жно избавля́ющая; ра́дуйся, пристра́стие к тле́нному бога́тству искореня́ющая.

Ра́дуйся, иска́ти бога́тство нетле́нное на Небеси́ науча́ющая; ра́дуйся, у́м наш в Го́рняя вперя́ющая.

Ра́дуйся, Благода́тная, Цели́тельнице душ и теле́с на́ших.

Кондак 8

Стра́нни и прише́льцы в ми́ре сем ско́рбнем и многомяте́жнем су́ще, ве́чнаго Небе́снаго оте́чества взыску́ем и Тебе́, всемо́щную Цари́цу Присноде́ву Богоро́дицу, смире́нно про́сим: путево́дствуй нас по стезя́м спаси́тельных за́поведей Сы́на Твоего́, Христа́ Бо́га на́шего, да избе́гше се́тей неви́димаго врага́, возмо́жем невозбра́нно воспева́ти Вседержи́телю Бо́гу песнь: Аллилу́иа.

Икос 8

Весь мир христиа́нский ублажа́ет Тя, Пренепоро́чная Де́во, гла́сы хвале́бными: всем бо ве́рным, наипа́че же боля́щим, уте́шительно есть взира́ти на всечестну́ю ико́ну Твою́, «Цели́тельница» имену́емую. О пречу́дная Госпоже́ Богоро́дице, приими́ и на́ша умиле́нная благохвале́ния такова́я:

Ра́дуйся, ра́досте на́ша; ра́дуйся, добро́то несказа́нная.

Ра́дуйся, высото́ доброде́телей; ра́дуйся, глубино́ смиренному́дрия.

Ра́дуйся, неистощи́мый исто́чниче ми́лостей и щедро́т; ра́дуйся, благоуха́нный цве́те де́вства и чистоты́.

Ра́дуйся, ве́ры христиа́нския утвержде́ние; ра́дуйся, нече́стия обличе́ние.

Ра́дуйся, Го́рних Сил похвало́; ра́дуйся, пра́ведных сла́во.

Ра́дуйся, гре́шных упова́ние; ра́дуйся, ненаде́емых наде́яние.

Ра́дуйся, Благода́тная, Цели́тельнице душ и теле́с на́ших.

Кондак 9

Все упова́ние на Тя возлага́ем, Ма́ти Бо́жия, и в ско́рбех и боле́знех ко святе́й ико́не Твое́й с благогове́нием и ве́рою притека́ем, ча́юще от нея́ ско́рое утеше́ние и исцеле́ние получи́ти. О Пресвята́я Цари́це Богоро́дице, воззри́ ми́лостивно на нас, смире́нных рабо́в Твои́х, и ускори́ испо́лнити вся, я́же на по́льзу нам, и в сей жи́зни, и в бу́дущей, да прославля́юще Твое́ благоутро́бие, воспева́ем Творцу́ Бо́гу: Аллилу́иа.

Икос 9

Вети́и многовеща́ннии не возмо́гут досто́йно восхвали́ти Тя, Пречи́стая Де́во, Честне́йшую Херуви́м и Сла́внейшую без сравне́ния Серафи́м, безсе́менно ро́ждшую Спа́са душ на́ших. Мы́ же, а́ще и не́мощни есмы́, оба́че, любо́вию к Тебе́ побежда́еми, отверза́ем недосто́йная уста́ своя́ на похвалы́ Тебе́ сицевы́я:

Ра́дуйся, та́йно, умы́ челове́ческими и А́нгельскими непостижи́мая; ра́дуйся, чистото́ю А́нгелов превозше́дшая.

Ра́дуйся, чуде́с Христо́вых нача́ло; ра́дуйся, проро́честв дре́вних исполне́ние.

Ра́дуйся, де́вство и рождество́ в Себе́ чу́дно сочета́вшая; ра́дуйся, во обою́ непоро́чно и свя́то Себе́ сохра́ньшая.

Ра́дуйся, Ма́ти Сы́на Бо́жия и Бо́га Вы́шняго; ра́дуйся, па́дшему челове́честву отве́рзшая вход в Ца́рствие Небе́сное.

Ра́дуйся, ти́хое приста́нище от бурь пла́вающим по мо́рю жите́йскому; ра́дуйся, Бо́гом дарова́нная отра́до стра́ждущим.

Ра́дуйся, сия́ющая благода́тию и сла́вою преди́вных зна́мений и чуде́с; ра́дуйся, прие́млющая похвале́ние людски́х слове́с.

Ра́дуйся, Благода́тная, Цели́тельнице душ и теле́с на́ших.

Кондак 10

Спасти́ хотя́ род челове́ческий от беззако́ний и ве́чныя му́ки, Человеколю́бец Госпо́дь Тя, Ма́терь Свою́, дарова́ в по́мощь, покро́в и защи́ту ве́рующим в Него́. Прославля́юще таково́е Созда́теля на́шего безме́рное милосе́рдие о нас, гре́шных, благода́рственным се́рдцем и устны́ вопие́м Ему́: Аллилу́иа.

Икос 10

Стена́ еси́ необори́мая и заступле́ние кре́пкое, Богоро́дице Де́во, всем с моли́твою к Тебе́ прибега́ющим. Те́мже у́бо и нас, недосто́йных, огради́ от лю́тых боле́зней и от вся́каго зла́го обстоя́ния и пода́ждь во всех де́лех благовре́менную по́мощь и укрепле́ние взыва́ющим Ти:

Ра́дуйся, Засту́пнице на́ша и похвало́; ра́дуйся, Храни́тельнице на́ша и утвержде́ние.

Ра́дуйся, Отра́до на́ша и ди́вное о нас попече́ние; ра́дуйся, изве́стное прибе́жище на́ше во всех ско́рбных обстоя́ниих.

Ра́дуйся, младе́нцев воспита́ние; ра́дуйся, ю́ных Наста́внице целому́дрия.

Ра́дуйся, супру́гом любо́вь и согла́сие да́рующая; ра́дуйся, благогове́йных ста́рцев духо́вно укрепля́ющая.

Ра́дуйся, ве́рных па́стырей Святы́я Це́ркве вразумля́ющая; ра́дуйся, во и́ноческом о́бразе подвиза́ющимся в Го́рний Иерусали́м путь указу́ющая.

Ра́дуйся, в ми́ре благочести́во живу́щих не оставля́ющая Свои́м заступле́нием; ра́дуйся, всем христиа́ном преди́вное вспоможе́ние.

Ра́дуйся, Благода́тная, Цели́тельнице душ и теле́с на́ших.

Кондак 11

Пе́ния и мольбы́ всеумиле́нныя, ны́не на́ми приноси́мыя пред цельбоно́сным Твои́м о́бразом, приими́, Присноде́во Богоро́дице, и сподо́би до конца́ жи́зни на́шея еди́ному Бо́гу воспева́ти: Аллилу́иа.

Икос 11

Светоза́рне сия́ет чудотво́рная ико́на Твоя́, Ма́ти Бо́жия, источа́ющи ве́рным то́ки исцеле́ний благода́тных и наставля́ющи блужда́ющих во тьме́ грехо́в на све́тлый путь доброде́телей и спасе́ния. Сего́ ра́ди вопие́м Ти хвале́бныя пе́сни таковы́я:

Ра́дуйся, чудесы́, от святы́я ико́ны истека́ющими, зе́млю Ру́сскую напои́вшая; ра́дуйся, оби́тель Алекси́евскую о́бразом сим просла́вльшая.

Ра́дуйся, осене́нием Твоея́ ико́ны си́лу вра́жию прогоня́ющая; ра́дуйся, прибега́ющим в ско́рбех, ну́ждах и боле́знех ско́рое утеше́ние и исцеле́ние подава́ющая.

Ра́дуйся, чу́до чуде́с, Одиги́трие Влады́чице, на путь спасе́ния наставля́ющая; ра́дуйся, ми́рное устрое́ние обурева́емым напа́стьми да́рующая.

Ра́дуйся, чистото́ю Твое́ю чи́стому житию́ нас науча́ющая; ра́дуйся, лука́вых, го́рдых и гневли́вых люде́й вразумля́ющая.

Ра́дуйся, пра́вую ве́ру и страх Бо́жий в нас вселя́ющая; ра́дуйся, све́том Христо́ва уче́ния тьму́ неве́рия прогоня́ющая.

Ра́дуйся, смуще́ния помышле́ний сумни́тельных удаля́ющая; ра́дуйся, духо́вныя да́ры ще́дро подаю́щая.

Ра́дуйся, Благода́тная, Цели́тельнице душ и теле́с на́ших.

Кондак 12

Благода́тию и щедро́тами Твои́ми, премилосе́рдная Влады́чице, не оставля́еши христиа́н правосла́вных, да́рующи скорбя́щим утеше́ние, оби́димым заступле́ние, боля́щим исцеле́ние и всем су́щим в беда́х многоразли́чных избавле́ние; сего́ ра́ди, прославля́юще Тя, благода́рственно вопие́м Бо́гу: Аллилу́иа.

Икос 12

Пою́ще Твоя́ неизрече́нныя ми́лости и чудеса́, явля́емая нам недосто́йным, преклоня́ем коле́на пред цельбоно́сным Твои́м о́бразом, Богоро́дице Присноде́во, и мо́лим Тя усе́рдно: пода́ждь нам мир, тишину́ и благу́ю христиа́нскую кончи́ну и не оста́ви без Твоея́ по́мощи и заступле́ния во второ́м прише́ствии Сы́на Твоего́ и Бо́га на́шего всех принося́щих Ти со умиле́нием сия́ похвалы́:

Ра́дуйся, в уны́ние и отча́яние впа́дших наде́ждою спасе́ния укрепля́ющая; ра́дуйся, у́зы грехо́вныя разреша́ющая.

Ра́дуйся, пра́ведный на нас гнев Бо́жий на ми́лость прелага́ющая; ра́дуйся, земно́е житие́ на́ше до́бре устроя́ющая.

Ра́дуйся, от опа́сных обстоя́ний Изба́вительнице; ра́дуйся, в час кончи́ны ско́рая Помо́щнице.

Ра́дуйся, на мыта́рствах возду́шных заступа́ющая чту́щих Тя; ра́дуйся, не чту́щих Тя посрамля́ющая.

Ра́дуйся, к Тебе́ любо́вь иму́щим отверза́ющая ра́йская врата́; ра́дуйся, ве́чнаго блаже́нства в Ца́рствии Небе́снем сподобля́ющая прославля́ющих Тя.

Ра́дуйся, Держа́во на́ша, во дни тя́жких испыта́ний нас укрепля́ющая; ра́дуйся, Ра́досте на́ша, во вся дни нас освяща́ющая.

Ра́дуйся, Благода́тная, Цели́тельнице душ и теле́с на́ших.

Кондак 13

О Всепе́тая Ма́ти Сладча́йшаго Го́спода на́шего Иису́са Христа́, ми́лостивно приими́ сие́ ма́лое моле́ние на́ше, изба́ви нас от вся́кия напа́сти, боле́зни и внеза́пныя сме́рти и сподо́би нас насле́дники бы́ти Ца́рствия Небе́снаго и со все́ми святы́ми воспева́ти Сы́ну Твоему́ и Бо́гу на́шему: Аллилу́иа.

[Се́й конда́к глаго́лется три́жды.][Далее повторяем 1‑е икос и кондак:]

Икос 1

Арха́нгел Гаврии́л, возвеща́я Пресвяте́й Де́ве Мари́и безсе́менное зача́тие от Нея́ Сы́на Бо́жия, рече́: «Ра́дуйся, Благода́тная, Госпо́дь с Тобо́ю, благослове́нна Ты в жена́х»; мы́ же, гре́шнии, гла́су Арха́нгела подража́ти дерза́юще, с ве́рою, любо́вию и благогове́нием вопие́м пе́ния сицева́я:

Ра́дуйся, от нача́ла веко́в во главу́ на́шего спасе́ния предызбра́нная; ра́дуйся, многообра́зне от проро́ков предвозвеще́нная.

Ра́дуйся, Неве́сто Неневе́стная, заче́ншая Сы́на наше́ствием Ду́ха Свята́го; ра́дуйся, Ма́ти, в рождестве́ и по рождестве́ пребы́вшая Де́ва.

Ра́дуйся, Оде́ющагося све́том, я́ко ри́зою, пелена́ми пови́вшая; ра́дуйся, го́рняя и до́льняя благода́тию Свое́ю Пита́ющаго млеко́м пита́вшая.

Ра́дуйся, на руку́ Твое́ю Вседержи́теля носи́вшая; ра́дуйся, о Промысли́теле всея́ тва́ри попече́ние име́вшая.

Ра́дуйся, па́че всех Сы́на Твоего́ возлюби́вшая; ра́дуйся, па́че всех от Него́ превознесе́нная.

Ра́дуйся, честне́йшая и сла́внейшая без сравне́ния всех Небе́сных Сил; ра́дуйся, превы́шшая вся́каго созда́ния.

Ра́дуйся, Благода́тная, Цели́тельнице душ и теле́с на́ших.

Кондак 1

Избра́нней от всех родо́в Пресвяте́й Де́ве Богоро́дице, яви́вшейся не́когда кли́рику боля́щу, во е́же исцели́ти его́ от боле́зни лю́тыя, похва́льное прино́сим пе́ние; Ты же, всеми́лостивая Влады́чице, я́ко иму́щая держа́ву непобеди́мую, от вся́ких бед и скорбе́й и болезне́й свободи́ ны, зову́щия Ти: Ра́дуйся, Благода́тная, Цели́тельнице душ и теле́с на́ших.

Молитва

О Пресвята́я Госпоже́ Цари́це Богоро́дице, Вы́шшая всех Небе́сных Сил и Святе́йшая всех святы́х! Припа́даем и поклоня́емся Тебе́ пред всечестны́м и цельбоно́сным о́бразом Твои́м, воспомина́юще ди́вное явле́ние Твое́ боля́щему кли́рику Вике́нтию, и усе́рдно мо́лим Тя, всеси́льную ро́да на́шего Засту́пницу и Помо́щницу: я́коже дре́вле подала́ еси́ исцеле́ние тому́ кли́рику, та́ко и ны́не исцели́ на́ша ду́ши и телеса́, боле́знующия ра́нами грехо́в и страсте́й многоразли́чных, изба́ви нас от вся́ких напа́стей, бед, скорбе́й и ве́чнаго осужде́ния, сохрани́ от душепа́губных уче́ний и безве́рия, от льсти́вых и на́глых нападе́ний неви́димых враго́в, пода́ждь нам христиа́нскую кончи́ну, безболе́зненну, ми́рну, непосты́дну, Святы́х Та́ин прича́стну, и сподо́би нас на нелицеприя́тнем суди́щи Христо́ве ста́ти одесну́ю всепра́веднаго Судии́ и блаже́нный глас Его́ услы́шати: «Прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра!» Ами́нь.

Иная молитва,

заимствована из сборника «Молитвы, чтомыя на молебнех и инех последованиих» (Пг.: Синодальная типография, 1915), л. 34

Приими́, о Всеблагослове́нная и Всемо́щная Госпоже́ Влады́чице Богоро́дице Де́во, сия́ моли́твы, со слеза́ми Тебе́ ны́не приноси́мыя от нас недосто́йных раб Твои́х, ко Твоему́ цельбоно́сному о́бразу пе́ние возсыла́ющих со умиле́нием, я́ко Тебе́ Само́й зде су́щей и вне́млющей моле́нию на́шему. По коему́ждо бо проше́нию исполне́ние твори́ши, ско́рби облегча́еши, немощны́м здра́вие да́руеши, разсла́бленныя и неду́жныя исцеля́еши, от бе́сных бе́сы прогоня́еши, оби́димыя от оби́д избавля́еши, прокаже́нныя очища́еши и ма́лыя де́ти ми́луеши: еще́ же, Госпоже́ Влады́чице Богоро́дице, и от уз и темни́ц свобожда́еши и вся́кия многоразли́чныя стра́сти врачу́еши: вся́ бо су́ть возмо́жна хода́тайством Твои́м к Сы́ну Твоему́, Христу́ Бо́гу на́шему. О Всепе́тая Ма́ти, Пресвята́я Богоро́дице! Не преста́й моли́тися о нас недосто́йных рабе́х Твои́х, сла́вящих Тя и почита́ющих Тя, и покланя́ющихся со умиле́нием пречи́стому о́бразу Твоему́, и наде́жду иму́щих невозвра́тну и ве́ру несумне́нну к Тебе́, Присноде́ве пресла́вней и непоро́чней, ны́не и при́сно и во ве́ки веко́в. Ами́нь.